Read Nyishi MWMIN NWSWR 89 Bible Online

MWMIN NWSWR 89 - Nyishi bible

MWMIN NWSWR 89

¹At Swg tumab abynam mam, ngo nwrba gob bemin betayin; noqg dengkynam mam ko hosiq-hosiq mwlwngam ngoqg agam hoqgv ngo betaml cengm tayin.

²Hoggab ngo bedwn, “Tumanam abiam nwrba gob mvl ap tayin; doa tolo noqg dengkib nyinam mam no mvl aptayin.”

³No bel ap paku, “Ngoqg xuqlinam akwg lvgab ngo pvvbam pal ap pakun; ngoqg nyera Debidnvn ngo dingr tukun:

⁴‘Ngo noqg ko hosiqkam nwrba gob doom jitayin, hoo noqg pwqlw dootam mam ko hosiq-hosiq gab mvl ap tayin.’ ”

⁵At Swa, doangam noqg swrdorxeqb nyinam mam, ho dvrwqbo tulug dookumko ho noqg dengkynam mam paqmto!

⁶Doa ao tolo hiyv At Swg simp-taql doodwn? Ao lvpwg swwn bo pengko toloqkv hiyv At Swg hvb nyidwn,

⁷Koijaqb bosnam Pwnbo ak dvrwqbo tulug dookumko ho doodwn, hoo mwam hwwiywql doonbo mwlwg pengko hoqgv mwv bosnam akv?

⁸Nyiit Pwnbo At Swa, hiyv noq hvb ator dvn, At Swa, noqg dengkynamv nam taqg-loosaqb hwwiyiq do?

⁹No sa-svlo lumnam mam bvvl doodo; hwdlo hoq iss lumca yin no ham mvmab do.

¹⁰No Rahabnvn sootwq twqnam hvb twqminum; noqg ceebio mwlwngam no cwrsaq-bvraq twqb noqg laqpo ator hoqgv mvpaqnum.

¹¹Doa tv noqgv, swcw siikam noqgv; gvda gvtam la hoq uraho doonbo mwlwngam, hog mwlwg gwwlam no mvpa kun.

¹²Nyoodum mam la nyookongam, no ham pwlin pan; Tabor la Harmonv hwnyir-hvmarl noqg eminam paql doodo.

¹³No laqpo atorbo ak doodwn; noqg alaqkv ator dvn, noqg lvqbwq alaqkv laqso dvn.

¹⁴Dvrwq kvla jvqtwngv noqg pwqlw dootam hoqg dvqgwngv; tumanam abiv la dengkynamv noqg otuqb wdwn.

¹⁵Hiyv nyiilungv durum goqram tapal cengdwn hv xinam jaqkv, hiyv wdwn, At Swa, noqg nyuqm huto ho,

¹⁶hiyv aal loopwngam noqg eminam hwrcwb paql doodwn hoo noqg dvrwqnam tuluho yuudwn.

¹⁷Hoggab no bulug ator yuunamv; noqg mwwsw ko-gab ngulug vrrwngam aob yuumnam.

¹⁸Hoggab ngulug svtamv At Sw galoqkv, ngulug lvpw atv Israelwg Dvrwqbo Akv.

¹⁹Nyiqry kaakil noqg dvrwqbo akam otuqho no agam goonum, hoo benum: “Hiyv akv ator dvn ngo svkangam jitkun; nyiilug pengko hoqgv xuqlinam akam ngo yuum pakun.

²⁰ngoqg nyera, Debidnvn ngo kaapa tukul; ngoqg dvrwqbo kuty lvgab ngo mwam piaqt kun,

²¹ho ngoqg alaqkv mwwg lvgab nyimin gvdwb; ngoqg laqpo ngvkam mwam ator jitayin.

²²Ceebiongv mwam tengbin yaaram; nyic bov mwam munyiub nyoram.

²³Ngo mwwg ceebio tulungam mwwg agaho vmwq yumgub mvtayin hoo hiyv mwam oyum dvn ham jwwtab tayin.

²⁴Ngoqg dengkynamv la ngoqg tumab abynamv mwwg lvgab dootayin, hoo ngoqg emin hoqgv mwwg vrrwngam aob yuum tayin.

²⁵Ngo mwwg lvqbwq alaqkam iss pobu mwlwg aoho hoo mwwg alaqkam sa-svlo aoho laqp mvtayin.

