Read Nyishi MWMIN NWSWR 78 Bible Online

MWMIN NWSWR 78 - Nyishi bible

MWMIN NWSWR 78

¹Ngoqg nyiilunga, ngoqg tomswrnam sam, ruucw kwrgabto; nulug nyurungv ngoqg gomcwr tulu sam ruucw kwrgabto!

²Dooiyw-doocam ngoqg agamv berab tayin; ngo kolwg kvsnam ura niitin tinam mam tingrab tayin,

³hognvk pagoqkam ngulv tatkun hoo cengtkun, hogloq ham ngulug ab tulungv ngulam betam kunum.

⁴Ngulv ham bulug ko tulu hoqgv kvsram; hvbmabde haata bo hosiqkam At Swg, mwwg koijaqb swsw-saab yuupw dvb bon nyinam mam, hoo mwwg swrdorxeqb bon nyinam mwlwngam betamto.

⁵Mwv Jakub aoho mwwg nyinam mam mvkonum, hoo Israel aoho pvvbam jinum, hoqham bulug ko tulungam tomswr mvdwb mwv ngulug ab tulungam gaml jinum,

⁶haata bo hosiqkam, dwrbuqma tanam ko tulungam soq sam cengmto, hoo swwrab layil bulam bulug ko tulungam betam tvmsiq mvto,

⁷hoqgab bulv bulug hingwngam Pwnbog aoho ap dvb nyitayin hoo Pwnbog nyis mwlwngam mwwpa maab nyiram, hvbmabde mwwg pvvb mwlwngam pvvtayin,

⁸hoo bulv bulug ab tulug nyinam hvb nyidwb nyiram, tamy gvi hoo tvjw maanbo ko hosiqb hvb nyiram, hiyvg hosiqg hangv hwngkw maanum, hiyvg yalv Pwnboam mwwjw maanum.

⁹Iprayim nyiilungv illy-uppuq lvgab mwx-mvaqnum, hvbmabde nyob pad aalho wkur kunum.

¹⁰Bulv Pwnbog pvvb mwrnam mam pvvl ap maanam, hvbmabde mwwg pvvb mvkjaqb wdwb mwwmanum.

¹¹Bulv mwwg bonam nyinam mwlwngam hoo swrdorxeq gob bulam mwwg kaakin kunam mam mwwpa kumanum.

¹²Bulug ab tulug vnyiq kaagaho mwv Ijipt nyook hoola Joan gv rongo rwqtaqho swrdorxeq bon nyinam mam kaakinum.

¹³Mwv sa-svlongam pwtw dvb mwrpin sutwl hoo bulam hoqb wpeq mvnum, hoo issam cwqc hvb daqdwb mvnum.

¹⁴Aal moodam mwv bulam doomwq lvgab bool wgnum, hoo ai yupwngam wm moily bioqnam huto lvgab wgnum.

¹⁵Mwv diixa-raraho wlwngam jwwdinum hoo twwsam bulgab naleqgo ura hoqgv iss toolin namhvb toolin mvdwb jinum.

¹⁶Mwv wlw hoqgv iss kucwngam toolin mvnum hoo issam pobu tonam hvb toolin mvdwb mvnum.

¹⁷Hvbsujaqkam bulv hvraqb vi yaiya go mwam ceebio baql nyic nyinum, Pwnboam diixa-raraho ceebio baql tvjw maab nyinum.

¹⁸Bulug hang mwwbil dwnw-twwnwnam mam bulv Pwnboam bulug hanglo pooka-yirkanum.

¹⁹Bulv Pwnboam ceebio baql agam gool hvl bedo, “Pwnbov diixa-raralo dvs-twwsam mwx-mvaq jinyi jaqtayin yv?

²⁰Mwv wlwngam jwwdin tvl issam xulinl hoo iss kucwngam iss rooxo mvnum. Mwwg nyiilu gab mwv wtw ngamla vdinam kam jinyi jaqtayin yv?”

²¹Hoqgab, hwdlo At Sw sam tapa tvl, mwv hang lingtwr-twryanum; Jakubn ceebio baql wm rwlwqnum; mwwg haaxaqnamv Israelam ceebiob daqrabnum,

²²hoggab bulv Pwnboam mwwjw maado hoo mwwg huqlw hoqgv ywwlinam mam mwwgw maado.

