Read Nyishi MWMIN NWSWR 71 Bible Online

MWMIN NWSWR 71 - Nyishi bible

MWMIN NWSWR 71

¹At Swa, noqg ho, ngo cwwgw dvn; ngam nywywngam hvnyw moolw mvmabv.

²Noqg jvqtw hoqgv ngam naalin tvb hoo ngam ywwlin tvb; noqg nyurungv ngam ruucw kwrgab tvb, hoo ngam ywwlin tvb!

³Ngoqg lwwn cwwgwb nyitbv, hoqb ngo lwxiam haatayin; ngam ywwlin mvdwb no gaml paapkun, hoggab no ngoqg lwwn la ngoqg gurumv.

⁴Ngoqg Pwnboa, nyicig alaq hoqgv, jvqtw maanbo la kwr-korbo nootunam hoqgv, ngam ywwlin tvb.

⁵At Swa, noqg ho ngo hingw dvn, At Swa, ngoqg nyijwr-yaapa hoqgv jaq nam ngo mwwgw dvn.

⁶Ngam dwr buqma daaiyik hoqgv ngo noqg aoho ywwgw pakun; annwg nvmmam hoqgv no su ngam naalin pan. Nam ngo paqngin maab paqtayin.

⁷Ngo vigo nyi tulug kaagaho swrdorxeq gob nyipa ku, hvbmabde no ngoqg atorbo cwwgwngv.

⁸Ngoqg agamv nam paql doodkun, hoo noqg yuunam mam aal loopwngam doom tayin.

⁹Ngoqg nyekam-xox moodam ngam haqpaq maabv; hwdlo ngoqg atorv wnya yukun ngam apaqmabv.

¹⁰Hoggab ngoqg ceebio tulungv ngoqg pagoqkam agam goodu do; hiyv ngoqg swwgam kvvsil doonbo tulungv lvkin gob hwwbam nyiado

¹¹hoo bedo, “Pwnbov mwam apaq paku; mwam ruqmin gvdwl nootu to, hoggab mwam ak jijaqkam ywwnbo dooma.”

¹²Pwnboa, ngoqg soqgv aado maabv; ngoqg Pwnboa, nyebia jaqb ngam svka tvb!

¹³Ngam bec-beya bo tulungam hvnyw moolw mvto hoo mvpaq tuku; hiyv ngam murm dvb meegaq boam bulam benyi-beyanamv la ximanam lvgab pulup mvto.

¹⁴Hvbmabde ngo lwxiam hingwl dootayin hoo nam koi-koi yaab paqtayin.

¹⁵Ngo noqg bon nyinam mam cingc kuma jaqkam, ngoqg agamv noqg jvqtw bon nyinam tulungam betam tayin, hoo aal loopwngam noqg ywwlinam bon tulungam paql dootayin.

¹⁶Pwnbo At Sw koijaqb bon nyinam tulu lvgab ngo haatayin; ngo bulam noqg jvqtwngam bepa tayin, noqg gamtwq.

¹⁷Pwnboa, ngoqg nyijwr-yaapa yuk hoqgv no ngam tomswr pakun, hoo ngo sija godab noqg swrdorxeq bon nyinam mam pui baqdwn.

¹⁸Ngo nyekam-xoxwl dum dumpu sujaqkam, hwdlo noqg atoram ngo ko hosiq akta betam maady deedib, hiyv haata boam noqg huqlwngam tomswr maady deedib, Pwnboa, ngam apaq maabv.

¹⁹Pwnboa, noqg jvqtwngv doa aongam cvvc do. No koijaqn bo bonam nyipa kun, Pwnboa, noq hvb hiyv doodwn?

²⁰No ngam vigo vs-axaqkam hoo dwr-kanongam kaapa mvdwb jipa, hvbsujaqkam ngam lokta swwrab mvtayin; swcw nvg ura hoqgv ngam lokta boolin tayin.

²¹Ngoq koiyib yuunam mam no vi yaiya dvb mvtayin hoo ngam lokta bet-bela tayin

²²Ngoqg Pwnboa, noqg dengky ko gab rwwxw lvgab ngo kam nam paqtayin; Israelwg Dvrwqbo Aka, nam ngo gungga lvgab bemin bel paqtayin.

²³Ngoqg nvbcwrv hemp gab goqr rotayin, hwdlo nam ngo bemin bel paqyikam; noqg pvlyw kunam, ngoqg yvjv kam nam paqtayin.

²⁴Hoo ngoqg lyolv noqg jvqtw svkanam mam aal loopwngam gool dootayin, hoggab hiyv ngam murm dvb meegaq boam bulam hvnyw moolw-har moosa mvpa kun.