Read Nyishi DOOTIN 17 Bible Online

DOOTIN 17 - Nyishi bible

DOOTIN 17

¹Dvp-dviyin dvtwl yolu duknam mam swrsob kulu-xos dvnamv alyadwn.

²Hvnyw-har nyipa bo ko tuup akam mwwlaqbo nyera akwg uraho dootayin, hoo vbw-bor ak hvb gumnam bwwba tayin.

³Rupam dvvcw pwcw lo, hoo hunam wm lo jiqxor dvn, hoo At Sw hangam pooiyeq dvn.

⁴Almab bon nyinbov nyicig agam mam tadwn, hoo almanbo agam mam vm mvvnbo akv nyurungv tagab dvn.

⁵Hiyv xeq jwwgw boam bej-bepar dvn hv mwwg Pwnboam benyi-beya dvn; hiyv hentwr-kaas moodam hemp dvn hv laqm-baqm maab dooram.

⁶Kog ko hosiq tulu si nyekam-xoxwg ywr dumtupv, hoo ko tulungam yuunamv bulug ab tulu gv.

⁷Alwb agam goonamv nyiidam ak gab niqtuq haama dvn; lvpw atwg ko tuupv anyo go xaalyo agam mam goodwn.

⁸Kam jinam si kam jinbog vnyiq kaaga lo gwwnbo wlw hvb nyidwn; hogloqb mwv wdwn ho mwv swwdwn.

⁹Hiyv xeq nyicam apaq dvn hv abiam meegaq dvn, hvbmabde hiyv pagoqkam betin-betinl bedwn hv ajin jimbw tulungam tumin sudwn.

¹⁰Nyiidam bo akam lwwyw-nyixwgo jwwl yolu ruqm mam lingsam, cenglaqbo nyi akv lvkin go yolu ruqnam mam mwwgab dvn.

¹¹Almanbo nyi akv ceebio baqdwb meegaq twqdwn, hoo mwam ceeko mvdwb sig puiyam baqkin boam kanam tayin.

¹²Nyiidam bo akam mwwg nyiidam uraho wrwq mamlin sam sutum-tumnam wrwql mwnwg kongam naareqnamv alyadwn.

¹³Hiyv lajaqkam alboam almanbo gob jikur baloqkam, alman bov mwwg nam hoqgv wleqram.

¹⁴Haaxaq-xaqrabnamv issam hoqkoq namhvb nyidwn, hoqgab yolu dupur maatab apaq minsto.

¹⁵Hiyv nyicam alpa hvdwn hoo hiyv jvqtwngam haqpaq dvn hoq vnyi-vnyiam At Sw bulum-kac dvn.

¹⁶Nyiidam bo akv hoggab mwwg alaqho twngk doogwl mwwlaqkam rvta dvn hwdlo mwv mwwcin maatwl?

¹⁷Mood mwlwho ajinv aby dvn, hoo vbw-boram sig-dorg mood gab dwr buqpan.

¹⁸Hiyv mwwcin maadwn hv dingsam-dingyam dvn hoo mwwg door-doopw agaho mwv gorgy naanam-naacam dvn.

¹⁹Hiyv xeq nyicam aby dvn hv yolungam aby dvn; hiyv mwwg viyap pam ao dvb mvdwn hv mviyaq-mvcaqnam mam meegaqdvn.

²⁰Bigw-bego bo nyi akwg hangv alboam kaapa maadwn, hoo jvqtw lvgab agam gooma bov swcin-taiyaq uraho haadwn.

²¹Hiyv nyiidam bog abwb nyidwn mwv atv mwwdwqkam kaapa dvn, hoo nyiidam bog ab akv hemp maadkun.

²²Hempbo hangv albo dvrabpv, hvbmabde mwwdwqnam hangv alongam sengm dvn.

²³Nyic bov kvsil kam mam loorwql jvqtw lamtangam muk-mviya dvn.

²⁴Mwwdar bov mwwg nyuqm mam mwwlaqkam tuugab dvn, hvbmabde nyiidam bo akwg vnyiqkv swcw nvg ywwtwr nagub tuusam dvn.

²⁵Nyiidam bo kov mwwg ab gab hvvdwqnamv hoo hiyv mwam dwrbuqn bo ak gab kacaq-bviyaq dvn.

²⁶Jvqtw bo nyi akam xoonam si, ho alboam bulug al ko-gab jwwnamv almadwn.

²⁷Hiyv xeq mwwg agam mam cwqdwn hv cenglaqkam doogdvn, hoo hiyv hangv nyinyiaq dvn hoq nyi akv mwwlaq dvn.

²⁸Nyiidam sujaqkam hiyv gomd maadwn ham mwwlaqbo gob xidwn; hwdlo mwv mwwg agam mam gomtum yin, mwam mwwlaq-cenglaqbo gob hendwn.