²³hvbsujaqkam mwv doa nvg aongam gaml jinum hoo ao lvpwg viyap pam ciqko mvnum,

²⁴hoo dvmdvb mwv maanangam nyodo honam hvb hol mwjnum hoo bulam ao lvpwg cwrm-malongam jilnum.

²⁵Nyia kov ao gumtw tulug wtwngam dvnum; mwv bulam naleqgo dvsam jilnum.

²⁶Mwv dou-cagag dooiyam doa aob yimdvb jinum, hoo mwwg ator hoqgv ako daiyag dooiyam wgnum;

²⁷mwv diimwr jaanam hvb bulug aoho vdinam jaa mvnum, sa-svlo xuqx hvb pvtangam yaqp jinum;

²⁸mwv hoq tulu ham bulug svmcw pengko ho yaqp mwjnam, bulug bviywr-bvcar dook mwlwho.

²⁹Hoo bulv dvnum hoo xumt dvb dvdeq kunum, ho mwv bul hoggv mwwbil dvnwnam mam bulam jinum.

³⁰Hvbmabde bulv bulug mwwbynam mam xumt maatab, bulug agamlo nyanyiam boqdu yukho,

³¹Pwnbog haaxaqnamv bulam ceebio baqrabnum, hoo bulug pengko ho mwlwngam ator yaan boam mwv mengnum, hoo Israelwg yaapa tulungam mvpaq kunum.

³²Soq hog mwlw si nyiskujaqkam, bulv hvraqb nyic nyinum; mwwg swrdorxeq nyinam mwlwngam haqpaq do, bulv mwwjw maanam.

³³Hoqgab mwv bulug aal mwlwngam svqyi-saqcanam hwiyw gob mvpaq kunum, hoo bulug vnyw tulungv bos namgob nyiknum.

³⁴Hwdlo mwv bulam mengnum, bulv mwam meegaqnum; bulv mwwkurnum hoo Pwnboam vcjaqb meegaqnum.

³⁵Pwnbon bulug lwwn gob, koibo Pwnboam bulam pvlyw bob bulv mwwpanum.

³⁶Hvbmabde bulv mwam bulug agam lvgab biyuq-bemaqnum; bulv mwam bulug lyol lvgab vm mvnum.

³⁷Bulug hangv mwwg daiyab hwngkw maanum; bulv mwwg pvvb mwrko ho doomanum.

³⁸Hvbsujaqkam mwv, aya mwwpanam hoqgv bulug nyimuram apaq jinum hoo bulam twrm mvmanum; mwwg lwxiam haaxaqnam mam mwv mvturnum, hoo mwwg hang lingtwrnam mwlwngam rarab mvmanam.

³⁹Mwv bulam gv vdin nwtwq hvl mwwpanum, dooiyv ywpaq dvn hoo lokta hookur kuma dvn.

⁴⁰Hog hwdgo bulv lwxiam mwam diixa-raralo ceebio baql tvjwmab nyinum hoo mwam diixa-raralo mwwdwq dwqmnum!

⁴¹Bulv nyitin nyitinl Pwnboam pooka-yirkanum hoo Israelwg Dvrwqbo Akam biluqnum.

⁴²Bulv mwwpa kumanam mwwg huqlwngam hwdlo aalho mwv bulug ceebio hoqgv bulam pvlywnum.

⁴³Hwdlo Ijipt lo mwwg kvvnyir-tamar mwlwngam hoo mwwg swrdorxeqkam Joan gv rongo ho mwv nyinum.

⁴⁴Mwv bulug pobungam ywlw swtw gob mvnum, hoqgab bulv bulug pobu hoqgv iss twwny kumanum.

⁴⁵Mwv bulug pengko ho temiq-toyup pam kanamnum tvl bulam cem-gamnum, hoo tvtwq tulungv bulam kac-kanyiaq dvb mviyaq-mvcaq mvnum.

⁴⁶Mwv bulug rongo am-temiam hoo bulug bon nyijo aaxy tulungam komar takam mam dwtwr mvdwb jinum.

⁴⁷Mwv bulug roo boolungam nyodo taa lvgab mingtwrnum hoo bulug taoq svvnam tapam lvgab mingtwrnum.

⁴⁸Mwv bulug tuun-meengam nyodo taa-ngam hox mvdwb jinum hoo bulug sviya tulungam doogum-taiyamb bioqox mvnum.

