Read Nyishi MWMIN NWSWR 9 Bible Online

MWMIN NWSWR 9 - Nyishi bible

MWMIN NWSWR 9

¹At Swn ngoqg hvvjw-haara soqgv ngo paqyalinco paqtayin; noqg swrdorxeqb bon nyinam mam ngo betam tayin.

²Noqg aoho ngoqg mwwngam bvla hwnyir-hvmar tayin; mwlwngam koi yaan boa, noqg eminam ngo bemin bel paqtayin.

³Hwdlo ngoqg nyemaqkv ngam mvtab rukur yukam bulv ngoqg aga lo dwqtup layil sitayin.

⁴No ngoqg jvqtw pagoqkam hingkib nyil doog do; hun pvlw ho dootwl jvqtw pwwngam hwwdu do.

⁵No nyook soq nyiilungam yolu ruqnum, no nyicboam twrnum; no bulug eminam nwrba gob tipaq pakun.

⁶Nyemaq tulungam kuiyum xaqb nyem-nyol cimpakun; bulug bopam pvmxiam ciqcaq-bviyaq dvb mvpa kun; hoq tulu ham mwwmiq lakam mwwpa kuram.

⁷Hvbmabde, At Sw nwrba gob mwwg lvpw ho dootayin; mwv pw-hwwdwb mwwg lvpwngam pwpan,

⁸hoo mwwg jvqtw hoqgv gvda gvtam pw-hwwdwn; mwv nyiilungam aiyin lvkinb pw-hwwdwn.

⁹Nyijab-nyiyabnam nyiilu gab At Sw ceetorbov, ho hentwr moodam mwv svqgw ngv.

¹⁰Hoo hiyv xeq noqg eminam cengdwn hoq nyiilungv nam mwwgw dvn, At Swa hiyv nam meegaq dvn ham no nywywngam apaq maadwn.

¹¹Hiyv Jaiyon ho doodwn, At Swn bemin bel paqto. Mwwg bon nyinam mam nyiilungam bekin to.

¹²Hiyv ywlw twwn boam pw-hwwdwn; laanyi maanbo tulug xabnam mam tvmw maadwn.

¹³At Swa, ngam anya mwwpa tvb. Kaato ngam ceebio baqgam gab hwdgo ngo hentwr hindu dvn; no twq aro ngam sigwg toggoq tulu hoqgv naalin deen bov,

¹⁴Jaiyonwg nyem ko toggoq tuluho ngo mwwka layil noqg paqnam tulungam la noqg ywwlinam mam; ngo hwnyir-hvmarl bekin tayin.

¹⁵Nyi tulungv bulug ung dupnam ho atv holwq nukun; bulug atwg mvvdw peql apnamv bulug at lvpiangam jwws paku.

¹⁶At Swn mwwg jvqtw pw-hwwnam hoqgv mwam cengm dvn; nyic boam bulug alaq nyic nyigo hoqgv nootu pakun.

¹⁷Nyic bov la Pwnboam mwwpa maanbo nyi mwlwngv Sux-ywlw nyookub itayin.

¹⁸Lwxiam anya-asar twqb nyinbo tulungam mwwpa maab nyiram, hoo jwwgwbo tulug mwwgwngam nwrba xaqb nyiim ram.

¹⁹At Swa, daqrabto! Nyia koam mvtur mvmabv; hvbmabde nyob mwlwngam noqg agaho pw-hwwm to.

²⁰At Swa, bulam nam bos somto! Bulv nyia ko ngv hvl nyob mwlwngam cengm to.