Read Nyishi DOOTIN 15 Bible Online

DOOTIN 15 - Nyishi bible

DOOTIN 15

¹Tangam dvb goorwqnamv hang lingtwrnam mam sunyum mvdwn, hvbmabde gamtor agam goonamv hang lengm dvn.

²Mwwlaq bog lyolv cenglaqkam paqdwn, hvbmabde nyiidam bog agamv nyiidam agam mam goolin dvn.

³At Swg vnyiqkv nyook mwlwho kaal doodwn, al-kor aoho kaal doogdvn.

⁴Mwwiyum-mwwiyuml agam goonamv swwgwg svvnv, hvbmabde alman agamv agam bejam bepia dvn.

⁵Nyiidam bov at abwg tomswrnam mam haqpaq dvn, hvbmabde hiyv xeq yvtw-twwnam mam tagab dvn hv mwwlaq bov.

⁶Jvqtw bog nam uralo gumnv vigo doodwn, hvbmabde nyic nyinbog door tinamv swcin-taiyaqkv haadwn.

⁷Mwwlaq bog agamv cenglaqkam yuumw mvdwn; nyiidam bog hang tulungv hvb maadwn.

⁸Nyicbog pwr jinam mam At Sw gab bulum-kacnamv, hvbmabde jvqtw bog swgwnamv mwwg gab loodwb nyidwn.

⁹Nyicbog lamtangv At Sw gab bulum-kacnamv, hvbmabde hiyv jvqtwngam ruqmin gvdwn mwv ham aby dvn.

¹⁰Hiyv lamtangam apaq dvn mwwg gab vcjaqb gwrnamv doodwn; hiyv yvtw-twwnam mam oyum dvn hv sitayin.

¹¹Sux-ywlwngv la Bvdo-gangkongv At Swg agaho gamko tvl dood nyiloqkam; hog hwdgo nyia kog hang mwwnam mam kvs nyotayin!

¹²Biwq-bexo bo akv yvtw-twwk maadwn; mwv mwwlaqbo dookub wram.

¹³Hemp hangv nyuqtuq-nyuqm mam hwrcw mvdwn, hvbmabde mwwdwq hangv yalam muiyu dvn.

¹⁴Hiyvg hangv mwwlaqkam doogdvn hv cenglaqkam meekar dvn, hvbmabde nyiidam bog agamv nyiidam mam dvdwn.

¹⁵Looxiam duqtwr duql doonamv almado, hvbmabde hwrcw hangv durum-ruminl doodwn.

¹⁶Anyo doog tvl At Swn bosnamv vigo gumn doos tvl vs-axaqb nyinam mam alyadwn.

¹⁷Hogloq ho abiv doodwn oo asar dvnamv ceebio baqtvl ox xupiabo svv hvvbam patabl dvnam mam alyadwn.

¹⁸Kuqnyi bo nyi akv yolungam biur dvn, hvbmabde hiyv hang lenga maanbo bamiyam sunyum mvdwn.

¹⁹Sepy bo akwg lamtangv taa haataq hvb nyidwn, hvbmabde jvqtw bog lamtangv haapa paada lamta hvb nyidwn.

²⁰Mwwlaqbo ko akv abam hemp dvb mvdwn, hvbmabde nyiidam bo nyi akv mwwg annam xima dvn.

²¹Hiyv mwwlaq maadwn nyiidamnam mam mwv hemp dvn, hvbmabde cenglaqbo nyi akv dinda lamtab ws-wda dvn.

²²Tomswr-hony maab nyinamv osuq dvn, hvbmabde naleqgo tomswr bo doognamv bulv niqtuq nyilin dvn.

²³Kvtaqjaqb birwqnamv nyi ak gab hempnamv, hoo moodam agam goonamv hog hwdgo aldvn!

²⁴Mwwlaqbo gab swwg lamtangv aob caag dvn, ho mwv Sux-ywlw niikum hoqgv wkur dukun.

²⁵At Sw larnbo nammam mvpia dvn hvbmabde xwwmig vrram biimab doom dvn.

²⁶Nyic bog mwwnam mam At Sw bulum-kac dvn, hvbmabde anya bo gomcwrv dvrwqdvn.

²⁷Hiyv xeq nyicib nyil paatws mwwl rvvsw bov mwwg atwg nombungam vs-axaq gob mvdwn, hvbmabde hiyv kam nanam mam oyum bov swwtayin.

²⁸Hoggub goorwq tan jvqtw bo hangv mwodvn, hvbmabde almanbo tulungam nyic bog agamv toolin dvn.

²⁹At Sw nyicbo hoqgv aado dvn, hvbmabde mwv jvqtw bog swgwnam mam tadwn.

³⁰Vnyiqg hutongv hangam hwnyir-hvmar mvdwn, hoo albo puiyv loobungam buut mvdwn.

³¹Swwg jidwb yvtw-twwnam mam tagab bo nyurungv mwwlaqbo pengko ho doodwn.

³²Hiyv xeq tomswrnam mam tanam-tacam bov mwv atam xima sudwn, hvbmabde hiyv yvtw-twwnam mam tagab dvn hv mwwlaq-henglaqkam naadwn.

³³At Swn bosnamv mwwlaq tomswrnamv, hoo yannamv xinam otuq yab haaco dvn.