Read Nyishi MWMIN NWSWR 69 Bible Online

MWMIN NWSWR 69 - Nyishi bible

MWMIN NWSWR 69

¹Pwnboa, ngam ywwlin tvb! Hoggab ngoqg lwwgu nagub issiv hwwca paku.

²Hogloq ho lvpia svmgw ko dooma dvn, hoq kacbo suiyu uraho ngo yoqlwq paku; ngo iss ura jaqsi haapa ku, hoo diidwr issiv ngam tolup paku.

³Ngoqg xabnam hoqgv ngo nyelin paku; ngoqg lwwgungv taqc paku. Ngoqg Pwnbo gab kaaya yaanamv ngoqg vnyiqkv nyiqm paku.

⁴Ngoqg dumpo dummam koi yaab ngam pagoq doomab ceebio baqdo; ngam twrdy bo tulungv atorjaqpa, ngam mvdybo tulungv vm mvvdo. Ngo hoggv dvco maanam ham kam sija ngo jikur dukub nyiky paku?

⁵Pwnboa, no ngoqg nyiidam nammam ceng do; ngoqg almab nyinam tulungv noqg hoqgv kvs maadwn.

⁶Mwlwg Pwnbo At Swa, hiyv nam hingw dvn ham ngoqg hoqgv hvnyw dvb jimabv; Israelwg Pwnboa, hiyv nam meegaq dvn ham ngoqg soqgv ximab nyim jimabv.

⁷Hoggab soq si noqg pagoq gab ngo benyi-beyanam mam cwql doodwn, ho ximanamv ngoqg nyuqm mam pulup pakun.

⁸Ngoqg vbw-bor tulu gab ngo kooxnam nyi gob nyipa ku, ngoqg annwg ko tulu hoqgv ngo nyoodo nyiib nyipa ku.

⁹Hoggab noqg nam gab ngoqg hwrcwnamv ngam dvpaq paku, hoo nam benyi-beya tanam tulungv ngoqg ao si haapa ku.

¹⁰Hwdlo ngo xabnum hoo yanwl ngoqg yvjv dery reenam, hoq hvviya ngam benyi-beya dvb nyinum.

¹¹Hwdlo ngo tuila vjam ngoqg vj gob mviyikho, ngo bulug tob-tainam gob nyinum.

¹²Toggoq hoq doonbo tulungv ngoqg pagoqkam akinam gool doodo, hoo opo twwxum bov ngoqg pagoqkam bemin bedo.

¹³Hvbmabde At Swa, ngoqgab nyiloqkam, nam ngo swgwdvn. Pwnboa, noqg loorwqnam mood so, noqg vigo tumab abynam ho noqg dengkib ywwlinamv ngam goorwq tvb.

¹⁴Ngam naalin tvb kacbo suiyu ungngub yoqlwq tanam hoqgv; ngoqg ceebio tulu hoo iss ura hoqgv ngam naalin tukbv.

¹⁵Diidwr issam ngam dwrl wg mvmabv, ho ngam iss urab miqlwq mvmabv, ho ung urab ngam gomlup mvmabv.

¹⁶At Swa, ngam birwq tvb, hoggab noqg tumab abynamv aldvn; noqg naleqgo ayanam hoqgv, ngam kookur tvbka.

¹⁷Noqg nyuqm mam noqg nyera hoqgv kvs mabka; hoggab ngo vs-axaq do; ngam nyebia jaqb birwq tvbka.

¹⁸Ngoqg yvj ogumb hvvnwq gvdwl, ngam pvlyw tvb; ngoqg ceebio tulu soqgv ngam hiqlyw tvbka.

¹⁹Ngam benyi-beyanam mam, hoo ngam hvnyw moolw mvnam mam la ngam xima nammam no ceng do; ngoqg ceebio mwlwngam no cengl doodwn.

²⁰Benyi-beyanamv ngoqg hangam hom paku, hoqgab ngo mwwdwq dwqdu dvn. Ngo aya mwwpa kodwb kaagaqnum, hvbmabde ngo akam kaapa maanum, hoo bet-bela bo meegaqnum, hvbmabde ngo akam meepa maanum.

²¹Bulv ngam cumdwq kam dvs gob jinum, hoo ngoqg hvngwr gab bulv ngam pooxu opongam twwdwb jinum.

²²Hoqgab bulug agaho dvs-twws apnamv bulam atam ya potob hoqtu mvto; hoo hwdlo bulv swrsob dooiyin, hoqham gurw ak gob hoqtu mvto.

²³Bulug vnyiqkam nyiqm mvto, ho bulv kaapa kuram, hoo bulug gvvsam tvmdwr hwqdu twql doom to.

²⁴Noqg haaxaqnam mam bulug aoho lubyaqto, hoo noqg wm gudu bo hang lengnamv bulam gutin to.

²⁵Bulug svmcwngam oyum namgob nyimto; bulug doogw ko tuluho nyi akam doom mvmabv.

²⁶Hiyam no jwwtabnum ham hvraqb bulv mwam leen-parnam, hoo hiyam no un mvg kunum hoq vcam bulv goopal doonum.

²⁷Bulam laqm baqnam aoho laqm yaiyab baqmto; bulam noqg dook hoqgv asarb toxa maabv.

²⁸Swwl doonbo emin xeqnam kitap hoqgv bulam neepaq xaato; bulam jvqtw bo pengko lo emin xiqlwq mvmabv.

²⁹Hvbmabde, ngo dwqtwr-dwql hoo vc cidwn; Pwnboa, noqg ywwlinamv ngam aob aptvb.

³⁰Ngo Pwnbog eminam bemin lvgab paqtayin; ngo mwam paqyalinco paqnam lvgab yuum tayin.

³¹Soq si svb-svvngam ho vrrw gvnbo ham jinam mam laabo yaab At Swn xumt dvb mvtayin.

³²Hwdlo yanbov sam kaapa yin bulv hemp tayin; hiyv no Pwnboam meegaqbo tulungv, nulv hangv mwwdar tuku.

³³Hoggab At Sw dwc-twwpw maanboam tapa dvn hoo nyuum parl doognam mwwg atwg nyiilungam oyum maadwn.

³⁴Swcw-nyodongv, ho sa-svlo ura lo biin-tabn bo mwlwngv mwam paqto.

³⁵Hoggab Pwnbov Jaiyonam ywwlin tayin hoo Judag bopam tulungam mvdar tayin, hoo nyiilungv hoqho dootayin hoo ham naatayin;

³⁶mwwg nyera tulug ko hosiqkv ham otub nvvsiq tayin, hoo hiyv mwwg eminam aby dvn hv ho dootayin.