Read Nyishi DOOTIN 2 Bible Online

DOOTIN 2 - Nyishi bible

DOOTIN 2

¹Ngoqg ko, no ngoqg agam tulu sam svgagvrwq baloqkam hoo ngoqg pvvb tulu sam noqg lvgab gumnwb pvvl apto,

²Mwwlaq sam noqg nyurungv ruucw-kwrgabto hoo cenglaqkam noqg hangam pwrga jito;

³vvjaq, noqg ura lo mwwlaq gab goqlin baloqkam hoo cenglaq gab noqg yalam vcib goqm to,

⁴no rupam meegaqnam hvb meegaq baloqkam hoo kvsil apnam gumnam meegaqnam hvb, meegaq baloqkam,

⁵hoq kokwb At Swn bosnam mam no cenglaq tayin hoo Pwnbog cenglaqkam kaapa tayin.

⁶Hoggab At Sw mwwlaqkam jidwn; mwwg agam hoqgv cenglaq kvla mwwlaqkv lengdwn;

⁷mwv albo mwwlaqkam jvqtw bo gab pvvj dvn; mwv svtam gob nyidwn hiyv lootw jaqb wdwn,

⁸jvqtw lamtangam rvky kidu dvn hoo mwwg xuqnam tulug wk lamtangam rvkil doodwn.

⁹Hoq kokwb dvrwqkam la jvqtwngam hoo albo lamta bvvx lo kvtaqjaqb nyinam mam no cenglaq tayin;

¹⁰hoggab noqg hang ura lo mwwlaqkv haatayin, hoo cenglaqnamv noqg yvjam hemp mvtayin;

¹¹hengabnamv noqg aoho rvky tayin, cenglaqnamv nam rvky tayin,

¹²nam almanbo lamtab hoqgv, agam gooxiaqbo nyi tulu hoqgv naalin tayin,

¹³hiyv jvqtw bo lamtangam apaq peel kan lamtab wdwn,

¹⁴hiyv alman boam nyidul dootwl hwnyir-hvmar dvn, hoo almab nyimurnam mam hemp dvn,

¹⁵hiyv nyi lamtangv almadwn, hoo hiyv bulug lamta lo surdvn.

¹⁶Hoqgab noyumnam nyem dvn ak hoqgv, bwwxinbo nyem akwg tangam dvb goonam hoqgv nam naalin tayin,

¹⁷hiyv mwnwg tuudy-yaamy swwbam mam apaqdvn hoo mwnwg Pwnbog agam goor kunam mam mwwpa kuma dvn;

¹⁸hoggab mwnwg nombug nilbo batam idu duku, hoo mwnwg lamtangv sigwb wknum;

¹⁹akjijaqkam hiyv mwnwg nammwb haanbov wkur kuma, hoo bulv hiyvkam swwg lamtangam kaapa paatin kuma dvn.

²⁰Hoqgab no albo lamtangam wtayin hoo jvqtw bo lamtangam pvvtayin.

²¹Hoggab dvrwqbov nyook sam doog tayin, hoo lootwb swwn bov hoq nyook ho doonyu tayin,

²²hvbmabde nyic nyin boam nyook soqgv mvpaq tayin, hoo xaalyo bo tulungam hoq ked hoqgv bupaq dvb nyitayin.