Read Nyishi DOOTIN 19 Bible Online

DOOTIN 19 - Nyishi bible

DOOTIN 19

¹Jwwgw nyi akwb nyitwl mwwg lootwb swwnamv bigw-begol goonbo hoo nyiidam nyi akam alyadwn

²Cenglaq maatwl mwwbinamv almadwn, hoo hiyv nyebiab mwwg lvpia lvgab dwql wdwn mwv mwwg lamtangam wxaqdvn.

³Nyiidam nyiingv mwwg lamtangam yuupaq mvdwn, mwwg hangv At Swn ceebio baqdwn.

⁴Gumnv vigo nitbo ajin boa dvn, hvbmabde jwwgw boam mwwg ajin nvkam tudwn.

⁵Xaalyo bo hvvkiv laqm-baqmab dooram, hoo hiyv vm mvvlin dvn hv keleq nyoram.

⁶Jiga bo nyi akam mwwsw kodwb nyiv vigo meegaqdvn, hoo aky jinbo nyi akam vxiv ajin dvn.

⁷Jwwgwbo nyi akwg vbw-bor mwlwngv mwam oyum dvn; hog hwdgo mwwg ajin tulungv mwwg galoqkv aado yindo! Mwv bulam agam lvgab alwb gumka sudo, hvbmabde bulam mwv bigum nyoma dvn.

⁸Hiyv xeq mwwlaqdvn hv mwwg atwg yvjam aby dvn; hiyv cenglaqkam pvvdwn hv alboam meepa tayin.

⁹Xaalyo hvvkiv laqm-baqmab dooram, hoo hiyv vm mvvlin dvn hv yuupaq tayin.

¹⁰Nyiidam bo gab xitor-xilo gob nyinamsi jubtaq maadwn, nyera akv lvpw atwg ko tuupwg aoho pvvb bwwl doog dvb pagoq anyo go dootwq dvn.

¹¹Alwb mwwlaqnamv nyi akam hang lengla mvma dvn hoo nyimuram kvvmwnamv mwwg yuunamv.

¹²Lvpw atwg hang lingtwrnamv sony nyot dorg dugumnam hvb nyidwn, hvbmabde mwwg mwwswnamv nwmw aoho gums doonam hvb nyidwn.

¹³Nyiidam bo kov mwwg abam yuupaq gvdwn, hoo bamy bekybo nywxwngv doody dimin twql doonbo hvb nyidwn.

¹⁴Nammam la gumnam ab tulu hoqgv nvvsiqdvn, hvbmabde mwwlaqbo nywxw akv At Swg hoqgv.

¹⁵Sepynamv yubngaql yubdwn, hoo jaama bo nyiv kano hentwram hentayin.

¹⁶Hiyv xeq pvvbam rvky dvn hv mwwg swwgam rvky dvn; hiyv mwwg atwg lamtangam haqpaqdvn hv sitayin.

¹⁷Hiyv xeq haareqb jwwgw boam jidwn hv At Swn cwwrwq dvn, hoo mwwg bon nyinam gab mwv mwam jikur tayin

¹⁸Noqg koam gwrnyiaqto, hoqho svqgwngv doodwn; mwam sim dvb noqg hangv mwwrwl ap maabv.

¹⁹Vcjaqb hang lengn bo nyi akv laqm baqky tayin, hoggab no mwam naalin baloqkam, no twq hvraqb nyiky dvb nyitayin

²⁰Tomswrnam mam tagabto hoo tomswrnam mam loorwqto, kuiyum mam no mwwlaqkam naatayin.

²¹Nyiv naleqgo mwol bonam mwws dvn, hvbmabde At Swg pagoqkv dootwq tayin.

²²Nyiig hang ura mwwbinamv tumanam abiam, vm mvvn boam jwwgwbo nyiv alyadwn.

²³At Swn bosnamv swwgab wg dvn, hoo hiyv xeq sam kaapa dvn hv xumt dvb doonu dvn; mwam hentwr-kaasv haaram.

²⁴Sepy bov mwwg alaqkam huku lo ilwqtvl doodwn hoo alaqkam mwwg agam hookam ikur nyoma tayin.

²⁵Bej-bepar boam laqm-baqmto, hoo damdam bov mwwlaq laqrab tayin; mwwlaq boam yolu ruqto, hoo mwv cenglaqkam naatayin.

²⁶Hiyv mwwg abam kwr-korwl yolu dudwn hoo mwwg annam ruqpaqdvn hoq kov hvnywngam la benyi-beyanam mam baqa dvn.

²⁷Ngoqg ko, tomswrnam mam tama baloqkam, hoo no cenglaq agam tulu hoqgv nyogaq gaqxar tayin.

²⁸Ximanam hvvkiv jvqtwngam bej-bepar dvn, hoo nyicig agamv bec-beyangam loodwn.

²⁹Bej-bepar boam haqpaq dvn, hoo nyiidam bo tulungam langk lo jwwdwb mwx-mvaq pakun.