Read Nyishi MWMIN NWSWR 66 Bible Online

MWMIN NWSWR 66 - Nyishi bible

MWMIN NWSWR 66

¹Mwlwg swcwngv, Pwnboam hemp gab paqto;

²mwwg yuunam eminam bemin beto; mwam koijaqb yuunam mam paqb dvb jito.

³Pwnboam beto, “Hwdjaq go noqg bon nyinamv swrdorxeq do! Hoqgab noqg huqlwngv koijaq ko-gab noqg ceebio tulungv rintuml haad kun.

⁴Swcw mwlwngv nam xumdo hoo nam bemin bel paqdo; bulv noqg eminam bemin bel paqdo.”

⁵Haato hoo kaato hoggv Pwnbov nyipa kun: nyia kog kaagaho mwwg bon nyinamv swrdorxeq jaqdo.

⁶Mwv sa-svlongam pwtw bo ked hvb mukubnum; bulv pobungam lvpiab wpeqnum. Hoq aoho mwam ngulv hwnyir-hvmarnum,

⁷mwwg ator hoqgv nwrba gob pvvb bwwl doogdo, mwwg vnyiqkv nyob mwlwg aoho kaal doodo taleqbo tulungam bulam atam yuum suto.

⁸Nyiilunga, ngulug Pwnboam paqto; mwam paqnam yalam tapa mvmto,

⁹hiyv ngulug yvjam swwnbo pengko ho pvpa kun hoo ngulug lvpiangam duleql geqm jima pan.

¹⁰Pwnboa, noqgab, ngulam pooiyeq pakun; rupam jiqkanam hvb no ngulam jiqka pakun.

¹¹No ngulam wswq uraho boolwqnum; no ngulam langk lo vi baqla maanam mam joobaq jipan;

¹²no nyiilungam ngulug dumpo aob caataml wmpa; ngulv wm gvla issig pengkob wpeqnum; hvbsujaqkam no ngulam boolin layil naleqko nyookub boolwq pakun.

¹³Boyuqnam aky tulu lvgab ngo noqg nam urab haatayin; ngoqg nam dingrnam mam ngo nyitayin,

¹⁴hogloq ngoqg nvbcwrv goor kunum hoo hwdlo ngoqg vs-axaq yikho ngoqg agamv dingr kunam mam.

¹⁵Ngo nam jwwtw bo svdin tulungam boyuqnam aky tulub jitayin, yaap-tvmwr tulungam wm mwk lvgab pwr jitayin; ngo hvvbam la sibin tulungam pwr jitayin.

¹⁶Hiyv Pwnboam bosdvn, nul mwlwngv, haato hoo tato, hoo ngo betam tayin hoggv mwv ngoqg yvj gab nyij pakun.

¹⁷Ngoqg agam lvgab mwam ngo xabnum, hoo ngoqg lyol lo koijaqb paqnamv doonum.

¹⁸Ngoqg nyixaqkam ngoqg hanglo xinam gob mwwnyi loqkam, At Sw tapa maab nyikam banpv.

¹⁹Hvbmabde, jvqtw jaqb Pwnbov tapa pakun; mwv ngoqg swgwnam yalam tapa kunum.

²⁰Pwnboam paqyalinco, hoggab mwv ngoqg swgwnam mam haqpaq jima ho mwwg tumab abynam mam ngoqg hoqgv naapaq jima!