Read Nyishi MWMIN NWSWR 80 Bible Online

MWMIN NWSWR 80 - Nyishi bible

MWMIN NWSWR 80

¹Ruucw kwrgab tvb, Israelwg rvky boa, no Josapnvn sviya dvpar hvb rool wg bov! No su cerubim aoho doodwn, huto huulin to.

²Iprayim hoo Benjamin hoo Manasse agaho, noqg atoram torabto hoo ngulam haal ywwlin tvb!

³Pwnboa, ngulam mvdar tukub; noqg nyuqm mam huumto, ho ngulam ywwlin tvb

⁴Mwlwngam Pwnbo At Swa, hog hwd oyu go noqg nyiilug swgwnam mam no haaxaq tayin?

⁵No bulam nyiqs-tanap wtw lvgab dvm paku, hoo bulam nyiqs sam vcjaqb twwm paku.

⁶No ngulam ngulug door-doopwngv haqpaq dvb mvnam, hoo ngulug ceebio tulungv bulug pengko lo nyirjnam.

⁷Pwnboa, ngulam mvdar tukub; noqg nyuqm mam huumto, ho ngulam ywwlin tvb!

⁸No Ijipt hoqgv roo pvbw bwwg baqanum; no nyob nyiam ruqpaq tvl hoqham liilwqnum.

⁹No hoqham liid ko kedam mvxaqnum; hoqhv ura jaqb mvmiangv meelwqnum hoo nyookam tvpwnum.

¹⁰Yorn puutu mwlwngam hoqg doonyium lvgab tomlupnum, ho hoqg haqb lvgab sidar svvn nwwtbo mwlwngam lyomlupnum.

¹¹Hoq haqbv sa-svlo nagub, hoo hoq jurlin bo okv iss pobu nagub tamlinum.

¹²Hvbnyiloqkam hoggab no hoqg sulungam sapia pakun, ho hiyv xeq hoq lamtab wpeq bo mwlwngam hoggab hoq aaxiam pum gvdwn?

¹³Nyorog svrv hoq aaxiam domyu-damca do, hoo rongob wpeq bo mwlwngv hoq aaxiam dvmin duku.

¹⁴Mwlwngam Pwnboa, lokta nywwkur to! Ao lvpw hoqgv kaababl, hoo kaato; soq roo pvbw pagoq gab mwwkato,

¹⁵noqg lvqbwq alaqkv liitwl pvvcumnam sam, hoo noqg hogloq ko tuupam no atv ator dvb mvknum.

¹⁶Bulv sam wm lvgab parpa ku, bulv sam patab paku; bulam noqg yolu ruqn nan nyuqtuq-moor hoggv yuupaq mvto!

¹⁷Hvbmabde noqg lvqbwq alaqho doonbo nyia kog aoho noqg alaqkv cegabto, nyia koam ham no atv atgab ator dvb mvpa kun.

¹⁸Ho ngulv noqg hoqgv wkur kuram; ngulam swwgam jitwb, hoo ngulv noqg eminam goqtayin.

¹⁹Pwnboa nyiit At Swa, ngulam mvdar tukub! noqg nyuqm mam huumto, ho ngulam ywwlin tvb!