Read Nyishi MWMIN NWSWR 90 Bible Online

MWMIN NWSWR 90 - Nyishi bible

MWMIN NWSWR 90

¹At Swa, no ngulug ko hosiq-hosiq gob doogw nyookv.

²Puutu mwlwngam pwlin maadab, ho no swcwngam la gvda gvtam pwlin maadab, no kuiyum hoqgv kuiyum nagub Pwnbov.

³No nyia koam diimwrb nyikur mvdo hoo begamv, “Wkur tuku, nyia ko tulungv!

⁴Noqg kaagaho vnyw lwwywngv moiyog wkbo aal hvb nyitwq dvn, ho ai yubg kaayal doonam hvb nyitwq dvn.

⁵No bulam diidwr iss lvgab nuul wgdvn; hoq tuluhv yuma maanam hvb nyidwn, ho hoqhv ar komcig nwmw jurdar namhvb nyidwn:

⁶ar komcam hoqhv swwdarl hoo nitib swwdwn; ariyum mam hoqhv sengl hoo yuupaq dukun.

⁷Ho noqg haaxaq ko-gab ngulv twryum yuku; noqg hang lingtwrnamv ngulam mwwdwq mvdo.

⁸No ngulug nyimur mwlwngam noqg agaho pvvl ap pan, ngulug kvsil nyic nyinam mwlwngv noqg kaaga huto ho doodo.

⁹Hoggab noqg hang lingtwrko uraho ngulug aal mwlwngv wpaq duku; ngulug vnywngv svqyi-saqcanam hwiyw gob wiyum paku.

¹⁰Ngulug swwtarv vnyw camkvn go, kvtaqb dool ator baloq campiin go; hvbsujaqkam hoq swwnam lo hentwrb bon nyinamv hoo vs-axaqkv doodwn; hoq moodv nyebia jaqb wnkuba, hoo ngulv jarleq dvn.

¹¹Noqg haaxaqnam atoram, hoo bosdvb noqg hang lingtwrnam mam hiyv ceng dvn?

¹²Hoqgab ngulug aal tulungam xika mvdvb ngulam tomswr tvb ho ngulv cenglaq hangam kaapa kamyi nvpv.

¹³Wkur to, At Swa! Hog hwd oyu go? Noqg kanam tanbo tulungam aya mwwpa tvb!

¹⁴Arkomcam noqg tumab abynam lvgab ngulam hang xumt mvtwb, ho ngulv hwnyir-hvmarl hoo ngulug swwca aal mwlwho hemp potayin.

¹⁵No ngulam hog hwd aal go ngulam hentwr hem pakun, hoo hwd vnyw go ngulv alman mam kaam pakun hwdkalam go ngulam hemp pom tvbv.

¹⁶Noqg bonam noqg kanam tanbo tulungam, hoo noqg vcjaqb yuunam atoram bulug ko tulungam kaakin to.

¹⁷Ngulug Pwnbo At Swg mwwswnamv ngulug aoso doom to, hoo ngulug alaqg bonam ngulug aoso mvko tvbv; vvjaq ngulug alaqg bonam mvko tvb!