Read Nyishi MWMIN NWSWR 51 Bible Online

MWMIN NWSWR 51 - Nyishi bible

MWMIN NWSWR 51

¹Pwnboa; noqg tumanam aby hoqgv, ngam aya mwwpa tvb; noqg naleqgo aya mwwpanam hoqgv ngoqg nyic tulungam neexaq tukub.

²Ngoqg nyimur mwlw sam hwrxaq tvb, hoo ngoqg nyic hoqgv ngam nyedar darxaq tvb.

³Hoggab ngo atv ngoqg nyixaqkam ceng do, hoo ngoqg nyicv ngoqg agaho lwxiam doodo.

⁴Noqg ceebio dvb, ngo nyic nyitkun hoo hoggv almadwn noqg kaagaho ham nyitkun, hoqgab no noqg gomcwr tulungv albo pwwngam hwwlin mvdwb hoo noqg pw-hwwnamv timb dvb nyima dvn.

⁵Kaato, ngam nyic dvb bwwlinum, hoo ngam annwg kepo hoqgv nyic dvb yirab kunum.

⁶Kaato, hang urag jvqtwngam no hemp dvn, hoo no hang rvvilo mwwlaqkam ngam tomswr dvn.

⁷Hissop lvgab ngam hwrxaq tvb, hoo ngo dvrwq taikun; ngam hwrxaq tvb, hoo ngo tapam mam huubin yaatayin.

⁸Ngam hempam la mwwngamnam mam tapa mvtwb; noqg durtu dvb mvknam alo tulungam hwnyir-hvmar mvmto.

⁹Ngoqg nyic tulu hoqgv noqg nyuqm mam kvsto, hoo ngoqg nyic tulungam neexaq tukub.

¹⁰Pwnboa, ngam dvrwqbo hanglo ak pwtkub, hoo ngoqg ura yalam kvtaqdvb mvdar tukub.

¹¹Noqg dook hoqgv ngam aadob roopaq maabv, hoo noqg Dvrwqbo Yalam ngoqg galoqkv naapaq maabv.

¹²Noqg ywwlinam hemp pam ngam jikur tvbv, hoo ngam hwrcw bo yal lvgab torl doog tvb.

¹³Ho nyimurbo tulungam noqg pagoq tulungam ngo tomswr tayin, hoo nyic nyinbo tulungv noqg gab hookur tayin.

¹⁴Pwnboa, ngam naalin tvb ywlw swtw twwnbo hoqgv, ngam ywwlin bo Pwnboa, hoo noqg jvqtwnam mam ngoqg lyolv vcjaqb bemin betayin.

¹⁵At Swa, ngoqg nvbcwr sam kuqko tvbv, hoo ngoqg agamv nam paqnam mam belin tayin.

¹⁶Hoggab no pwr jinam ho hemp maadwn, hvbmalo ham ngo jis dvlo; noqg boyuqnam pwr jinam lvgab xumt maadwn.

¹⁷Pwnbog xinam pwrv mwwkurnam yalv akv; mwwkur bvla mwwdwqnam hangam, Pwnboa, no ham haqpaqram.

¹⁸No xumt aldvb Jaiyonam aldvb nyijto; Jerusalemwg sulungam nwqrabto;

¹⁹hooxiq no jvqtw pwr jinam tulungam hemp tayin, ho boyuqnam aky tulungam hoo boyuqnam aky bumpwngam hemp tayin, ho svv hvvb tulungam noqg yugw ho pwr jita yukun.