Read Nyishi MWMIN NWSWR 59 Bible Online

MWMIN NWSWR 59 - Nyishi bible

MWMIN NWSWR 59

¹Ngoqg Pwnboa, ngoqg ceebio tulu hoqgv ngam naalin tvb; ngam ceebio baqrabo hoqgv ngam ceetor tvb;

²almab bonam nyinbo tulu hoqgv ngam naalin tvb; hoo ywlw swtw twwnbo nyi tulu hoqgv ngam ywwlin tvb.

³Hoggab kaato, bulv ngoqg swwgab tooiya yaal doodo; At Swa, ngoqg nyixaq-nyic doogam gabma, kwr-korbo nyiilungv ngam ceebio baql jwwdwb rarab do,

⁴ngoqg nyixaq maasu, hvbmabde bulv wl ngam mvdwb mwx-mvaq do. Huurabto, haag dvl ngam kao to, hoo kvvdy to!

⁵No, nyiit At Sw Pwnbov, Israelwg Pwnbov. No atv raarabto nyob mwlwngam laqm-baqmto; hiyv gwwlywl almab nyidwb mwwnam ham akjijaqkam apaq maabv.

⁶Ariyum riumxiam bulv hookur do, iky tulug oiyunam hvb oiyunv hoo bopam mam hubyiq keedo.

⁷Hoqho bulv, bulug agam hoqgv dugum gumlin do, bulug nvbcwr lvgab lyoqr orioqkam gamgab do— hoggab bulv mwwdo, “Hiyv,” “ngulam tapa tayin?”

⁸Hvbmabde, At Swa, no bulam nyirj dvn; no nyob mwlwngam nootul bej bepar to.

⁹Ngoqg Atora, noqg gab ngo kaaya tayin; hoggab, Pwnboa, no ngoqg gurumv.

¹⁰Ngoqg Pwnbov, mwwg tumab abynam hoqgv ngam kvvrwq tayin; ngoqg ceebio tulug aolo mviyanam mam Pwnbov ngam tuugab mvtayin.

¹¹Bulam mengmabv, hvbnyik baloqkam ngoqg nyiilungv mwwpa kuram; noqg huqlw hoqgv bulam dwqtup dvb mvto hoo bulam akob mvgeq loto, At Sw, ngulug svtamv!

¹²Hoggab bulug agam bece, bulug nvbcwrg gomcwr tulungv, bulam bulug larnamv nootu mvmto. Hoggab bulug beenam mvla vm mvvl goolinam hoqgv nootu mvmto,

¹³hang lengl bulam mvpaqto; bulam twryum nagub mvpaqto, ho swcw nvg ywwtwr nagub ho Jakubg aoho Pwnbov pvvb bwwl doogdvn ham bulam cengm to.

¹⁴Ariyum riumxiam bulv hookur do, iky tulug oiyunam hvb oiyunv hoo bopam mam hubyiq keedo.

¹⁵Bulv oyu yuudo hwdlo xumt dvb dvpa maaikam hoo bulv dvs gab gvqmwl yvdo.

¹⁶Hvbmabde, ngo noqg atoram bemin betayin; ngo ar komcam noqg ngam tumab abynam mam vcjaqb bemin betayin. Hoggab no ngoqg gurum akub nyidkun hoo vs-axaq aalho ngoqg cwwgw akv.

¹⁷Ngoqg Atora, ngo nam bemin begdvl paqtayin, noqgab, Pwnbov, ngoqg gurumv, Pwnbov su ngam tumanam abiam kaakin pan.