Read Nyishi MWMIN NWSWR 65 Bible Online

MWMIN NWSWR 65 - Nyishi bible

MWMIN NWSWR 65

¹Pwnboa, Jaiyon lo, nam paqdwb nyipa, hoo nam dingrnam tulungam nyij dukub nyipa ku.

²Vv no su swgwnam mam tanbov, noqg dookub nyi mwlwngv haatayin.

³Hwdlo ngoqg nyixaq kunamv ceebio baql mviya yin, no ngulug nyimuram ywqlyw dvn.

⁴Noqg xuqlayil hoo ogumb boanamv xinam jaqkv, noqg deela yabg ho doom dvb! noqg nammwg alnam mam, noqg dvrwqbo namlog dvrwq kwrwqnam mam ngulv xumt tayin!

⁵Swrdorxeq bon nyinam tulu hoqgv no ngulam jvqtw jaqn bo lvgab birwqpa, Pwnbov ngulam ywwlinam, swcw nvg ywwtwr soqg mwlwngv hoo sa-svlo ngvkam hingw dvn;

⁶hiyv akv mwwg ator hoqgv puutu tulungam pwlinum, ator hoqgv hwngkw jaqb daqm pakun;

⁷hiyv sa-svlog dugum-gumnam mam, issig suduq-duql dugum gumnam, nyiilug rumd-goqrnam mam cooikab doom do,

⁸hoqgab hiyv swcw nvg ywwtwr nagub doon bov noqg mux namho bosdvn. No ar komcam lengm dvb mvpa hoo ariyum mam hemp gab goqr romdo.

⁹No swcw si gaqnam hoo iss jinam; no koijaqb ham diibuq mvnam; Pwnbog pobungv issiv vigo doodwn; no bulam cwrm-malongam jido, hoggab soq sam no mwx-mvaql ap pakun.

¹⁰No issam hoq silamho naleqgo, ho hoq gamb ho bwwr nagub tompa, sam nyinyiaq dvb tooyaq pa, hoo sam swwm dvb lvqc cipa.

¹¹No vnyw nywpwngam noqg naleq hoqgv lvqc cipa; noqg gaari ho yuupoq-yuuloq dvb baqm dvn.

¹²Diixa-rara nyookv svding nwmw dvmin kov naleqdo, yorn yorxiv hempol doodo,

¹³Miipap talap nyookam sviya acam lvgab pomlup pa, haapa nyookam am lvgab oj gvm pan, bulv sogoql hoo lvkin gob hemp gab bemin bedo.