Read Nyishi DOOTIN 13 Bible Online

DOOTIN 13 - Nyishi bible

DOOTIN 13

¹Mwwlaqbo kov mwwg abwg tomswrnam mam tadwn, hvbmabde bej-beparbo akv yolu ruql tomswrnam mam tama dvn.

²Mwwg agam niqtuq hoqgv albo aaxiam nyi akv dvdwn, hvbmabde xaalyo bog mwwbynamv guunyi gob nyidwn.

³Hiyv xeq mwwg agam mam hvvmin dvn hv mwwg swwgam pvvl apdvn; hiyv mwwg agam mam cwqmadvn hv yuupaq dukun.

⁴Sepy bog yvjv dwqdwq jaqb kos jaqkam hog kaaparam, hvbmabde kwrw bog yvjv naleqgo naadwn.

⁵Jvqtwngv xaalyongam oyum dvn, hvbmabde nyicv hvnywngam la ximanam mam haagdvn.

⁶Hiyvg lamtangv timb dvb nyima dvn mwam jvqtwngv rvky dvn, hvbmabde nyicv nyic-nyia boam mviya dvn.

⁷Tuugin nyiv nyet bo hvb nyicaq sudo, hvbsujaqkam hog doogma; tuugin jwwgwbo hvb nyis do, hvbmabde koigo gumn doog do.

⁸Nyi akwg swwgam pvlyw naalin nanv mwwg gumnv, hvbmabde jwwgwbo nyi akv hog belamnam taparam.

⁹Jvqtw bog hutongv hwnyir-hvmar dvn, hvbmabde nyicbog hutongam mwmiq tayin.

¹⁰Modu maanamv hog haag maadwn hvbmabde jwwnamv, hvbmabde hiyv tomswrnam mam tadwn hv mwwlaq dvn.

¹¹Sadaq-totu ho nyet tvnamv xootayin, hvbmabde kwr-korwb nookumnamv nyet swwiyu tayin.

¹²Mwwgwnamv paxaq yukam hang vc mvdwn, hvbmabde mwwbynam akv niqtuq lengyikam hv swwgwg svvnv.

¹³Hiyv xeq gomcwram haqpaq dvn mwwg aoho atv ocu-ayangam ham sudwn, hvbmabde hiyv pvvbam xidwn ham lvqc cidwb nyitayin.

¹⁴Mwwlaq bog tomswrnamv swwgwg gwwlv, ho nyi akam sigwg poto hoqgv wleq mvdwn.

¹⁵Alwb mwwnamv mwwswnam mam naadwn; hvbmabde xaalyo bog lamtangv bulam yuupaq mvdwn.

¹⁶Hog hoolu luuxy mwwlaq bov cenglaq lvgab nyidwn, hvbmabde nyiidam bo akv mwwg nyiidam mam kaakin dvn.

¹⁷Nyic pui baqnbov vs-axaqb haadwn, hvbmabde dengky bo gumtw akv swrsongam baqa dvn.

¹⁸Hiyv tomswrnam mam anam dvn mwam jwwgwnamv la ximanamv haadwn, hvbmabde hiyv xeq yolu ruql tomswrnam mam tadwn ham xipa kun.

¹⁹Mwwbynam akam niqtuq lengnamv yvj gab xumt dvn, hvbmabde nyiidam tulu gab alman hoqgv wkurnamv bulum-kac gob nyidwn.

²⁰Hiyv xeq mwwlaqbo lvgab wdwn hv mwwlaq dvn, hvbmabde nyiidam bog ajin tulungv hentwr hentayin.

²¹Nyicbo tulungam ciqcaq-bviyaqkv ruqmin gvdwn, hvbmabde jvqtw bo tulungam albo lvgab lvqc cidwn.

²²Albo nyi akv mwwg ko-ko siqda gab otungam ap jidwn, hvbmabde nyic nyinbog gumnam jvqtw bo gab paal apdvn.

²³Jwwgw bog nyioby ked ho vigo vliv lengyin dvn, hvbmabde hoqham jvqtw maanbov ceqpaq dvn.

²⁴Hiyv nyiv mwwg kongam xoociq xitaq maadwn hv mwwg kongam oyum dvn, hvbmabde hiyv mwwg kongam aby dvn hv mwam kwrwjaqb gwrl mwam tomswr dvn.

²⁵Mwwg dwnwngam dvndvb vigo doogdvn, hvbmabde nyic bog kepongv dwnw gab rwwl doodwn.