Read Nyishi DOOTIN 18 Bible Online

DOOTIN 18 - Nyishi bible

DOOTIN 18

¹Hiyv xeq atv atam poopw gob mvdwn hv mwwg atwg mwwlwqkam meegaqdvn; mwv albo pw-hwwnam mwlwngam ceekol mvpial dvn.

²Nyiidam bov cenglaqkam hemp maadwn, hvbmabde mwwg mwwnam arongam gootwqdvn.

³Hwdlo nyic nyiangv haaikam, modu mins maanamvkam haadwn, hoo ximanam lvgab hvnywngv haadwn.

⁴Nyia kog agam gomcwrv iss ura hvb nyidwn; mwwlaqg subuqkv xudu bo iss kucw hvb nyidwn.

⁵Nyic gab mwwswnam si ho dvrwqbog jvqtw naasam mvturnamv almadwn.

⁶Nyiidam bog agamv bamy bepa dvn, hoo mwwg agamv yolungam goqa dvn.

⁷Nyiidam bog agamv mwwg yuug gv, hoo mwwg agamv mwwg yvj gab potongv.

⁸Jebs-japeqnam agamv dvngam bo dvnam hvb nyidwn; bulv gv aiyaq ura jaqb haadwn.

⁹Hiyv xeq mwwg bonam sepy dvn hv dvpaq twql doonbo mwwg bor ak hvb nyidwn.

¹⁰At Swg eminv hwngkw bo sojangv; jvqtw bo nyiv hoqb xarlwq dvn hoo bulam ywwk dvn.

¹¹Nyetbo nyi akwg gumnv mwwg hwngkw bo bopamv, hoo mwwg mwwnamv gurum ao bo hvb nyidwn

¹²Kvl jeema taab nyiig hangv lardwn, hvbmabde xinam otuqb yannamv haaco dvn.

¹³Hiyv akv otuqb hog tama taab agam goorwqdvn, hoqhv mwwg nyiidam bvla hvnywngv.

¹⁴Nyiig yalv vcam cwqtayin, hvbmabde mwwdwqbo hangam hiyv cwqnyi tayin?

¹⁵Mwwlaq-cenglaqbo hangv cenglaqkam nookum dvn, hoo mwwlaq bog nyurungv cenglaqkam meegaqdvn.

¹⁶Nyiig aky jinamv mwwg gab wrw mvko jidwn hoo mwam koibo tulug agaho boolin dvn.

¹⁷Hiyv akv otuqcob mwwg bvrwqkam bepa dvn hv aldvb kaadwn, hwdlo nyi asaqkv haal mwwg bvrwqkam bid maady deedib.

¹⁸Tak cingl kaanamv yolungam mvtur dvn hoo aiyinb huqlw baqnbo pengko lo pvvbam mvdwn.

¹⁹Vbw-borwg tamab nyimurnamv atorbo bopam akwg tumanam mam koi yaadwn, hoo yolu dunamv lvpw atwg dvvcw gurum nwqtumnam hvb nyidwn.

²⁰Nyiig agam niqtuq hoqgv mwwg kepongam xumt mvdwn, mwwg nvbcwr goolinam hoqgv mwv xumt dvn.

²¹Sinam mvla swwnamv lyolwg huqlw uraho doodwn, hoo hiyv ham aby dvn hoq aaxiam dvtayin.

²²Hiyv nywxw ak kaapa pan hv xinam mam kaapa pan hoo At Swg mwwsw nammam naadwn.

²³Jwwgw bov modul goodwn, hvbmabde nyetbov gamtor jaqb birwqdvn.

²⁴Nyi akwg ajin acamv yuupaqkams gvico, hvbmabde hvk ajin ak doodwn hiyv vbw-boram kam xibin yaadwn.