Read Nyishi DOOTIN 27 Bible Online

DOOTIN 27 - Nyishi bible

DOOTIN 27

¹Aaram gab larma bv, hoggab aaram hoggv haatan ham no cengma dvn.

²Nyi asaqkam nam paqmto, hoo noqg atwg agam hoqgv ma; nyoodo nyiingam paqmto, hoo noqg atwg nvbcwr hoqgv ma.

³Wlwngv vgw dvn, hoo xuqxiv vi dvn, hvbmabde nyiidam bo akwg hang biluqnamv vnyi-vnyiam vgw yaadwn.

⁴Hang lingtwrnamv kwr-kor dvn, haaxaqnamv vcjaqb almadwn, hvbmabde kaaneqko agaho hiyv daqnyi tayin?

⁵Kvsil abynam mam yolu ruqpurnamv alyadwn.

⁶Ceebiog naleqgo moopupnam mam; dengky bo ajin gv laqmv mwwjw dvb alyadwn.

⁷Dvdeq bo akv tong ngolangam kam mwwram dvn, hvbmabde kano bo ak gab kacaqbo mwlwngv tiiswr dvn.

⁸Nyiv mwwg imiq hoqgv gaqlin bov, pvtangv osup hoqgv jarxarbo hvb nyidwn.

⁹Kutiv la sungam bov hangam hemp dvb mvdwn, hoo mwwg tangam dvb tomswr-honynamv dengky bo ajin ak hoqgv haadwn.

¹⁰Noqg ajinam la noqg abwg ajinam tumabv, hoo noqg vs-axaq moodam noqg vbw-bor nammwb wmabv. Aado hoq doonbo vbw-boram koc hoq door-doopwngv alyadwn.

¹¹Mwwlaqto ngoqg ko, hoo ngoqg hangam hemp dvb mvto, hiyv ngam yolu ruqyin ngo mwam goorwq nyotayin.

¹²Mwwlaq bov sigam kaapa tvl mwv atv kvsdvn, hvbmabde dama bov wdwn hoo hoq gab hentwr hendwn.

¹³Nyi akwg vjam naato hwdlo mwv nyoodo nyi ak gab huta-tan yin, hoo bwwxinbo nyem gab mwwg dingrwl apnam mam nootu to.

¹⁴Arkomcam gorab layil, hiyv mwwg door-doopwngam sogoq goql paqdwn, ham beenam gob xitayin.

¹⁵Nyodo jaajangv vj jaanyiaqnam hvb dvn bvjaqpv nywr joxdvn;

¹⁶mwnwg mvtur tanamv dooiyam mvtur tanam hvb nyidwn ho lvqbwq alaq lo kutiam yumgab tanam hvb nyidwn.

¹⁷Yoqdwrv yoqdwram pwreqdvn, hoo nyiv-nyiam tomswr mins dvn.

¹⁸Hiyv taoq svvnam sodwn hv hoq aaxiam dvtayin, hoo hiyv mwwg atam rvky dvn ham xitayin.

¹⁹Iss lo nyuqm mam kaapa namhvb, hvbkalam nyiam nyiig hang hoqgv kaapa dvn.

²⁰Sux-ywlw nyookv la Bvdo-gangkongv nywywngam xumt maadwn, hoo nyiig vnyiqkv nywywngam xumt maadwn.

²¹Rupam loora lo jiqxor mvdwn, hunam wm xvwr jwr-jwrnam ho jiqxor dvn, hoo mwam paqnam hoqgv nyi akam kaacin dvn.

²²Am-temiam xumwqnam lvgab nyiidam boam cvngpar lo xunyia (fungi) lvgab xumwqnum, hvbsujaqkam mwwg nyiidamv mwwg hoqgv wleqram.

²³Noqg sviya tulug vi-acangam pwbw jaqb cengto, hoo noqg sibin-svvngam alwb kaato,

²⁴hoggab nyetv nwrba gob dooyu maadwn, hoo hosiq-hosiq xaqb ywr dumtupv dooky tai nvi yv?

²⁵Hwdlo nwmwngam peexo yin hoo nitib jurlin dvn hoo yorn puutug nwmw-nwsinam boqkum dukun,

²⁶sviya tulungv nam vj koosam jidwn, hoo sibin tulungv rongongam rvndvn.

²⁷Noqg nam nvmpwg dvsam hoo noqg nyem ko tulungam cin-hoon dvb, sibin gwwiyv naleqgo noqg dvs gob dootayin.