Read Nyishi DOOTIN 12 Bible Online

DOOTIN 12 - Nyishi bible

DOOTIN 12

¹Hiyv xeq gwrnam mam aby dvn cenglaqkam aby dvn, hvbmabde hiyv yolu ruql tomswrnam mam oyum dvn hv dama bov.

²Albo nyi akv At Swg hoqgv mwwswnam mam kaapa dvn, hvbmabde almanbo nyi akwg nyinam mam mwv haqpaq dvn.

³Nyic-nyia hoqgv hiyvkam swwrab maadwn, hvbmabde jvqtw bog swwgwngv nywywngam biimram.

⁴Dengky bo nywxwngv mwnwg nyolwg ywr dumtupv, hvbmabde hiyvg nywxw akv hvnywngam baqa dvn hv mwwg yaakbo alo hvb nyidwn.

⁵Jvqtw bog mwwnam tulungv jvqtwngv; nyicbog tomswr-honynamv gwwlywngv.

⁶Nyicbog gomcwr tulungv mengnam-puqnam pagoqkam goodwn, hvbmabde jvqtw bog agamv bulam ywwlin dvn.

⁷Nyic boam mvpaq pakun hoo bul dookma, hvbmabde jvqtw bog nammv dooky tayin.

⁸Nyiam mwwg alwb mwwlaqnam hoqgv paqdwn, hvbmabde lyol soonyi bo akam paqma dvn.

⁹Anyo nyiib nyitwl hoo nyera doognamv nyet gob larstvl dvs doog maan boam alyadwn.

¹⁰Hiyv xeq jvqtw dvn hv mwwg svding swwgab mwwdwn, hvbmabde nyicbog aya mwwpanamv mengnamv.

¹¹Hiyv xeq mwwg kedam raiyib bon tulungam nyinbov dvsam naleqgo doog tayin, hvbmabde hiyv niqtuq dooma boam wmin gvdwn hv mwwlaq maanbov.

¹²Hiyv xeq nyic dvn hv nyicbog nyinam tulungam mwwby dvn, hvbmabde jvqtw bog mvmiangv aaxy xeedwn.

¹³Almanbo nyiam mwwg agam bexiaqnamv hoqgv hoqtu dvn, hvbmabde jvqtw bov vs-axaq hoqgv keleq dvn.

¹⁴Mwwg agam niqtuq hoqgv nyi akam albo lvgab xumt mvdwn, hoo nyi akwg alaqho bonam nyinamv mwam hookur dvn.

¹⁵Nyiidam bo akv mwwg lamtangam mwwg vnyiqkv kvtaqdvb kaadwn, hvbmabde mwwlaqbo nyi akv tomswrnam mam tagab dvn.

¹⁶Nyiidam bo akwg mwwdwqnam mam kvvtwq tvl cengdwn, hvbmabde mwwlaq bov benyi-beyanam mam tanam dvn.

¹⁷Hiyv xeq jvqtwngam goodwn hv bitwngam belin dvn, hvbmabde xaalyo bo hvvky akv vm mvdwn.

¹⁸Hiyv akgon mwwl agam gooma dvn hv lyoqr orioq nwqlwqnam hvb nyidwn, hvbmabde mwwlaq bog lyolv swrsongam goolin dvn.

¹⁹Jvqtw bog agamv nwrba gob doodwn, hvbmabde xaalyo bo agamv oyum totu gootwq.

²⁰Hiyv almab nyitws mwwnbo hanglo gwwlywngv doodwn, hvbmabde hiyv swrso gab mwwnbov jampam doogdvn.

²¹Jvqtw boam swcin-taiyaqkv haama dvn, hvbmabde nyic boam vs-axaqkv pubum dvn.

²²Vm mvvnam agam mam At Sw bulum-kac dvn, hvbmabde hiyv dengkib nyidwn hv mwwg hempv.

²³Mwwlaqbo nyi akv cenglaqkam kvsdvn, hvbmabde nyiidam bog hangv pacab bekar dvn.

²⁴Kwrw bog alaqkv pvvb mvgyin, sepy boam nwwteql bon nyim tayin.

²⁵Mwwdwqbo nyi akwg hangv mwam hang hom dvn, hvbmabde albo agamv mwam mwwngam mvmdvn.

²⁶Hiyv jvqtw bo akv hv mwwg door-doopwngam nyig-wgdvn, hvbmabde nyicbog lamtangv bulam booxar gvdwn.

²⁷Hiyv xeq sepy dvn mwwg nyotum wnam mam romnu maadwn, hvbmabde kwrwbo nyiv xinam gumnam naatayin.

²⁸Jvqtw toggoqkv swwgv, hoo hoqg toggoq lamta ho sig dooma dvn.