²⁶Mwv ngam xabtayin, ‘No ngoqg Abv, ngoqg Pwnbov, hoo ngam ywwlin bo lwwn pwtv.’

²⁷Hoo ngo mwam otuqcob dwrbuqnam ko gob, swcw nvg aoso mwlwngam koi yaanbo lvpw at tulu gob mvtayin.

²⁸Ngoqg tumab abynam mam mwwg gab nwrba gob ngo pvvj tayin hoo ngoqg pvvbv mwwg gab biimab daqtayin.

²⁹Doa nvg aalv doody deedib mwwg pwqlw dootam mam hoo mwwg ko hosiqkam nwrba gob ngo doom tayin.

³⁰Mwwg ko tulungv ngoqg pvvbam apaq baloqkam hoo ngoqg pvvb tuluho wma baloqkam,

³¹bulv ngoqg birnam mam tama baloqkam hoo ngoqg gamlam pvvma baloqkam,

³²ho ngo bulam dvvcw lvgab bulug nyimuram laqm-baqm tayin hoo bulug nyixaqnam mam vbwq-vbwq bwqdwb jwwtayin,

³³hvbmabde ngoqg tumab abynam mam ngo mwwg hoqgv naaxaram ho ngoqg dengkynam mam vm mvvram.

³⁴Ngoqg pvvbam ngo mvpiaram ho ngoqg nvbcwr soqgv gomcwr gamlin kunam mam ngo kwly jikram.

³⁵Ngoqg dvrwq hoqgv ngo mwlwngam lvkin ciqnyi gob dingr tukun; ngo Debidnvn vm mvvjram.

³⁶Mwwg ko hosiqkv nwrba gob dootayin, doonyiv doody deedib mwwg pwqlw dootamv ngoqg agaho dootayin.

³⁷Pool hvbkalam nwrba gob doom tayin, doa ao tol dengky bo hvvky akwb dootayin.”

³⁸Hvbmabde sija no hurpaq gvi hoo haqpaq paku; noqg hang lingtwrnamv noqg xuqnam akam ceebio paku.

³⁹Noqg nyera lvgab noqg pvvbam apaq paku; no mwwg ywr dumtupam diimwr ho kacdvb mvpa ku.

⁴⁰No mwwg sulu mwlwngam sampia paku; no mwwg ator cwwgwngam mvpial yuupaq mvpa ku.

⁴¹Mwlwngv hoqb wpeq bov mwam humreqnam; mwwg door-doopw gab mwv bej-bepar namgob nyipa ku.

⁴²No mwwg ceebio tulug lvqbwq alaqkam vcjaqb yuum paku; no mwwg ceebio mwlwngam hwnyir-hvmar dvb mvpa ku.

⁴³No mwwg lyoqr orioqkam lyoqgw yaab pwrv paku, hoo no mwam nyob pvrwq dvb daqm mvma dvb mvpa ku.

⁴⁴No mwwg yuunam mam yuum mvma paku hoo mwwg pwqlw dootam mam deela lo hurpaq paku.

⁴⁵No mwwg yaapa swwcangam swwdw mvpa ku; no mwam hvnyw lvgab pulup paku.

⁴⁶Hwd oyu go, At Swa? No atv nwrba gob kvsil dootayin? Hwd oyu go noqg hang lingtwrnamv wm gunam hvb gul dootayin?

⁴⁷Mwwgab to ngo hog hwd mood go swwiyin do! No hoggab nyia ko mwlwngam niqtuq dooma dvb bvl pwlin pan!

⁴⁸Hog nyiv nywywngam sinam mam kaapa maab hoo swwnyi tayin? Mwwg yvjam Sux-ywlw nyookwg huqlw hoqgv hiyv naalin nyotayin?

⁴⁹At Swa, noqg kolwg tumab abynamv, noqg dengkynam mam Debidnvn no dingrnamv, hoglo kula yu?

⁵⁰At Swa, hog bvxeq noqg nyera tulungam bej-beparnam mam, hoo nyob nyi mwlwngv hoggub ngam benyi-beyanam mam ham ngoqg hangv cwqnam mam, mwwpa laka,

⁵¹At Swa, noqg ceebio tulu lvgab bej-bepar dvn, noqg xuqlinamwg lvpia lwqkap kvbxiam bulv bej-bepar dvn.

⁵²At Swn nwrba gob paqnka! Amen hoo Amen.