Read Nyishi MWMIN NWSWR 77 Bible Online

MWMIN NWSWR 77 - Nyishi bible

MWMIN NWSWR 77

¹Ngo Pwnbon sogoql xabnam, Pwnbon sogoql xabnam, hoo mwv ngam tapa tayin.

²Vs-axaq moodam ngo At Swn meegaq dvn; aiyam ngo vcwr gokam nyelin maab ngoqg alaqkv yamganum; ngoqg yvjv jampam haqpaq dvn.

³Hwdlo ngo Pwnboam mwwpa yin, ngo sigin dvn; ngo mwwdy lalal mwwka yin, ngoqg yalv sitab dvn.

⁴No ngoqg vnyiqkam nyiqbiol doom do; ngo vs-axaqnum hoqgab ngo agam goony kuma.

⁵Ngo otuqg aal tulungam, wnkun vnyw tulungam mwwpa do.

⁶Ngo benum, “Aiyam ngoqg beminam mam ngam mwwpa mvtbv; ngoqg hangam ngam mwwdy lala mwwka mvtbv.” Ho ngoqg yalv kwrwjaqb meegaq dvn:

⁷“At Sw nwrba gob haqpaq pak nvi yv, hoo nywywngam lokam mwwsw kuram yv?

⁸Mwwg tumab abynam mam nwrba xaqb nyinkun yv? Mwwg dingrnam mwlwngv kol xaqb dookram yv?

⁹Pwnbov anya mwwpanam mam mwwpa kuma dvn yv? Mwwg haaxaqnamv mwwg aya mwwpanam mam kuqtum pak nvi yv?”

¹⁰Ho ngo benum, “Ngo soq sam kotayin, Pwnbog lvqbwq alaqg vnyw tulungam.”

¹¹Ngo mwwpa tayin At Swg bon nyinam mwlwngam; vvjaq noqg kolwg swrdorxeq mwlwngam ngo mwwpa tayin.

¹²Noqg bon mwlwngam mwwdy tayin, hoo noqg koijaqb bonam mwlwngam hwwka tayin.

¹³Pwnboa, noqg lamtangv, dvrwqdo. Hoggoq pwnbov ngulug Pwnbo hvb koidvn?

¹⁴No su Pwnbov hiyv swrdorxeq nyis mwlwngam nyidwn; nyiilug pengko lo no noqg atornam mam cengmnum.

¹⁵Jakub gvla Josap gv ko hosiqkam, noqg laqpo ator lvgab noqg nyiilungam pvlyw pakun.

¹⁶Pwnboa, hwdlo iss swnyiqkv nam kaaikam, hwdlo iss swnyiqkv nam kaaikam, hoq mwlw si bosnum; benjaqjaq baloqkam sa-svlo ura mwlwngv tvmdwrnum.

¹⁷Doomwq tulungv nyodo issam toolnum; doa toloqkv doogum gumlinum; noqg uppuqkv taqg-loosaqb bioqlinum.

¹⁸Noqg doogum buqkonamv cwkeq-lemeq dooiho doonum; noqg taiyam bioqmnamv gvda gvtwb bioqunum; swcwngv tvmdwrl hwqdinum.

¹⁹Noqg lamtangv sa-svlo lvpa wpeqnum, noqg lamtangv iss ura jaqn bo hookam wpeqnum; hvbsujaqkam noqg lvlam mam kaapa maanum.

²⁰No noqg nyiilungam sviya ak hvb Mojes la Aaron gv alaqho bool wg mvnum.