Read Nyishi DOOTIN 21 Bible Online

DOOTIN 21 - Nyishi bible

DOOTIN 21

¹At Swg alaq lo lvpw atwg hangv iss pobu hvb nyidwn; mwv mwwg mwwlwqb ham tuukub-tuuxeq tomin mvdwn.

²Nyi vxig lamtangv mwwg atwg vnyiq kaagaho kvtaqdvn, hvbmabde At Sw hangam hengka dvn.

³Pwr jinam mam koi yaab dvrwq bvla jvqtwb dvb nyinam mam At Sw loobin yaadwn.

⁴Kaaneqnam vnyiq kvla larnam hangv, nyic-nyiag murv, hoo hv nyicv.

⁵Dengky jaqb mwwnamv kvxaqmab swwgam jidwn, hvbmabde nyiicwr-cwrxiv hiyv nyinam-nyica dvn hv jwwgw dvn.

⁶Vm mvvl gumn naanamv haapam hvb juupaq dvn hoo hv sigwg toggoqkv.

⁷Nyicig kwr-kornamv bulam nuupaq tayin, hoggab bulv hoggv jvqtw dvn ham nyidwb looma dvn.

⁸Nyimur bog lamtangv tuugw-baago dvn, hvbmabde jvqtwb nyinamv dvrwqdvn.

⁹Bamy bega bo nywxw lvgab namkin gob doom mam lingsam taabo bolyap golo doonamv alyadwn.

¹⁰Nyicig yvjv alman boam mwwby dvn; mwwg door-doopwngv mwwg vnyiq ho ayanam mam kaapa maadwn.

¹¹Hwdlo bej-bepar boam laqm-baqmyin, dama bov mwwlaq dvn; hwdlo mwwlaqbo nyi akam tomswr yin mwv cenglaqkam naadwn.

¹²Dvrwqbo Akv nyic bog nammam kaal doodwn; mwv nyic boam yuupaq dvb mvgeq lodwn.

¹³Hiyv nyiv jwwgw bog xabnam mam mwwg nyurungam piitum dvn, mwv atv kam sogoq goqtayin hoo nyi akam goqrwqram.

¹⁴Kvsil aky jinamv haaxaqkam jinyup dvn, hoo kvsil kam jinamv hang lengl bioql doon boam munyiub dvn.

¹⁵Hwdlo jvqtwngv nyiyum yukun, soq si jvqtw bog gab hemp dvb nyidwn hvbmabde almab nyinbo tulu gab bosnamv.

¹⁶Hiyv akv alwb mwwlaq hoqgv nyogaq gaqxardvn hv sin bog dookumko ho doonu tayin.

¹⁷Hiyv xeq hemp-hengam mam aby dvn hv jwwgwbo nyi akwb nyitayin; hiyv opongam la kutiam aby dvn hv nyet tvla ram.

¹⁸Nyicv dvrwqbo gab, hoo jvqtw gab nyepin bov pvlyw nanv

¹⁹Bamy bega bo la pwc-potbo dvn lvgab doom mam lingsam diixa-rara lo doonamv alyadwn.

²⁰Xinam gumnv la kutiv mwwlaqbo nyi akwg dook ho doodwn, hvbmabde nyiidam bo nyi akv ham muiyu-mvca dvn.

²¹Hiyv xeq jvqtwngam la ayanam mam wmin gvdwn, hv swwgam, jvqtwngam, hoo xinam mam kaapa tayin.

²²Mwwlaqbo nyi akv atorbog bopam mam xika dvn hoo bulug mwwgwl cwwgw nannam mvgeq loodwn.

²³Hiyv mwwg agam mam la mwwg lyolam mwv atv mvtur dvn hv vs-axaq hoqgv aado dvn.

²⁴“Benyi-beyanam si” larnbog eminv, larnbo nyiv atam paqsul bon nyidwn.

²⁵Sepy bog mwwbinamv mwam mengdwn, hoggab mwwg alaqkv bon nyidwb mwwma dvn.

²⁶Aal loopwngam mwv nyinw-wnw twqdwn, hvbmabde jvqtw bov jidwn hoo ham nootul doog maadwn.

²⁷Nyic bog pwr jinamv bulum-kacnamv; hvbnyiloqkam mwv almab mwwtwl aky bwa jinamv hog hwdgo bulum-kac dvb nyidwn.

²⁸Xaalyo hvvkiv yuupaq tayin, hvbmabde nyi akwg agam mam hiyv tapa dvn hv dooyu tayin.

²⁹Nyic bo nyiv haakam alwb nyuqm kaakin dvn, hvbmabde jvqtw bov mwwg lamtangam mwwka coodwn.

³⁰Mwwlaqnamv, cenglaqnamv, tomswr-honynamv, At Swn vcwr gokam ceeko nyoram.

³¹Svpuram nyob pad aalam nyob pan dvb mwx-mvaqdvn, hvbmabde mviyanamv At Sw gv.