Read Nyishi DOOTIN 25 Bible Online

DOOTIN 25 - Nyishi bible

DOOTIN 25

¹Solomonwg dootin tinam tulu sam Judag lvpw at Hejekiyag nyiilungv xiqsiqnum.

²Pwnbog yuunamv soq pagoq tulu sam kvsdvn, hvbmabde lvpw at tulug yuunam pagoqkam meelin dvn.

³Doa aog namtvb, hoo swcw urag namhvb, lvpw at tulug hangam miic lama dvn.

⁴Rup hoqgv kacbongam naapaqto, hoo duk-dvrab pam pwnbov yip pwn nanam doogdvn;

⁵lvpw atwg dook hoqgv nyic boam naapaqto, hoo jvqtwho mwwg pwqlwngam mvko tayin.

⁶No atv lvpw atwg dook ho dvqlwq maabv, ho koibo agaho daqmabv,

⁷hoggab, “Soqb caato,” hvl goqknamv alyadwn xinam akwg dook hoqgv akob roopoq konamv. Hoggv noqg vnyiqkv kaapa kun

⁸ham nyebia jaqb nyel pukumb baqa maabv, hoggab hoggv no vtwr-anyangam nyitayin, hwdlo noqg door-doopwngv nam hvnyw moolw dvb mvikam?

⁹Noqg bvrwq goosam noqg door-doopw lvgab mwam gooto, hoo asaq ura bvrwqkam bepor maabv,

¹⁰hvb mabalo hiyv nam tanbov noqg aoho hvnyw boqpup dvn, hoo nam almab yuunamv yuutwr dooram.

¹¹Kvtaq gomcwr goonamv rupho hun tvkam tengtaq namhvb nyidwn.

¹²Mwwlaqbo akwg tomswrl yolu ruqnamv tagab bo nyuru gab hun lvqc hvbmalo hun oj hvb nyidwn.

¹³Dengkib pui baqnbo akv mwam kanam boam vly nvvd moodam tapam hviyiqnam hvb nyidwn; mwv mwwg nyiit atwg yvjam hwrcw mvdwn.

¹⁴Hiyv nyi akv larl mwwg akiam nyi asaqkam jima dvn hv doomwq kvla dooiyv yistvl nyodo homa namhvb nyidwn.

¹⁵Pvvb bwwl doogbo akv cwqnam lvgab pvvbam mvi nvpv, hoo hoonyuml goonamv alongam durtu mvtayin.

¹⁶No tongngam kaapa baloqkam, noqg xumt dvb aro dvto, hvbmaba lo no ham dulwq sujaqkam ham baalinl baapaq dvn.

¹⁷Noqg lvpiangv noqg door-doopw ho lok-lokob wtwq to, hvbmaba lo mwv nam kaaram-tacam layil hoo nam oyum dvn.

¹⁸Hiyv nyiv mwwg door-doopwngam ceekol xaalyob hvvky jidwn hv nyob panan svtam, ho lyoqr orioq, ho uppuq hvb nyidwn.

¹⁹Xaalyo bo nyiam vs-axaq moodam mwwgwnamv exy yaqpaqbo ho lvpia duleq geqnam hvb nyidwn.

²⁰Hang vdw bo gab bemin benamv swkwr aalam vj pipaqnam hvb nyidwn, hoo pooxu bo twws hvb nyidwn.

²¹Noqg ceebiongv kano dvnyiloqkam, mwam dvs loq dvm dvb jito, hoo mwv hvngwr dvnyiloqkam, mwam iss twws loq twwm dvb jito,

²²hoggab no mwwg dumpo lo yaql doonbo mopiongam yvqlwq tayin, hoo At Sw nam lvqc citayin.

²³Nyoosw daiyag dooiyv nyodongam baqa dvn, hoo xwwko-xwwpeq bo lyolv, kaaxaq-taxaq dvb yolu xwwpa dvn.

²⁴Bamy bega bo nywxw lvgab namkin gob doom mam lingsam taabo bolyap golo doonamv alyadwn.

²⁵Dool nyook hoqg tugu puiyv, hvngwrl doonbo yvjam iss hviyiqbo jinam hvb nyidwn.

²⁶Dvrwqbo nyiv nyicbog agaho jipaqnamv lyuj ked bvla jolw iss tolinbo hvb nyidwn.

²⁷Vigo tong ngolangam twwnam si hvvcw dvn, ho atam paqs bov poqlyu sudwn.

²⁸Atv atam mutur suma bo nyi akv yaqpia-yaqya hoo sulu nwqtum maanam bopam hvb nyidwn.