Read Nyishi DOOTIN 23 Bible Online

DOOTIN 23 - Nyishi bible

DOOTIN 23

¹Hwdlo no pvvb bwwl doog bo lvgab dvtab doayin, noqg agaho hiyv doodwn ham hingkib kao cooto,

²hoo no dvlam bo gonyiloqkam cwqg dvl noqg dvnwnam mam dvto.

³Mwwg dvngam jaqb dvnam mam mwwby maabv, hoggab hoq dvnam tuluhv hoonyoqnamv.

⁴Gumn naadwb hentwrl mwwdwq dwqmabv; hvbmabde atv pwbwb mwwlaql mvtur to.

⁵Hwdlo noqg vnyiqkv gumnam piodaq kalam, hoqhv haqmapaqb alap hwrlinl, doa aob xookam jaanam hvb jaacal niidkun.

⁶Kiic bo nyi akwg dvsam dvmabv; mwwg dvngam bo dvsam mwwby maabv,

⁷hoggub mwwg hang urangv hwwdy-hwwdil hwwka coonbo ak hvb nyidwn. “Dvto hoo twwto!” Mwv bes dvn, hvbmabde mwwg hangv noqg lvgab dooba maadwn.

⁸Noqg anyo go dvknam mwlwngam, no baalin xaatayin, hoo noqg tangam bo gomcwr benamv bepaq-beyaq dvn.

⁹Nyiidam bo akwg taga lo agam goomabv, hoggab mwv noqg alwb mwwl goonam mam haqpaq tayin.

¹⁰Kolwg nyook vrram muk-mviya maabv ho ab dooma bo rongo ho haamabv,

¹¹hoggab bulam pvlyw bov ator dvn; mwv nulug pagoq gab nam ceeko boam ceetor tayin.

¹²Tomswrnam ho noqg hangam nyinto hoo cenglaq bog gomcwr tuluho noqg nyurungv tagabto.

¹³Gwrnyiaq deenam ko akam gwrnyiaq maab apaqmabv; mwam no dvvcw lvgab jwwsjaqkam, mwv siram.

¹⁴No mwam dvvcw lvgab jwwb nyiloqkam, no mwwg yvjam Sux-ywlw nyook hoqgv ywwlin tayin.

¹⁵Ngoqg ko, noqg hangv mwwlaq baloqkam, ngoqg hangv kam hemp potayin.

¹⁶Hoggv jvqtw dvn noqg nvbcwrv ham gooikam ngoqg hvvjw-harangv hwrcw tayin.

¹⁷Noqg hangv nyic nyinbo tulungam kaaby maabv, hvbmabde aal looxiam At Swn bos gvdwl dooky tvka.

¹⁸Hoggub nyijaqkam swwg ak doodwn, hoo noqg mwwgwngam mvpaqram.

¹⁹Tato, ngoqg ko, hoo mwwlaqto, hoo noqg hangam lamta alkob mwwmto.

²⁰Opo twwxum bo la vdin dvlam bo tulug pengko ho yvmabv,

²¹hoggab twwxum bov la dvlam bov jwwgw tayin, hoo sepy bo tulungv vj jiiyinam kootayin.

²²Nam swwg jinbo noqg abwg benam mam tato, hoo noqg annam xox yukam mwnwn haqpaqmabv.

²³Jvqtwngam rvto, hoo ham puqmabv; mwwlaqkam, cenglaqkam, hoo tomswrnam mam rvto.

²⁴Jvqtw bog abv vcjaqb hwnyir-hvmar tayin; hiyv mwwlaq bog ko akwg abwb swwdwn hv mwwg aoho hemp tayin.

²⁵Noqg abam la annam hemp pomto; hiyv nam dwrbuqn bo annam hwnyir-hvmar mvmto.

²⁶Ngoqg ko, noqg hangam ngam jitwb, hoo noqg vnyiqkv ngoqg lamta tulungam kaagab mvmto.

²⁷Hoggab meqjo bo akv bur ungngv; bwwxin bo nyemv hwrnyi ung hvb nyidwn.

²⁸Mwn dvco coly laqlaqbo hvb tooiyal doodwn hoo nyia ko pengko lo puqmin sunam mam vi yaiya mvdwn.

²⁹Hiyv almadwn? Hiyv mwwdwq dvn? Hiyv yolu dudwn? Hiyv supdvn? Hiyv pagoq doomabv un gvdwn? Hiyv vnyiq nyiqlw dvn?

³⁰Hiyv opo twwky bov; hv opo twwxum dvn.

³¹Hwdlo opongv lwwcw yin, hwdlo hoqhv pvtaq uraho toqdu-taqbab yin, hoo twwngam alwb twwlwqnam mam, kaamabv.

³²Vtwr-anyangam hoqhv tvb cenam hvb nyidwn hoo tvi-taga ponam hvb nyidwn.

³³Noqg vnyiqkv koom-kaaxa tayin, hoo noqg hangv almanbo pagoqkam goolin tayin.

³⁴Noqg vnyiqkv koom-kaaxa tayin, hoo noqg hangv almanbo pagoqkam goolin tayin.

³⁵“Bulv ngam jwwnum,” no betayin, “hvbmabde ngo un gvma; bulv ngam jwwnam, hvbmabde ngo ham hempa maanam. Hwdlo ngo huurab yin? Ngo hvraqb twwtayin.”