Read Nyishi DOOTIN 14 Bible Online

DOOTIN 14 - Nyishi bible

DOOTIN 14

¹Mwwlaq lvqtwrbo dvnv mwnwg nammam pwdwn, hvbmabde nyiidam bo dvnv atwg alaq lvgab ham mvpia dvn.

²Hiyv xeq jvqtwb wdwn hv At Swn bosdvn, hvbmabde hiyv dinda lamtab wma dvn hv At Swg lamta tulungam haqpaq dvn.

³Nyiidam akwg larnam agam hoqgv mwv dvvcw laqm mam baqdwn, hvbmabde mwwlaq bog agamv bulam pvvl aptayin.

⁴Hogloq ho hvvb daqma dvn, svv dvnnan dookamv dvrwqdvn, hvbmabde hvvbwg ator hoqgv vliv naleqgo lengdwn.

⁵Dengky bo hvvky akv vm mvvma dvn, hvbmabde xaalyo bo hvvky akv vm mvvnam mam belin dvn.

⁶Benyi-beya bo akv mwwlaqkam niqtuq doomab meesam dvn, hvbmabde mwwlaqbo nyi ak gab cenglaqkam miipw maadwn.

⁷Nyiidam bo akwg dook hoqgv wleqto, hoggab hoqho no cenglaq agam mam tapa maadwn.

⁸Mwwlaq bog cenglaqnamv mwwg lamtangam xuqbwq sudwn, hvbmabde nyiidam bog damanamv surdvn.

⁹Mwwmur gab aky jinam mam nyiidam bo tulungv bej-bepar dvn, hvbmabde jvqtw bov loorwqnam mam hemp podwn.

¹⁰Hangv atwg kacaqnam ham cengdwn, hoo nyoodo nyiv hoq hempam poba nyoma dvn.

¹¹Nyicbog nammv twrtayin, hvbmabde jvqtw bog doogwngv yuudub swwtayin.

¹²Nyi akwg lamta kaanamv al dvb kaadwn, hvbmabde hoqg wtwr-wnyangv sig lamtangv.

¹³Hang vc dvb nyirs jaqkam, hoo hoqg hemp potwrv mwwdwq gob nyikam yinpv.

¹⁴Pwnbo hoqgv gaqlin kunbo hang lo mwwg lamta gaqjo aaxiam dvdeq mvtayin, hoo albo nyi akv mwwg lamta nyijo aaxiam xumt mvtayin.

¹⁵Damdam bov hog hoolu luuxiam mwwjw dvn, hvbmabde mwwlaq bov mwwg dwql wkam mwwka coodwn.

¹⁶Hiyv akv mwwlaq dvn hv hvvmin dvn, hoo almanbo hoqgv wiyeq dvn, hvbmabde nyiidam bo akv rus-masinl hoo hvvmin maadwn.

¹⁷Kuqnyiq bo nyi akv nyiidam nyinam hvb nyidwn, hoo oyumnamv almanbo nyi akwg dupum-dvrabpv.

¹⁸Damdam bov pacangam otub nvvsiq dvn, hvbmabde mwwlaq boam cenglaq lvgab ywr dumtup tupj dvn.

¹⁹Alman bov albog agaho pvxwl xumdwn, nyic-nyia bov jvqtw bog toggoq tuluho daqdwn.

²⁰Jwwgw boam mwwg door-doopwngv kam kvvnw maadwn, hvbmabde nyet bov naleqgo ajin doogdvn.

²¹Hiyv xeq atwg door-doopwngam cinyi-beya dvn hv nyic nyinbo akv, hvbmabde hiyv jwwgw boam rootob jidwn hv xinam jaqkv.

²²Hiyv almab nyitws mwwn bov bulv gaqxar maad nvi yv? Hiyv xeq alboam kaapa tvs mwwn bov tumab abynam mam la dengkynam mam kaapa dvn.

²³Hog luuxiam kwrwb nyijongv niqtuq doodwn, hvbmabde agam rooxo twqn bov jwwgw dvn.

²⁴Mwwlaq bog ywr dumtupv bulug gumnv, hvbmabde nyiidam bog nyiidamnamv nyiidam mam haagdvn.

²⁵Jvqtw bo hvvkiv akv swwgam ywwlin dvn, hvbmabde hiyv akv surdvn hv vm mvvlin dvn.

²⁶At Swn bosbo akv atorjaqb haakam dvn, hoo mwwg ko tulungv cwwgwngam doog tayin.

²⁷At Swn bosnamv swwgwg subuqkv, hoq akv sigwg poto hoqgv keleqdvn.

²⁸Nyiilu mvqlwngv Lvpw at akwg yuunamv, hvbmabde nyiilu doog mabalo lvpw atwg ko tuupv yuupaq dvn.

²⁹Hiyv xeq hang lengla maadwn hv koijaqb cenglaqkam doogdvn, hvbmabde hiyv nyebia jaqb kuqnyi bov nyiidam mam koi yaiyab paca bepa dvn.

³⁰Swrso hangv gv aiyaqkam swwdwb jidwn, hvbmabde kaaneqnamv alo tulungam yaag dvn.

³¹Hiyv xeq jwwgwbo nyi akam nyijab-nyiyiq dvn mwam Pwnboam nyij-nyipar dvn, hvbmabde hiyv dwc-twwpw maanboam rootob jinbov hv mwam xidwn.

³²Nyic bongam mwwg almab nyinamv hoqgv dampia lodwn, hvbmabde jvqtwbongv mwwg sig hookam cwwgwngam kaapa dvn.

³³Cenglaqbo nyi akwg hang uraho mwwlaqnamv swrwq rwqgw dvn, hvbmabde soq si mwv atv nyiidam bo tulug pengko hookam cengm dvb jidwn.

³⁴Jvqtwngv nyob tulungam yuum dvn, hvbmabde nyimurnamv nyiilu vxiam benyi-beya mvdwn.

³⁵Hiyv nyera akv mwwlaq alwb nyidwn hv lvpw atwg mwwswnam mam doogdvn, hvbmabde hiyv akv hvnyw nyipup dvn mwwg hang lingtwrnamv mwwg aoho haam dvn.