Read Nyishi DOOTIN 24 Bible Online

DOOTIN 24 - Nyishi bible

DOOTIN 24

¹Almanbo nyiilungam kaaby maabv, ho bulug lvgab doomin gvdwb mwwby maabv,

²hoggab bulug hangv kwr-korwb mwwdwn, hoo bulug nvbcwrv vs-axaqkam goodwn.

³Mwwlaq hoqgv nammam mvdwn, hoo cenglaq hoqgv nammam biima dvb mvdwn;

⁴cenglaq hoqgv nam ura lo hog mwlw xinam mam la hempnam nyetam nvvlwqdvn.

⁵Mwwlaqbo nyi akv ator jaqdvn, hoo cenglaqbo nyi akv mwwg atoram ator yaiya dvb mvdwn,

⁶hoggab mwwlaq bov nyig baloqkam no noqg nyobam pato, hoo naleqgo tomswr-hony bo dooikam mviyanamv doodwn.

⁷Nyiidam bov mwwlaqkam mwwc lama dvn; toggoq lo mwv mwwg agam mam gamkoq maadwn.

⁸Hiyv xeq almab nyidwb mwwdwn ham nyic bov hvl goqtayin.

⁹Nyiidam bog nyidwb mwwnamv nyicv, hoo benyi-beyanamsi nyia ko gab bulum-kacnamv.

¹⁰No vs-axaq aalam singaq baloqkam, noqg atorv anyo dvn.

¹¹Sim dvb bool wgnam tulu ham ywwlin to; mengtab bool wgnam mam doqtum boam siitu to

¹²“Kaato, ngulv soq sam cengma,” hvl no bebaloqkam, hangam jaaka bov hoq mwwnam mam cengram yv? Noqg yvjam rvkybo akv ham cengram yv, hoo mwwg bonam nyinam hvbkalam nyi akam mwwg nyijongam jiram yv?

¹³Ngoqg ko, tong ngolangam dvto, hoggab hoqhv aldvn, hoo tong ngola dilin bov noqgab dvngaml tiiswr dvn.

¹⁴Noqg yvjv cengto mwwlaqnamv soq sib nyidwn; no ham kaapa baloqkam, hoqhv kuiyumg swwgv, hoo noqg hingwnam mam mvpaqram.

¹⁵Nyicbo nyi akv dvrwq boam ceebio baql kaaya yaal doonam hvb nyimabv; mwwg imiqkam yolu-swcin duqmabv;

¹⁶hoggab jvqtw bov kvn go yoql jaqkam hoo hvraqb lokta gorab dvn, hvbmabde nyic bov vs-axaq moodam dwqtup dvn.

¹⁷Hwdlo noqg ceebiongv bwdw hool yin tob-tai maabv, hoo hwdlo mwv dwqtup yukam noqg hangv hemp maabv,

¹⁸hvbnyiba loqkam At Sw sam kaatwl hoo hempram, hoo mwwg haaxaqnamv mwam xaqk ram.

¹⁹Almab nyinbo tulu gab no atv mwwdwq sumabv, hoo nyicam kaaby maabv,

²⁰hoggab almanbo nyiingv kokwngam swwg dooram; nyicbog hutongam mwmiq tayin.

²¹Ngoqg ko, bosto At Sw nvla lvpw atam, hoo luusaqb nyinbo lvgab nyimin gvmabv,

²²hoggab haqmapaq galo bulug hoqgv ciqcaq-bviyaqkv nyirab tayin, hoo hiyv cengdwn yuupaqnamv kam bulug hoqgv haakam suiyv?

²³Soq tulu siikam mwwlaq bog niitin tinam tulungv. Mwwswl pw-hwwnamv almadwn.

²⁴Hiyv xeq nyic boam, “No jvqtw do,” hvl bedwn, ham nyiilungv beetayin, nyob luuxiv nooyum tayin,

²⁵hvbmabde hiyv nyic boam yolu ruqnbo tulungv hemp tayin, hoo albo lvqcv bulug aoho haatayin.

²⁶Hiyv xeq jvqtwb birwq dvn hv nvbcwram moopup dvn.

²⁷Lvvg ho noqg bonam mwx-mvaqto; rongo ho noqgab hog luuxiam mwx-mvaqto, hoo hoq kokwb noqg nammam mvto.

²⁸Noqg door-doopwngam pagoq doomab ceebio baql hvvky swwmabv, hoo noqg nvbcwr lvgab vm mvvma maabv.

²⁹“Mwv ngam nyinam hvb ngo mwam nyirwq tayin; hoqgv mwv nyipan, ngo nyi akam ree dvqlwq tayin.” Hvl bemabv.

³⁰Ngo wpeqnum, sepy bo akwg rongob, mwwcin maanbo nyi akwg roo boolub,

³¹hoo kaato, taa-ngv hog mwlwngam pooyub kunum; deelangam pos-poi lvgab tomyup kunum, hoo hoqg wlw sulungv yaql kunum.

³²Ho ngo kaanum, hoo ham mwwkanum; ngo kaatwl hoo tomswrnam mam cengnum.

³³Anyo go yubnamv, anyo go yubngaqnamv, anyo go alaq cikwq-lvqlwqtvl doonunamv,

³⁴hoo jwwgwnamv noqg aoho dvco coly laqlaqbo hvb haatayin, hoo nyi ak illy-uppuq baqtwl haanam hvb haatayin.