Read Nyishi MWMIN NWSWR 7 Bible Online

MWMIN NWSWR 7 - Nyishi bible

MWMIN NWSWR 7

¹Ngoqg Pwnbo At Swa, nam ngo cwwgw dvn; ngam ruqmin gvnbo nyemaq hoqgv ywwt ywwg dvl naalin tvb,

²hvbmab nyiloqkam bulv ngam sony nyotv puc-pui mvnam hvb mvtayin; bulv ngam habgab tvl seel wgtai, ho hiyv ak jijaqkam ruqpybo dooma.

³Ngoqg Pwnbo At Swa, soq sib ngo nyil, ngoqg alaqkv nyimur nyip kunyiloqkam,

⁴ngo ngoqg ajinam nyimur panyiloqkam ho ngoqg nyemaqkam pagoq doomab naalil naareq panyiloqkam,

⁵ngoqg nyemaqkam ngam ruqmin gvl ngam nootu mvto, ngoqg swwgam kedho ngam caajab mvmto, hoo ngoqg yvjam diimwr ho tvnwr dwrp mvto.

⁶At Swa, gorabto, noqg hang lengde ho; ngoqg ceebio tulug hang lengnam mam no atv daqrab gvdvl ceetor to; ngoqg Pwnboa, huurab to; pw-hwwdy sanam aalam no xil ap paku.

⁷Dookum bo nyiilungam ngoqg dookho hwwiyum tvl doomto; ho bulam no ao nyook hoqgv kaol bvvl doog to.

⁸At Sw nyiilungam pw-hwwd nv; ngam pw-hwwt bv, At Swa, ngoqg jvqtwngam la dvrwqb swwnam mam.

⁹Jvqtw jaqb Pwnboa, nyiig mwwnam henam mam cengnbo, no hwwkat, nyic-nyiabo mwlwngam twrmto, hvbmabde jvqtw boam swwm dvb mvto.

¹⁰Pwnbov ngoqg svtam-soruqkv, dvrwq hang baqn boam mwv ywwlin dvn.

¹¹Pwnbov jvqtw hvvkiv, hoo Pwnbov aal looxiam nyic boam mwwg hang lengnam mam kaatam dvn.

¹²Hiyvkam mwwkur kuma baloqkam, Pwnbo mwwg lyoqr orioqkam pwreq tayin; hoo mwwg illy lexangam tumdwr-tumpwr tayin;

¹³ho mwv ommiam morto lo nyumlwq dvn, ho uppuqkam dengdar dvn.

¹⁴Kaaka to nyic nyia nyinbov nyicig koam gvra duku, hoo hoq koam gvlayil xaalyo boam dwrbuqpa ku.

¹⁵Nyia kov ung roqdo, ura koggo dvb, hoo bulug atwg ung roqnamho atv ya holwq sudo.

¹⁶Mwwg nyixaqnamv mwwg at dumpo ho hookur sudo, hoo bulv atwg dumpo ho yolungam hoqpup sudwn.

¹⁷At Swn ngo paqyalinco hvl paqtayin, mwwg jvqtwko gab, mwlwngam koi yaanbo At Swn ngo bemin bel paqtayin.