Read Nyishi MWMIN NWSWR 55 Bible Online

MWMIN NWSWR 55 - Nyishi bible

MWMIN NWSWR 55

¹Pwnboa, noqg nyurungv ngoqg swgwnam sam tagab tvbv, hoo no atv tvmw mabka ngoqg aya mwwpa tvbwk hvl xumnam sam!

²Ngam tatbv, hoo ngam birwq tvbv; ngoqg supnam mam ngo hemo maab sup pudwn hoo ngo sigin dvn,

³ceebiog hur-matab dugam gab, nyicbog nyijab-nyiyab ko-gab. Hoggab bulv ngoqg aolo vs-axaqkam holwq mvdo, hoo bulv kacaq-bviyaql haaxaql ngam ceebio baqdo.

⁴Ngoqg hang urangv ngam vcjaqb mwwdwq dwqm do; sigwg bosv ngoqg aoho si holup paku.

⁵Bosv la tvmdwrnamv ngoqg aoho si haapa ku, hoo vcjaqb bosnamv ngam hwwlup paku.

⁶Hoo ngo bedwn, “Oa ngo pwk yobur ak hvb alap gvnyilokam al sudco! Ngo jarleq layil hoo doonu dvb;

⁷vvjaq, ngo aado jaqb gaqleqpan pv; ngo deexa-raraho dood nvpv;

⁸Doogum-dooiyv la nyodo taa, hoqgv ngo nyebia jaqb doonu ko ak meegaq dvnpv.”

⁹Twrto, At Swa, bulug lyol tulungam asaq-asaq mvmto; hoggab bulug bopam lo yolu-swcin bvla jwwnam-panam mam ngo kaado.

¹⁰Aal-aiyib bulv hoq sulu tulungam wiyiql doodo, hoo nyicv la vs-axaqkv hoq uralo doodo;

¹¹yuupaq sanamv hoq pengko ho doodo; nyijab-nyiyiq namla gwwlywnamv hoqg kwm-kor mvk nyook hoqgv wleq mata

¹²Soq si ngoqg ceebiongv ngam bej-bepar begam gabma soq sam ngo cwqdwb; soq si ceebio akma hiyv ngoqg lvgab xima dvb nyidwn ho ngo mwwg galoqkv kvs kuba nvp.

¹³Hvbmabde soq si no su, nyi akv, ngoqg homyinv, ngoqg pwbwb kaalaqnam dvpar ajinv,

¹⁴Ngulv lvkin gob tiiswrbo tomswr-honynam mam naadwn; ngulv nyi mvqlw lvgab Pwnbog nam uraho gaql yvnum.

¹⁵Sigam bulug aoho swaq holnam hvb hoa mvto; bulam tordwb Sux-ywlw nyookub imto; hoggab alman bongv bulug hang uraho la bulug doogw nyookho doodo.

¹⁶Hvbmabde ngo Pwnboam goqyikam, hoo At Sw ngam ywwlin tayin.

¹⁷Ariyum-aram hoo aal lvpangam ngoqg supnam mam ngo sup pudwn hoo sigin dvn, hoo mwv ngoqg yalam tapa dvn.

¹⁸Ngoqg nyob pak hoqgv mwv ngoqg yvjam swrso dvb pvlywnum, hoggab ngam ceebio baqnbov vigo hwwkum paku.

¹⁹Mwam otuq hoqgv lvpw at gob mvnum, Pwnbog nyurungv tagab tayin hoo bulam anyo dvb mvtayin, hoggab bulv kwly maado hoo Pwnboam bos maado.

²⁰Ngoqg ajinv mwwg alaqkam mwwg ajin tulug ceebiob irabnum; mwv mwwg pvvb birnam mam juqbonum.

²¹Mwwg agam goonamv yupaq twqdwb goonum, hvbsujaqkam mwwg hang lo nyob padwb mwwdwn; mwwg gomcwr tulungv kutiam nyinyiaq yaas do, hvbsujaqkam bulam lyoqr orioqkv padwn.

²²Noqg vgwngam At Swn jipaqto, hoo mwv nam torl doog tayin; mwv nywywngam jvqtw boam yuupaq mvdwb gvmbwq lengram.

²³Hvbmabde no, Pwnboa, bulam twrk ung urab joolwq tayin; ywlw twwn bov la xaalyo bo nyiv bulv swwdw tayin. Hvbmabde ngo nam mwwgwl dootayin.