⁴⁹Mwv bulug aoho mwwg wm gunam hvb haaxaqnam mam, hang lingtwrnam mam, hang lengnam mam, hoo hentwrnam mam, twrm dvb mvnbo gumtw acam mam tolwqnum.

⁵⁰Mwwg haaxaqnam hoqgv mwv lamta ak ruunum; mwv bulam sig hoqgv kvxaq mvram, hvbmabde bulug swwca lo iicw-tobum dooiyam jilwqnum.

⁵¹Mwv Ijipt nyook lo otuqcob ko bwwconam vxiam mengxanum, Hamwg doogw hoqg bulug otuqcob aaxy-amar ator torgw nannam mvxianum.

⁵²Hoq kokwb mwv mwwg nyiilungam sviya hvb boolinl wgnum hoo bulam diixa-raraho sviya acam hvb rool wgnum.

⁵³Mwv bulam cumciqkob wgnum, hoqgab bulv bos maanam; hvbmabde sa-svlongv bulug ceebio tulungam tolupnum.

⁵⁴Hoo mwv bulam mwwg dvrwqbo gvda lo boolinum, hogloq puutu ham mwwg lvqbwq alaqkv naapkun.

⁵⁵Mwv nyob asaqkam bulug aga hoqgv ruqpaq jinum; mwv bulam gumn bwwsiq mvdwb jinum hoo Israelwg nyob tulungam bulug doogw ko ho doomnum.

⁵⁶Hvbsujaqkam bulv hvraqb Pwnboam ceebio baql pooka-yirkanum hoo mwwg nyil kaakinam tulungam pvvl ap maanam,

⁵⁷hvbmabde bulug ab tulug nyinam hvb mwwjw maab hoo wkurnum; bulv illy dwrxoqbo hvb nyinum.

⁵⁸Hoggab bulv mwam haaxaq dvb nyiluqnum bulug nyook koi boam xumnam lvgab; bulv mwam kaaneq dvb bulug murty lvgab nyinum.

⁵⁹Hwdlo Pwnbo tapanum, mwv hang lingtwr-twryanum, hoo mwv Israelam haqpaq loodanum.

⁶⁰Mwv mwwg dook Silo nyookam, nyia ko rolug pengko ho doogwngam apaq kunum,

⁶¹hoo mwwg huqlwngam nyuum mam gvqlwq jinum, mwwg yuunam mam ceebiog alaqho jipaqnum.

⁶²Mwwg nyiilungam mwv lyoqr orioq niqtuqb jilwqnum hoo mwwg hang lingtwrnam mam mwwg gumn aoho jipaqnum.

⁶³Bulug yaapa tulungam wmv gutwrnum, hoo bulug nyijwr tulungv nyem wikam nyem xabnam mam xapa kuram.

⁶⁴Bulug nyub tulungv lyoqr orioq niqtuqb yoqlwqnum, hoo bulug xwwmy tulungv nyix-riimanum.

⁶⁵Ho At Sw yubnam hoqgv huurabnum, mwlwngam ator yaanbo nyiv opo twwxum pel sogoq goqkarnam hvb nyidwn.

⁶⁶Hoo mwv mwwg ceebio tulungam adar-apar mvma dvb mvdwn; mwv bulam kuiyum xaqb hvnyw moolw mvdwn.

⁶⁷Mwv Josapg doogwngam haqpaqnum; mwv Iprayim nyob hoolungam xuqmanum;

⁶⁸hvbmabde mwv Juda nyob hoolungam xuqnum, Jaiyon puutungam, mwv aby dvn.

⁶⁹Mwv mwwg dvrwqbo namlongam doa ao tvb ao dvb mvnum, swcw sib nwrba gob biima dvb mwv mvnum.

⁷⁰Mwv Debidnvn mwwg nyera gob xuqnum hoo mwam xuqlin pan sviya rvkybo dvpar hoqgv naalinum;

⁷¹mwam sviya anyo bo tulungam hoqgv mwwg nyiilu Jakubnvn sviya rvky bob, Israelam mwwg gumn gob mwv boolinum.

⁷²Mwv dvrwqbo hang lvgab bulam kaal yvgnum hoo mwwg ywrtaqnam albo alaq hoqgv bulam nyiswrl yvgnum.