Read Nyishi MWMIN NWSWR 74 Bible Online

MWMIN NWSWR 74 - Nyishi bible

MWMIN NWSWR 74

¹Pwnboa, no hoggub ngulam nwrba gob joopaq gvi kun? Hoggub noqg haaxaqnamv wm mwk rvmxwqpan hvb noqg atwg sviya tulug nwmw-nwsin dvk rongongam ceebio gvi yin?

²Noqg nyiilungam mwwpa laka, hogloq ham no otuqcob rvpa kun, hogloq ham no pvlyw pan noqg gumn nyob hoolu gob doom dvb! Jaiyon puutungam mwwpa laka, hogloq ho no doonum.

³Nwrba cwtam gob yuupaqko ho no korlwqto; ceebiongv dvrwqbo namlog hog mwlwngam muiyu-mvca paku!

⁴Noqg ceebio tulungv noqg dookum ko nyook pengko ho dugum gumlin do; bulv bulug atwg nyij-muj tvkam tengl ap pan.

⁵Hiyv nyorog svvn tulungam vx lwwl panam hvb bulv nyido.

⁶Hoo svvda ho mwiyw-mvcnam mwlwngam bulv vxv la kvnyi lvgab vmwq yumgub pvmwql mvnam.

⁷Bulv noqg dvrwqbo namlongam wm tolwqnam; bulv noqg emin dook nyookam kac-tanyiaq dvb mvnum, ham ked ho caatin-caannin mvknum.

⁸Bulv atv atam benum, “Bulam ngulv nwwtin-nwwbal mviya looda tuj”; bulv gvda hoqg Pwnbog xumk nam mwlwngam wm parxanum.

⁹Ngulv ngulug muxnam tulungam kaapa kuma; nyiqry kaanbo akkam dookma, hoo ngulug pengko so hiyvkam cengma soq sib hog hwdgo nyidul dootayin

¹⁰Pwnboa, hog hwdgo soq sib ceebio tulungv benyi-beya tayin? Ceebio tulungam noqg eminam nwrba gob benyi-beya mvtayin yv?

¹¹Hoggub noqg alaqkam nootul doogdvn, noqg lvqbwq alaqkam? Noqg vj uraho cikwq-lvqlwqtvl doonam hoqgv laqlinto hoo bulam twrto!

¹²Kol galoqkv Pwnbov ngoqg Lvpw atv, swcw nvg aoso ywwlinam bonam nyidul doodo.

¹³No sa-svlongam noqg ator hoqgv mwrpin sunum; no sa-svlog iss urag bur dumpongam jwwdubnum.

¹⁴No Dooji-burwg dumpongam vmwq yumgub mvnum; no mwam nyorog svdin tulug dvs gob jinum

¹⁵No wlwngam porcil iss subuqkam la iss kucw tulungam biqlin mvnum; no iss tol dooky bo pobungam pwtw-rwbw dvb mvnum.

¹⁶Aal si noqgv, ai siikam noqgv; no doa aog huto ngamla doonyiam bvl pwlinum.

¹⁷No swcw nvg ywwtwram mwrwl appan; no dwram la dvrangam bvl pwlin pan.

¹⁸At Swa, sam mwwpa to, hoggub ceebio tulungv benyi-beyanam, hoo nyiidam bo nyiilungv noqg eminam benyi-beyanam.

¹⁹Noqg yvjwg pwk yoburam nyoro svdinam gvqlwq maabv; noqg jwwgwbo nyi tulug swwgam nwrba gob mwwpa maab nyimabv.

²⁰Pvvb mwrnam mam mwwpa keela ka, hoggab gvdag kanbo nyook mwlw si yolu-swcin rooxo bongv doodo.

²¹Nyijab-nyiyiqnam nyiilungam hvnywl wkur mvmabv; jwwgw boam la dwc-twwpw maanboam noqg eminam paqmto.

²²Daqrabto, Pwnboa, noqg pagoqkam ceetor to; mwwgabto hoggub nyiidam bo ceebio tulungv aal loopwngam nam benyi-beya do!

²³Noqg ceebio tulug sogoq goqnam mam mwwpa maab nyimabv, nam ceebio baqrabl rumd goqrnamv aob coodul doodo!