Read Nyishi DOOTIN 11 Bible Online

DOOTIN 11 - Nyishi bible

DOOTIN 11

¹Xibium-xiyiq xinamv At Swg bulum-kacnamv, hvbmabde jvqtwb xinamv mwwg hempnamv.

²Larnamv haaikam, ho ximanamv haadwn, hvbmabde yanbo lvgab mwwlaqkv doodwn.

³Lootwbo tulungam jvqtwngv bool wg dvn, hvbmabde xaalyol bigw-begol benamv bulam twrg dvn

⁴Twrd aalam nyetv niqtuq dook maadwn, hvbmabde jvqtwnamv sig hoqgv naalin dvn.

⁵Timb dvb nyima bov jvqtwngv mwwg lamtangam dinda dvb pvvdwn, hvbmabde nyic bov mwwg atwg nyic ko-gab yoql dvn.

⁶Dvrwqbog jvqtwngv bulam naalin dvn, hvbmabde xaalyo bo tulungam bulug kaaby ko-gab nootul nyuum boodwn.

⁷Nyic bov siyi kun, mwwg mwwgwngv yuupaq tayin, hoo mwwgwnam gumnv kam yuupaq dukun.

⁸Jvqtw boam vs-axaq hoqgv naalin dvn, hoo nyic bov hoq yaab hookub dukun.

⁹Pwnboam mwwjw maanbo nyiv mwwg agam lvgab mwwg door-doopwngam twrdwn, hvbmabde cenglaq hoqgv jvqtw boam naalin dvn.

¹⁰Hwdlo jvqtwbongv al yukam, bopamv hwnyir-hvmar dvn, hoo nyic bov yuupaq yukun hoqho hemp pwl goqram rodwn.

¹¹Jvqtw bog lvqc hoqgv bopamv swwrab dvn, hvbmabde nyicbog agam hoqgv ham mvpaqdvn.

¹²Hiyv xeq mwwg door-doopwngam anyob mwwdwn hv mwwlaqnan dooma bov, hvbmabde cenglaqbo nyi akv gomd maab doodwn.

¹³Hiyv xeq bepaq-beyaq bekar dvn hv kvsnam mam bepor dvn, hvbmabde hiyv mwwjw dvb nyidwn hv pagoqkam pvvcum dvn.

¹⁴Hogloq ho tomswrnamv dooma dvn, nyiingv yuupaq dvn, hvbmabde tomswr-hony bo tulungv naleqgo dooikam hoqho swrsongv doodwn.

¹⁵Hiyv xeq nyoodo nyi gab lwwiya dvn hv hentwram kvxaqram, hvbmabde alaq jwwnam mam oyum dvb dingrbov bosram.

¹⁶Anya mwwpa bo dvnv xinam mam naadwn, hoo parpar twqb nyinbo nyiilungv nyet dvn.

¹⁷Hiyv nyi akv anya mwwpa dvn mwv anya nyajongam kaapa dvn, hvbmabde hang lenga bo nyi akv mwv atam kwdw dvn.

¹⁸Nyic bov gwwlyw laqjongam naadwn, hvbmabde hiyv akv jvqtwngam liinbov lvqcam kvxaqmab naadwn.

¹⁹Hiyv xeq jvqtwngam tuma dvn hv swwtayin, hvbmabde hiyv alman boam nyimin gvnbov sitayin.

²⁰Hiyvg hangv mwwgw-mwwgo dvn hv At Sw gab bulum-kacnamv, hvbmabde hiyvg lamtangv timb dvb nyima dvn hv mwwg hempnamv.

²¹Si kvxaq jaqram, almanbo nyiingv laqm-baqmab nyiram, hvbmabde jvqtw bog ko hosiqkam ywwlin tayin

²²Kaangam tvl mwwdar maanbov dvnv iriq nobtup lo hun gagy kvrlwqnam hvb nyidwn.

²³Jvqtw bog mwwbinamv albo niqtuqb lengtwq dvn; nyicbog mwwgwnamv hang lengtwr mvdwn.

²⁴Ak jinyib jido, hvbsujaqkam vi yaiyab nyet swwdo; akwn si mwv hoggv jiyinam ham jimab doog do, hoo pwwmab hentwr rooxo do.

²⁵Hiyv xeq lvqcam baqa dvn hv vigo nyet tayin, hoo hiyv akv iss jidwn mwam atam kam iss jis dvn.

²⁶Hiyv dvggam bwjinl apboam mwam nyiilungv beedwn, hvbmabde hiyv ham puqdwn mwwg dumpo aoho lvqcv doodwn.

²⁷Hiyv xeq hingky jaqb alboam meegaq dvn mwwswnam mam meekar dvn, hvbmabde mwam alman bov haadwn hiyv hoq gab meegaq dvn.

²⁸Hiyv xeq mwwg nyetam mwwgw dvn hv yuupaq tayin, hvbmabde jvqtw bov ok jurlinl swiywq namhvb nyitayin.

²⁹Hiyv xeq mwwg atwg nombungam vs-axaq dvb mvdwn, hv dooiyam otub bvvdwn, hoo hang mwwlaqbo gab nyiidam bov bon nyijobo gob nyitayin.

³⁰Jvqtw bog aaxiv swwg svvnv, hoo hiyv xeq yvjam cuml doogdvn hv mwwlaq bov.

³¹Jvqtw boam swcw nvg aoso jikur dvb nyinyiloqkam hog hwdjaqgo nyic boam la nyic nyin boam laqm-baqm sup kui yv!