Read Nyishi DOOTIN 26 Bible Online

DOOTIN 26 - Nyishi bible

DOOTIN 26

¹Dugam tapam yaqnam, ho vly nvvdam nyodo honam, hvbkalam nyiidam bo ak gab xinamsi jubtaq maadwn.

²Pwdw jarnam hvb, jarjo ywwtwl dvsam meqnam hvb, bikub doomab beenamv jardaq maadwn.

³Svpur gab jwwnan xoociqkv, svdam gab twqnan svxangv, hoo nyiidam bo langk gab yoqnyw swwxongv.

⁴Nyiidam bo akam mwwg nyiidam hvbkalam goorwq maab, hvbnyiba loqkam no atv mwwg hvbkalam nyis nvpkv.

⁵Nyiidam bo akam mwwg nyiidam kalam hvb goorwqto, hvbnyima baloqkam mwv mwwg vnyiqlo mwwlaqbo hvb nyiyi nvpv.

⁶Hiyv xeq nyiidam bo akwg alaqlo pui jilwq dvn hv mwwg atwg lvpiangam pasdvn hoo yolu-swcinam goqlwqdvn.

⁷Nyiidam bo tulug dootin agamv, lviya tvl boiyo bo hvb nyidwn.

⁸Nyiidam mam hiyv xidwn hv swwso lo wlw riiyonam hvb nyidwn.

⁹Nyiidam bo tulug dootin agamv twwxum bo akwg alaqlo taa dulwqnam hvb nyidwn.

¹⁰Gaqjam bo nyiidam mabalo twwxum boam ree goqnam hv abnbov nyi vxiam un abgnam hvb nyidwn.

¹¹Ikiv atwg baapnam mam dvnam hvb nyiidam bov mwwg nyiidam mam nyitin dvn.

¹²Hiyv atam mwwlaq bob mwwg vnyiq hoqgv kaas boam no kaas i? Hoq nyi akam hingw mam lingsam nyiidam boam hingwnamv koi yaadwn.

¹³Sepy bov bedo, “Vly lamta v sony nyot dorg dootum do! Lamta bvvx vv sony nyot dorg daqxa do!”

¹⁴Viyap ciqwi-ciqca ciqnam hvb, sepy bov mwwg kartam nan aoho kardwn.

¹⁵Sepy bov mwwg alaqkam huku lo ilwq dvn; ham mwwg agam lo hoqlwq dvd bvkam mwv mwwram dvn.

¹⁶Nyi kvnv mwwcil goorwqnam mam hilayab sepy bov mwwg atwg vnyiqkv mwwlaq yaadwb kaadwn.

¹⁷Mwwg atwg yolu mvma tvl, hiyv yolu duk ho haqmin gvnbov, wpeq bo iky nyurungam nootu bo ak hvb nyidwn.

¹⁸Rugaqbo nyi ak hvb hiyv mva tuqbiaq dvn, uppuq abdwn, hoo sigam haam dvn

¹⁹hoq nyi ak hv mwwg door-doopwngam xaalyol bedwn, hoo begamv, “Ngo soos dvn lak!”

²⁰Wsw dooma ko-gab wmv miqdwn, hoo hogloq ho xwwko-xwwpeq bov dooma dvn, hoqho yolungv nyiidwn.

²¹Mopiongv og hwrg namhvb hoo wm ho wsw hvb, yolu duga bo nyiv yolu dunwl raarab dvn.

²²Xwwko-xwwpeq bog gomcwrv lyomeq twqdwb dvngam bo hvb nyidwn; hoq tuluhv gv ura jaqb haadwn.

²³Hangv almatwl nvbcwrv vvjaq-umjaq mwwdwb goonbov deekam pwcwngam moily toolubnam hvb nyidwn.

²⁴Hiyv xeq oyum dvn mwwg atam nvbcwr lvgab bibum-biyiq sudwn hoo mwwg hanglo vm mvvnam mam pvvcum dvn;

²⁵hwdlo mwv tangam aldvb gooikam, mwam tvjw maabv, hoggab mwwg hanglo kvn go bulum-kac dvb nyinam mam doogdvn;

²⁶surnam lvgab mwwg oyumnam mam mutum sujaqkam, mwwg nyic-nyiangam dookumko ho dupur tayin.

²⁷Hiyv ung dudwn hoq urab holwq tayin, hoo hiyv wlwngam duqrab mvtayin wlwngv mwam duqmin gvdwn.

²⁸Xaalyo bo lyolv xaalyonam akam oyum dvn, hoo benyioqnam agamv dubg dvn.