Read Nyishi DOOTIN 22 Bible Online

DOOTIN 22 - Nyishi bible

DOOTIN 22

¹Albo eminam xuqnamv nyet tvpurnam mam alyadwn, hoo mwwswnamv rupam la hunam alyadwn.

²Nyetv la jwwgw bov lvkin doobam dvn; At Sw bul mwlwngam bvl Pwnbov.

³Mwwlaqbo vs-axaqkam kaapa tvl mwv atv kvsdvn, hvbmabde dama bov wtw kwlwl wdwn hoo hoq gab hentwr hendwn.

⁴Yan bvla At Swn bosnam akiv nyet, xinam hoo swwgv.

⁵Tuugw-baago bog lamtangv taa bvla pwd-poto gob nyidwn; hiyv nyiv mwwg yvjam rvkil pvvdwn hv hoq tulu hoqgv aado tayin.

⁶Ko akam hvbjaq lamtangam tomswr-hony to mwv hoggub swwiyin dvn; hwdlo mwv akam yukam mwv hoqham apaqram.

⁷Nyet bongv jwwgw aolo pvvb bwwl doogdvn, hoo kor ceenbov cwwrwq bog nyerab swwdwn.

⁸Hiyv xeq jvqtw maanam vliam liitayin hv dwr-kanongam naatayin, hoo mwwg vcjaqb hang lengnamv niqtuq lengram.

⁹Hiyv xeq kvvyw-tada nan vnyiqkv doodwn ham lvqc citayin, hoggab mwv mwwg dvsam jwwgw boam horl dvgdvn.

¹⁰Benyi-beya boam ruqpaq baloqkam, hoo jwwnamv dookram, hoo yolu dunam mvla bec-beyanamv nyiitayin.

¹¹Hiyv dvrwq hangam aby dvn, hoo hiyvg goonamv aya dvn, hv lvpw atam mwwg ajin gob mvtayin.

¹²At Swg vnyiqkv cenglaqbo aoho rvkil doodwn, hvbmabde nyepinbo gomcwr tulungam mwv haqpaqdvn.

¹³Sepy bov bedwn, “Lvvg v sony nyot dorg doodo! Ngam lyobu tulug ura alo meng tai!”

¹⁴Noyumnam dvn tulug agamv ung ura jaqn bo hvb nyidwn; hiyam At Sw haaxaqdvn hoq urab yoqlwq tayin.

¹⁵Ko anyog hang lo mwwcin maanamv doodwn, hvbmabde dvvcw lvgab gwrnamv hoqham mw galoqkv aadob mvpaqdvn.

¹⁶Hiyv xeq jwwgw boam nyijab-nyiyiql mwwg atwg gumnam koidvb mvca dvn, ho nyet boam jidwn, hv jwwgwb swwtayin.

¹⁷Mwwlaq bo tulug gamlam, no ruucw kwrgabl tato, hoo ngoqg cenglaqkam noqg hang ho nyinto,

¹⁸hoggab hoq mwlw ham noqg nvbcwr lo mwx-mvaql noqg uralo no pvvbnyiloqkam, hoqhv nam hemp pog tayin.

¹⁹Ho noqg mwwgwngv At Swg aoho dootayin, nam kam, ngo soq tulu sam soolo cengm dvb mvpa kun.

²⁰Noqgab ngo cammum go niitin tingl tomswr-honynam mam la cenglaq deenam mam xeqma namyv,

²¹hoggv kvtaq bvla jvqtw dvn ham nam cengm dvb, ho hiyv nam kanam boam no jvqtwngam goorwq dvb nyiyi nvpv?

²²Jwwgw boam naareq maab, hoggab mwv jwwgw bov, ho toggoqho hentwr-kaas boam mucu-mviya maabv,

²³hoggab At Sw bulug pagoqkam kaatayin hoo hiyv bulam naareq dvn bulug swwgam naareq tayin.

²⁴Haaxaq xaqga bo nyi lvgab ajin jengmabv, ho hang lingtwr bo nyi lvgab wbam kamabv,

²⁵hvb nyibaloqkam no mwwg lamtangam kaag yindo hoo no atv hoq poto ho haatayin.

²⁶Dingsam-dingyam dingn bo, hoo ceego dod gab ai pvvnbo ak hvb nyimabv.

²⁷No hog jis dooma nyiloqkam, hoggab noqg kartam nanam noqg ura hoqgv hoggub naala kindwn?

²⁸Kol-kolwg noqg ab tulug mwrwl apnam gvda vrram biim mvmabv.

²⁹Mwwg bonam pwbwb nyilaqbo nyi ak no kaapa dvi yv? Mwv lvpw at tulug agaho daqtayin; hvbmabde mwv mwwdar-mwwpar maanbo nyi tulug agaho daqram.