Read Nyishi MWMIN NWSWR 94 Bible Online

MWMIN NWSWR 94 - Nyishi bible

MWMIN NWSWR 94

¹At Swa, ree daqnbo Pwnboa, ree daqnbo Pwnboa, huto huulin to!

²Gorabto, swcwsam pw-hwwn boa; larn boam jikurto hoggv bulv naaiyin dvn!

³At Swa, hwd oyu go nyic bov, hwd oyu go nyic bov hwrcw tayin?

⁴Bulv bulug larnam agam mam goolin do; alman bo mwlwngv atam paqs do.

⁵At Swa, bulv noqg nyiilungam vmwq yumgub mvgdo, hoo noqg nyicwngam mucu-mviya gvdo.

⁶Bulv xwwmiam la nyoodo nyiingam hoo ab dooma boam mengnum;

⁷hoo bulv bedo, “At Sw kaapa maadwn; Jakubg Pwnbov mwwcin maadwn.”

⁸Cenglaqto, mwlwngam dama yaanbo nyiilunga! Nyiidam bo tulunga, hwdlo no cenglaq taikunv?

⁹Hiyv nyurungam gvmbov, hv mwv tapa maad nvi yv? Hiyv vnyiqkam mvnbov, mwv kaapa maad nvi yv?

¹⁰Hiyv gvda mwlwngam kvtaqb swwb dvb mvnbov, mwv yolu ruqnyi ramyv? Hiyv nyia koam cengm dvb tomswr bov

¹¹At Sw cengdwn nyia kog mwwnam mam, bulv saqnam mwtwq.

¹²At Swa, noqg gwrnam, hoo noqg pvvbam tomswrnam akv xinam jaqkv,

¹³hoo vs-axaq aal hoqgv mwam doonu mvdwb jidwn, hwdlo nyicbo tulu gab ung duma deedib.

¹⁴Hoggab At Sw mwwg nyiilungam turam; mwv mwwg gumnam apaqram;

¹⁵hvbmabde jvqtwngv dvrwqbo gab hookur tayin, hoo hang dvrwqbov mwlwngv ham nyimin gvl wtayin.

¹⁶Nyic boam ceeko taab ngoqgab hiyv daqrab dvn? Almab nyin boam ceeko taab hiyv ngoqgab daqrab dvn?

¹⁷At Sw ngam svka kuma nyiloqkam, ngoqg yvjv nyebia jaqb jimy-jemako nyook ho dook banpv.

¹⁸“Ngoqg lvpiangv duleq pakbo ngo mwwdwk ho,” noqg tumab abynamv, At Swa, ngam putul apnum.

¹⁹Hwdlo ngoqg mwwdwqkv naleq duk ho, noqg bet-belanamv ngoqg yvjam hwrcw mvnam.

²⁰Nyicbo tulug pvvb bwwl doog bov noqg lvgab nyibam nyotayin yv, hiyv jvqtw maan pvvbam mvl ap pan?

²¹Dvrwqb swwnbo tulungam bulv lvkin gob ceeko dvn hoo nyiidar nyiingam sim dvb haqpaq dvn.

²²Hvbmabde At Sw ngoqg atorbo cwwgwb nyidwn, hoo ngoqg Pwnbov ngoqg cwwgw lwwnv.

²³Mwv bulug nyimuram bulug aoho hookur mvtayin hoo bulug nyic nyigam gab bulam nepaqtan; ngulug Pwnbo At Sw bulam nepaqtayin.