Read Nyishi DOOTIN 28 Bible Online

DOOTIN 28 - Nyishi bible

DOOTIN 28

¹Nyiv ruqmin gvma jaqkam nyic bov kedwn, hvbmabde jvqtw bov sony nyot ak hvb haakam dvn.

²Hwdlo gvdangv nyic nyiyi kam, hoqho pvvb bwwl doog bov naleq dvn, hvbmabde mwwlaqbo la cenglaqbo nyi akwg nyignamv biimab dooyu tayin.

³Jwwgwbo nyi akv jwwgw ajinam nyijab-nyiyiqnamv nyodo hoodul dootwl dvs dooma namhvb nyidwn.

⁴Hiyv pvvbam haqpaq dvn hv nyicam paqdwn, hvbmabde hiyv pvvbam pvvdwn hv nyicam ceeko dvn.

⁵Almanbo nyiv jvqtwngam cengma dvn, hvbmabde hiyv At Swn meegaq dvn hv hog mwlwngam cengdwn.

⁶Nyet sutwl hiyv nyiig lamtangv tuugw-baago boam jwwgw sutwl mwwg lootw lamtab wnbo nyi akv alyadwn.

⁷Hiyv akv pvvbam pvvdwn hv cenglaqbo ko tuupv, hvbmabde dvlam bo ajin tulungv mwwg abam hvnyw-moolw mvdwn.

⁸Hiyv xeq mwwg cwwrwqnam hoqgv bebinl naabinl gumn naadwn hoo niqtuq lengm dvn hoqhv jwwgw boam jiga bo gab door tip jiya dvn.

⁹Hiyv mwwg nyurungam pvvb hoqgv nywpaq dvn, mwwg swgwnamv kam bulum-kacnamv.

¹⁰Hiyv jvqtw boam alman lamtab wxaq gvnbov mwwg atwg ung urab holwq tayin, hvbmabde timb maanamv albo otungam nvvsiqtayin.

¹¹Nyetbo nyiv mwwg atwg vnyiq kaanamho mwwlaq gob mwwdwn, hvbmabde cenglaqkam doogbo jwwgw nyiv mwam meelin tayin.

¹²Hwdlo jvqtwbongv mviya yin, vcjaqb yuudwn, hvbmabde hwdlo nyic bov swwrab yin, nyiilungv atam kvs sudwn.

¹³Hiyv mwwg nyimuram pvvs dvn hv swwla-geela ram, hvbmabde hiyv ham bepor dvn hoo apaqdvn hv ayanam mam naatayin.

¹⁴Hiyv akv At Swn bos soky dvn hv xinam jaqkv, hvbmabde hiyv mwwg hangv tamy dvn hv vs-axaq uraho holwq tayin.

¹⁵Nyic bov jwwgwbo nyiilu aolo pvvb bwwl doognamv sony nyot dugum namhvb hvbmalo sutumv ruqmin gvnam hvb nyidwn.

¹⁶Hiyv cenglaq maab pvvb bvvl doogbo akv kwr-korwl nyijab-nyiyiq bob nyidwn, hvbmabde hiyv nyibum-nyiywl naanam mam oyum boam mwwg aalam swwyu dvb vbw jitayin.

¹⁷Nyiv nyi asaqkam ywlw-swtw twwtvl mwwdwq bov, mwwg sima deedib kekar yvtayin; hiyvkam mwam svka maabv.

¹⁸Hiyv xeq lootwb wdwn ham ywwlin tayin, hvbmabde hiyvg lamtangv tuugw-baago dvn hv nyebia jaqb yoql tayin.

¹⁹Hiyv xeq mwwg kedam nyis tulungam nyidwn hv dvsv naleqgo dootayin, hvbmabde hiyv niqtuq dooma boam wmin gvdwn hv vigo jwwgw tayin.

²⁰Dengkybo nyi akv naleqgo akiam naatayin, hvbmabde hiyv nyebia jaqb nyet tvs mwwn boam laqm-baqmab wmram.

²¹Mwwswnam mam kaakinamv almadwn, hvbmabde dvs vcwr gab nyiingv nyixaq dvn.

²²Cwwbo nyiv nyet nyebiab nyet twnw dvn hoo mwwg aolo jwwgwngv hwdlo haatayin mwv cengma dvn.

²³Mwwg lyol lvgab biyuq-bemaql benboam hilayab yolu ruqnbo nyi akv kokwngam mwwswnam mam kaapa tayin.

²⁴Hiyv mwwg ab-annam naareqtvl bedwn, “Soq si nyimur maadwn,” hvnbov twrnbo nyi akwg ajin dvparv.

²⁵Rvvsw bo nyiv yolu durab gvdwn, hvbmabde hiyv At Swg aoho mwwgw boam nyet tvm tayin.

²⁶Hiyv xeq atwg aoho mwwgw dvn hv nyiidam bo akv, hvbmabde hiyv akv mwwlaqb wdwn ham ywwlin tayin

²⁷Hiyv xeq jwwgw boam jidwn hv pwwma-cimab nyiram, hvbmabde hiyv mwwg vnyiqkv kvvmw dvn hv beenam mam vigo kaapa tayin.

²⁸Hwdlo nyic bov swwrab yin, nyiilungv atam kvs sudwn, hvbmabde hwdlo bulv yuupaq yukun, jvqtw bov swwrab dvn.