Read Nyishi MWMIN NWSWR 73 Bible Online

MWMIN NWSWR 73 - Nyishi bible

MWMIN NWSWR 73

¹Jvqtw jaqb Pwnbov aldvn, Israelam la ho hiyvg hangv dvrwqdvn.

²Hvbmabde ngoq gab, ngoqg lvpiangv vcwr goda lo dwqtup tanum, ngoqg lvpia dwqkapv vcwr goda lo duleq tanum.

³Hwdlo ngo nyic bog nyet swwnam mam kaapanum ho ngo larn boam kaabynum.

⁴Hoggab bulv sinam xaqgub vc-apy dooma do; bulug gv ngv poot do hoo pumpiq miliqdo.

⁵Nyi asaqkv vs-axaqnam hvb bulv vs-axaqma; nyia ko asaqkv duqtwr duqnam hvb bulv duqtwr duqma.

⁶Hoqgab bulug larnamv bulug lwwpo lo gai gvnam hvb nyido; yolungv bulam vj hvb tomlup appa.

⁷Bulug vnyiqkv ox ko-gab goobur-goony do; bulug hanglo mwwc-mwwyangam mwmin twql doodo.

⁸Bulv benyi-beya bvla oyumnam agam mam goodwn; bulv nyijab-nyiyiqnv asaqkam bos belam dvn.

⁹Bulug agamv ao lvpwngam ceebiob gool doodwn, hoo bulug lyolv swcw nvg aoso larnam mam goodul doodwn.

¹⁰Hoqgab, mwwg nyiilungam bulug daiyab daqmin gvdo, hoo bulug ura lo nyixaqnam mam kaapa maadwn.

¹¹Hoo bulv bedwn, “Hoggub Pwnbo sam cengnyi tayin? Pwnbov sam cengnanv dood nvi yv?”

¹²Kaato, soq tulu si nyic bov; lwxiam bulv hentwr-kanyi hemab; bulv nyet nyet yaab swwdwn.

¹³Hog mwlwho ngoqg hangam dvrwq dvb pvvk namsi niqtuq dookma hoo danyib ngoqg alaqkam losuq suqsam tukba.

¹⁴Hoggab aal looxiam ngo duqtwr-duql doodkun, hoo ar roxiam ngam yolu ruqnum.

¹⁵Ngo benyiloqkam, “Ngo soq sib bes dvco,” Ngo noqg ko tulu hosiq-hosiqkam nyepin pingpaq panpv.

¹⁶Hvbmabde, hwdlo ngo sam hoggub cengtayin ham mwwdwk ho, soq si ngam nyila maanam bon gob kaapa mvmdo,

¹⁷hwdlo ngo Pwnbog namlo urab haanam gob ngo cengma nam; hoq kokwb ngo bulug nyitwr-nyinya tanam mam ceng xiqnum

¹⁸Jvqtw jaqb no bulam soj-mialapnam nyookho doom pan; no bulam duleql geql yuupaq mvdwb mvpa kun.

¹⁹Hog bvxeq vcwrko mood golo bulv twrn kun, vc loodab bosnamv bulam aadob mvpaq gvnkun!

²⁰Hwdlo nyi akv yuma maapel huurabnam hvb nyinba, At Swa, no hwdlo atv huurab yin, no bulam ig-oram mam oyum namhvb oyum to.

²¹Hwdlo ngoqg yvjam mwwdwq dvb mvnum, hwdlo ngoqg hangam kacaq dvb mvnum,

²²Ngo ceng maab kwr-korwb nyil dooyikho; ngo noqg kaagaho nyoro svdin hvb nyinum.

²³Hvbsujaqkam, ngo looxiam noqg lvgab dooba dvn; no ngoqg lvqbwq alaqkam nootul doogdvn.

²⁴No ngam lamta kaakinl tomswr-hony tvb, hoo kokwngam no ngam yuunam gob svgagvrwq tayin.

²⁵Ao lvpw tol ngoqgab hiyv doodwn, nootwq? Hoo swcw nvg aoso nam apaq pel ngo hog akam mwwby sanam dooma dvn.

²⁶Ngoqg gv aiyaq kvla hangv niqtuq dook maasjaqkam, hvbmabde Pwnbov ngoqg hangwg atorv hoo ngoqgab nwrba gob doodwn.

²⁷Hoggab kaato, hiyv noqg hoqgv aado dvn hv niipaq tayin; hiyv nyiv nam mwwjw maadwn bulam no twrm tayin.

²⁸Hvbmabde Pwnbo lwkw ho doonam si ngoqgab aldvn; Ngo Pwnbo At Swn ngoqg cwwgw gob mvpa kun, hoqgab ngo noqg bonam nyinam mwlwngam pui bekar tayin.