Read Nyishi DOOTIN 20 Bible Online

DOOTIN 20 - Nyishi bible

DOOTIN 20

¹Opo si nyij-nyipar gvnbov, poodwq bov cic-rwrwb yolu dugbov, hoo hiyam xeq booxar pan hoqhv mwwlaq maanbov.

²Lvpw atwg bos belamnamv sony nyot dorg dugum gumnam hvb nyidwn; hiyv xeq mwam bilukbov hv mwwg swwgam mwwpaq sudwn.

³Hiyv yolu dunam hoqgv aadob cengin dvn hv xinamv, hvbmabde nyiidam bo nyi vxiv yolu duky tayin.

⁴Sepy bov rongo mwd moodam mvma dvn; mwv vly naadwb meegaq tayin hoo naapa ram.

⁵Nyiig hanglo pagoq mwwnamv iss ura bo hvb nyidwn, hvbmabde cenglaqbov ham meelin tayin.

⁶Nyiv vigo mwwg atwg tumab abynam mam bekar dvn, hvbmabde dengky bo nyiam hiyv kaapa nyodwn?

⁷Jvqtw bo nyiv mwwg lootw ho wdwn mwwg ko tulungam mwwg kokwb xidwn

⁸Lvpw atv pw-hwwk pwqlw aoho dootwl almanbo mwlwngam mwwg vnyiq lvgab kooxub dvn.

⁹Hiyv bela dvn, “Ngoqg hangam ngo dvrwq dvb mvpa kun; ngoqg nyimur hoqgv ngo dvrwq dukun”?

¹⁰Kvtaqb jaaka maanam mvla kvtaqb xika maanamv vnyi-vnyiv At Sw gab bulum-kacnamv.

¹¹Mwwg swwcangv dvrwq bvla jvqtw dvn yv hvl, ko anyongamkam mwwg atwg nyinam tulu hoqgv mwam kaacin dvn.

¹²Tannan nyurungam hoo kaanan vnyiqkam vnyi-vnyiam At Sw pwpan.

¹³Yumiam aby maabv, hvbnyibalo no jwwgw tayin; noqg vnyiqkv nyiqbio to, hoo no dvsv naleqgo kaapa tayin.

¹⁴“Alma, Alma,” hvl rvnbongv bedwn, hvbmabde hwdlo mwv wggin yin, ham paqdwn.

¹⁵Hunv la xinam wlwngv naleqgo doos dvn, hvbmabde cenglaqbog agamv xinam gumnv.

¹⁶Kooxnam nyi ak gab gorgy naanbo nyi akwg vjam naato, hoo nyoodo nyiilu gab pvlyw dvb dingrnam mam nootu to.

¹⁷Vm mvvl dvs naanamv nyi ak gab tiiswr dvn, hvbmabde kokwngam mwwg agam lo wlw rooxo tayin.

¹⁸Mwonam mam tomswr-honynamv niqtuq nyilin dvn; tomswr tvl hingxw layil nyob panamv niqtuq doodwn.

¹⁹Hiyv xeq xwwkar bov kvsnam mam bepor dvn; hoqgab damab bejap-jabnbo akwg lvgab nyibam-wbam maabv.

²⁰Hiyv akv mwwg ab-annam beedy nyiloqkam, kan twdwqko ho mwwg muram miqmiq tayin.

²¹Nyirab pam nyebia jaqb otub naanbov vtwram xima dvb nyitayin.

²²Hvl bemabv, “Ngo alman boam ree daqtayin”; Hvbmabde At Swnvn kaaya to, hoo mwv nam naalin tayin.

²³Kvtaqb jaaka maanamv At Sw gab bulum-kacnamv, hoo xibium-xilumnamv almadwn.

²⁴Nyi akwg dwqkapv At Swg hoqgv; hvnyiloq nyiingv hoggub mwwg lamtangam cengnyi tayin?

²⁵“Soq si dvrwqdo” hvl nyebia jaqb benamsi, hoo mwwdy maab dingrnamv kokwngam pwd-poto gob nyidwn,

²⁶Mwwlaqbo lvpw atv nyic boam juuxuql juupaq dvn hoo bulug aoho cekangam riqjab mvdwn.

²⁷Nyiig yalv At Swg murv, mwwg hvvjw-hara mwlwngam meegaqdvn.

²⁸Tumab abynamv la dengkynamv lvpw atam pvvl doogdvn, hoo tumab abynam hoqgv mwwg pwqlwngam swwl doom dvn.

²⁹Nyijwr-yaapangam yuunamv bulug atoram, hvbmabde nyi axangam yuunamv bulug dum dumpunam mam.

³⁰Mwxwq dvb un mvgnamv alman boam mvpaqdvn; laqm baqnamv hvvjw-haarangam tac codwn.