Read Nyishi DOOTIN 16 Bible Online

DOOTIN 16 - Nyishi bible

DOOTIN 16

¹Hang mwwx-mwaqnamv nyia ko tulu gv, hvbmabde At Sw galoqkv agam goorwqnamv haadwn.

²Nyia ko akwg mwwg vnyiq kaaga lo lamta mwlwngv dvrwqdvn, hvbmabde At Sw hang mwwjam jaaka dvn.

³Noqg bonam At Swn gvqlwqto, hoo noqg mwwx-mwaqnam mwlwngam yabgab kuqko jitayin.

⁴At Sw hoolu-luuxiam pagoq ak gab mvpan, nyic boam kam vs-axaq aal gab mvpan.

⁵Hang larnbo nyiicwr-cwrxiam At Sw bulum-kac dvn; sam mwwgab to, mwv laqm-baqmab wram.

⁶Tumab abynamv la dengkynamv nyicam paxy xeexaq dvn, hoo At Swn bosbo akv alman hoqgv keleq dvn.

⁷Hwdlo nyiig lamtangv At Swn xumt dvb mviyin, mwv mwwg ceebio tulungam kam mwwg lvgab swrso dvb mvdwn.

⁸Anyo go jvqtw lvgab doognamv vigo nyibum-nyiyiql door tukumnam mam alyadwn.

⁹Nyi hangv mwwg lamtangam mwwx-mwaq dvn, hvbmabde At Sw mwwg dwqkap tulungam mvko jidwn.

¹⁰Lvpw atwg nvbcwr ho gamt tonamv doodo; mwwg agam lo pw-hwwmurnamv dooma dvn.

¹¹Kvtaqjaqb swgw xinnanv At Sw gv; xic-xit swgw xinamv mwwg bonam nyinamv.

¹²Almab nyinam si Lvpw atwg bulum-kacnamv, hoggab pwqlw dootam si jvqtw hoqgv ywrgw pan.

¹³Jvqtw agamv lvpw atwg hempnamv, hoo hiyv akv hoggv jvqtw dvn ham goon boam mwv aby dvn.

¹⁴Lvpw atwg hang lengnamv sig pui baqnbo hvb nyidwn, hoo mwwlaqbo nyi akv ham jinyioq dvn.

¹⁵Lvpw atwg hoopu-haabia namho swwgv, hoo mwwg mwwswnamv haapam juucal nyodo hoanam hvb nyidwn.

¹⁶Mwwlaqkam doognamsi hog hwdgo hunam alyado! Cenglaqkam naadwb xuqnam si rupam alyadwn.

¹⁷Alman hoqgv daqyeqnamv jvqtw bog lamta paadangv; hiyv xeq mwwg lamtangam hvvmin dvn mwwg swwgam pvvcuml apdvn.

¹⁸Twrma taab larnamv haaco dvn, hoo hool maatab atam paqsnamv haaco dvn.

¹⁹Jwwgwbo lvgab yanwb nyinam-wnamv larl mviyaql naapin-naaranam mam alyadwn.

²⁰Hiyv xeq gomcwr gooma taab mwobov alboam kaapa tayin, hoo hiyv At Swn mwwgw dvn mwv xinam jaqkv.

²¹Hang mwwlaq boam cenglaq gob goqdwn, hoo tiiswr dvb goonamv vi yaiya go tvlwq dvn.

²²Alwb mwwnam mam hiyv doogdvn hv mwwg swwgwg gwwlv, hvbmabde nyiidam bo tulug tomswrnamv nyiidam dvn.

²³Hang mwwlaq bog mwwg goonam mam kvtaq jaqb goodwn hoo mwwg agamv tvlwqnam mam vbw dvn.

²⁴Anya agamv tong ngoiyap hvb nyidwn, yvjwg tiiswrnamv hoo aiyaqkam jwwtw mvdwn.

²⁵Nyia kog kaanamv lamtangam aldvb kaas dvn hvbmabde hoqg lamta wtwr-wnyangv sigv.

²⁶Nyis tulungam nyinbog dwnw-twwnwnamv mwwg gab nyis tulungam nyinw mvdvn; mwwg agamv mwam nyim dvb nyidu dvn.

²⁷Niqtuq dooma bo nyiv alman boam nyidwb mwwlin dvn, hoo mwwg goonamv wm xambiaq namhvb nyidwn.

²⁸Jvqtw maanbo nyiv yolu-swcin dugaq dvn, hoo jebs-japeqbov tumanam ajinam japin dvn.

²⁹Kwr-korbo nyiv mwwg door-doopwngam kaaneq dvn hoggv almadwn hoo mwam hoq lamtab boog dvn.

³⁰Hiyv xeq mwwg vnyiqkam nyiqt-gamt dvn hv almanbo pagoqkam nyidwb mwwdwn; hiyv mwwg agam mam pvvs dvn alman boam wsiq mvdwn.

³¹Dum dumpungv yuunamg ywr dumtupv; soq sam jvqtwb swwnam hoqgv kaapa dvn.

³²Hiyv xeq hang lenga maadwn hv xitor bongam alyadwn, hoo hiyv mwwg swwgab pvvb bwwl doognamv hv bopam ak naal doognam mam alyadwn.

³³Xijiqnam mam haabo aolo hurp paku, hvbmabde hog luuxiam jidy-jimanamv At Sw galoqkv.