Read Nyishi MWMIN NWSWR 86 Bible Online

MWMIN NWSWR 86 - Nyishi bible

MWMIN NWSWR 86

¹At Swa, noqg nyurungv ruucw kwrgab tvb, hoo ngam birwqtvb, hoggab ngo jwwgw bvla dwc-twwpw maab nyidwn.

²Ngoqg swwnam sam pvvcuml apto, hoggab ngo dormo nyiingv; noqg nyerangam ywwlin tvb, hiyv nam mwwgw dvn no ngoqg Pwnbov,

³ngam anya mwwpa tvb, At Swa, noqgab ngo aal loopwngam xabl doodwn.

⁴Noqg nyerag yvjam hwnyir-hvmar dvb mvtwb, At Swa, noqgab ngo ngoqg yvjam joorab gviyin.

⁵At Swa, no su albov hoo apaq jinbov, nam goqnbo mwlwngam aoho noqg tumanam abiam naleq mvdwn.

⁶At Swa, ruucw-kwrgab tvb ngoqg swgwnam sam; ngoqg anya gab konam sam tagab tvb.

⁷Ngoqg vs-axaq aalam nam ngo goqdwn, hoggab no ngam goorwqdvn.

⁸At Swa, asaq pwnbog pengko ho noq hvb nyinbo akjaqkam dooma, ho noqg nyis tulungam nyin hvb nyinbo dooma.

⁹Noqg pwnam nyob nyi mwlwngv haatayin hoo noqg agaho xumtayin, At Swa, hoo noqg eminam yuum tayin.

¹⁰Hoggab no koijaq dvn hoo swrdorxeq nyimanam mwlwngam nyido; no twq aro Pwnbov.

¹¹At Swa, noqg lamtangam ngam tomswr tvb, ho ngam noqg jvqtw lamta ho wm tvb; ngoqg hangam haakin mvtbv noqg eminam bos mvdwb.

¹²Ngoqg hvvjw-haara lvgab, nam ngo paqyalinco paqdwn, ngoqg Pwnbo At Swa, hoo noqg eminam ngo nwrba gob yuum tayin.

¹³Hoggab noqg tumab abynamv ngoqg daiyab koijaqdo; no Sux-ywlw nyook ura hoqgv ngoqg yvjam naalin pakun.

¹⁴Pwnboa, dooxa-daqyabo nyiv vigo ngam ceebio baql daqrab do; kwr-korbo nyiilungv ngoqg swwgam rukar do, hoo bulv nam bulug agaho pvvma dvn.

¹⁵Hvbmabde no su, At Swa, aya mwwpa gvi hoo anya mwwpa bo Pwnbov, haaxaq xaqla maadwn hoo naleqgo tumanam abiam la dengkynam mam jidwn.

¹⁶Ngam nywwkur gvdwl hoo ngam anya mwwpa tvb; noqg atoram noqg nyerangam jitbv, hoo noqg paqn tulug kongam ywwlin tvb.

¹⁷Ngam kaakin tvb noqg mwwswnam mam, ho hiyv ngam ceebio baqdwn ham kaatwl hoo hvnyw moolw mvmto, hoggab no su, At Swa, ngam svkanum hoo bet-belanum.