Read Nyishi MWMIN NWSWR 68 Bible Online

MWMIN NWSWR 68 - Nyishi bible

MWMIN NWSWR 68

¹Pwnbov gorab tayin, mwwg ceebio tulungam cwrsaq-bvraq twqb mvtayin; hoo hiyv mwam hang baqdwn mwwg kaaga hoqgv keleq tayin!

²Mwkv hoggub aadob juuxanam hvb, ho no bulam aadob ruqpaq tayin; wm agaho takinv hoggub jiqdwn hvbkalam nyic bov Pwnbog agaho nyiitayin.

³Hvbmabde, jvqtw bov hemp tayin; bulv Pwnbog agaho yuutayin; bulv hwnyir-hvmar lvgab mwwngam tayin!

⁴Bemin beto Pwnbon; mwwg eminam bemin bel paqto; hiyv diixa-rara lo wgbo akam bemin ak bijto; mwwg eminv At Sw; mwwg agaho yuuto!

⁵Abwb nyidwn ab doomabo gab hoo xwwmy tulungam ceetor bov Pwnbov mwwg dvrwqbo dookho doodwn.

⁶Pwnbov vp-cwkw boam imiq dvpar dook jidwn; mwv nyuum tulungam boolinl swwm-geem dvn, hvbmabde taleq bov deexa-rara nyookho doodwn.

⁷Pwnboa, hwdlo no noqg nyiilug otuqb wiyikho, hwdlo no deexa-rara ho wiyikho,

⁸Sinai puutu gvla Israelwg Pwnbo agaho, swcwngv hwqnum, doa toloqkv nyodongv toolnum.

⁹Pwnbov, naleqgo nyodongam hompa, nyoodo nyook lo no doonyium mam jinam; noqg yuupaq kunbo gumnam no nookur paku;

¹⁰noqg nyiilungv hoqho doogw ak kaapa paku; Pwnboa, noqg alko gab, no dwc-twwpw maanboam dvdwb jido.

¹¹At Sw gomcwram jido; dvn tulungv hiyv ham pui baqdwn bulv koijaqb xinamv:

¹²“Lvpw atwg nyemaq tulungv bulv kedo, bulv kedo!” Namho doonbo nyem tulungv keleqnam dupum-dvrab pam horpin-hora nyado

¹³nyega tulu nulv sviya pengko ho doos jaqkam yobur akwg gvvngam hoggub atwg alapv tomlup namhvb, bulam rupv la hunv tomlup pan.

¹⁴Hwdlo Pwnbov lvpw at tulungam cwrsaq-bvraqb mvikam, Jalmon aoho tapam mam yaql mvmdo.

¹⁵Pwnbog puutunga, Basan puutunga; vigo aobo puutunga, Basan puutunga!

¹⁶Vigo aobo puutunga, oyumnam lvgab no hoggab tuugab dvn, Pwnbog mwwg dookub mwwbynam puutu lo, vvjaq hogloq ho At Sw nwrba gob doogw tayin?

¹⁷Pwnbog Ceriot tulungv lwwyw camnyi go haanam, lwwyw aoho lwwyw yaag; At Sw bulug pengko ho doodo; Sinai si sija dvrwqbo namlob doodo.

¹⁸No nyuum tulungam boolayil, no ao gvda caagnum hoo nyi tulu pengko hoqgv lvqc cinam mam nvvrwqnam, benam tama bo pengko hookam, Pwnbo At Sw dooi nvpv.

¹⁹At Swn paqyalinco, hiyv aal looxiam ngulam svka dvn; Pwnbo ngulam ywwlin bov.

²⁰Ngulug Pwnbov ywwlin bov, hoo sig hoqgv naalinamv Pwnbo, At Sw gwj.

²¹Hvbmabde, hiyv mwwg nyixaq lamtab wdwn, Pwnbov mwwg ceebio tulug dumpo dum rvsab boam porc tayin.

²²At Sw benum, “Ngo bulam Basan hoqgv bookur tayin, ngo bulam sa-svlo ura hoqgv bookur tayin,

²³ho noqg lvpiangv bulug uiho caabiaq mvtayin, ho ceebio hoqgv noqg iky tulu lyolv bulug dvsam dvpa yinpv.”

²⁴Pwnboa, noqg buiya soonam mam kaapa paku, ngoqg Pwnbo, la ngoqg Lvpw atwg buiya soonam mam dvrwqbo nam uralo kaapa paku.

²⁵Otuqb bemin benbo tulungv, vtwr-anyab rwwxw-gungga mvnbo tulungv, ho bulug pengko ho nyijwr tulungv tamborin tulungam jwwdunam:

²⁶“Pwnboam nyi mvqlw dookumko ho paqnam, At Sw, no su Israelwg subuq buqlin kov!”

²⁷Benjamin, nyob luunyo ngvsu, hvbsujaqkam rad ab gob nyil wgdo, Judag lvpw atwg nyega kob bulug pengko lo, Jebulunwg lvpw atwg nyega kob, Naptalig lvpw atwg nyega kob nyil swwl doodo.

²⁸Pwnboa, noqg huqlwngam dvgoq goqa to; Pwnboa, no hogloq huqlw hoqgv ngul gab bonam nyij pakun.

²⁹Hoggab Jerusalemho noqg dvrwqbo namlongv doogam gab lvpw at tulungv nam aky bva jitayin.

³⁰Tobum bumtaqho svdin doon boam yolu ruqto, tuun-mee lvgab nyiilungam kam yolu ruqto. Hiyv kaabig kokwb paqdwn ham lvpia niikum ho caajab to; hiyv nyob padwb hwrcw bo nyiilungam cwrsaq-bvraq mvto.

³¹Albo xinam nyiilungv Ijipt hoqgv haatayin; Kusv nyebia jaqb Pwnbo gab mwnwg alaqkam gvvrwq tayin.

³²Swcw soq lvpw haty mwlwngv, Pwnbon bemin beto; At Swn paql bemin beto,

³³mwv doa tol hiyv wdwn, kolwg doa tol; kaato, mwv mwwg yalam dulin do, mwwg atorbo yalam.

³⁴Paqto Pwnbog huqlwngam, hiyvg yuunamv Israelwg aoho doodwn; hoo hiyvg huqlwngv doa ao tol doodwn.

³⁵Pwnbov mwwg dvrwqbo nam hoqgv swrdorxeq kam kaakin do; Israelwg Pwnbov mwv su hiyv akv huqlwngam la atoram mwwg nyiilungam jidwn. Paqnamv Pwnbo gab ka!