Read Nyishi DOOTIN 29 Bible Online

DOOTIN 29 - Nyishi bible

DOOTIN 29

¹Mwam lwxiam tomswr sudwn, hvbsujaqkam tamil mwwg lwwpongv nywrab maadwn, hvbmabde haqmapaqb mwp lama dvb mudup tayin.

²Hwdlo jvqtw bov swwrab yin, nyiilungv hwnyir-hvmar dvn, hvbmabde hwdlo nyic bov pvvb bwwl doog yin, nyiilungv sigin dvn.

³Hiyv mwwlaqkam aby dvn hv mwwg abam hemp dvb mvdwn, hvbmabde meqjo boam ajinbov mwwg nyetam damxa dvn.

⁴Jvqtw hoqgv lvpw atv gvdangam swwrab dvb mvdwn, hvbmabde hiyv rvvswl aky naanbov ham mvpia lodwn.

⁵Hiyv nyiv mwwg door-doopwngam biyuq-bemaq dvn mwwg lvpia gab wswqkam horpo peqdwn.

⁶Almanbo nyiam mwwg nyimurnamv hoqtu dvn, hvbmabde jvqtw bo nyiv beminl hoo hwnyir-hvmar dvn.

⁷Jvqtw bo nyiv jwwgw bog jvqtwngam cengdwn; hvbmabde nyicbo nyiv hoq hvkwg cenglaqkam cengma dvn.

⁸Benyi-beya bo tulungv bopam mam wm tolwqdvn, hvbmabde mwwlaq bov hang lingtwrnam mam munyiub dvn.

⁹Mwwlaqbo nyiv nyiidam bo akwg lvgab haqyaq minsyin, nyiidam bov vcjaqb hang lengl hoo nyirdwn, hoo sunyuml dooma dvn.

¹⁰Ywlw swtw twwnbo nyiingv timb dvb nyima bo akam oyum dvn hoo jvqtw bog swwgam rugaqdvn.

¹¹Nyiidam bo akv mwwi-mwwmy maab hog mwlwngam bepor xaqdwn, hvbmabde mwwlaqbo nyiv ham cooikab mwwcuml apdvn.

¹²Pvvb bvvl doogbo akv xaalyongam tabnyiloqkam mwwg bon nyinbo mwlwngv nyic nyinbob nyitayin.

¹³Jwwgwbo nyiv la nyijab-nyiyiq bongv kvvrwq mins dvn; At Sw bunyiam hutongam kaapa mvdwn.

¹⁴Lvpw at akv dengkib jwwgw boam pw-hwwb nyiloqkam, mwwg pwqlwngv nwrba gob dootayin.

¹⁵Dvvcw xoociqkv la yolu ruqnamv mwwlaqkam jidwn, hvbmabde ko akam atam apaqnamv mwwg annam hvnyw moolw mvdwn.

¹⁶Hwdlo nyicv swwrab yin, nyimur bov kam mvqlw dvn, hvbmabde jvqtw bov bulug yoqlnam mam kaatayin.

¹⁷Noqg kongam gwrto, hoo mwv nam doonu dvb jitayin; mwv noqg hanglo hempnam mam jitayin.

¹⁸Hogloq ho nyiqry kao maanamv doodwn nyiilungam hang hom dvn, hvbmabde hiyv pvvbam pvvdwn hv xinamv.

¹⁹Gomcwr hoqgv aro nyerangam gwrnyiaq maadwn, mwv cengs lajaqkam, mwv agam birwq nyoram.

²⁰Agam nyebia jaqb goonbo nyiam no kaad nvi yv? Mwam mwwgw mam lingsam nyiidam boam hingwnamv alyadwn.

²¹Hiyv mwwg nyerangam ko anyo hoqgv anyab soca dvn kokwngam mwwg otungam nvvsiq dvb kaapa tayin.

²²Hang lenga bo nyiv yolungam durab gvdwn, hoo haaxaq mvdwb mvnamv vi yaiya go nyimur nyim dvn.

²³Larnamv mwam largeq tayin, hvbmabde hiyv yalho yan dvn hv xinam mam naatayin.

²⁴Dvco boam ajin jenbov mwwg atwg swwgam oyum sudwn; mwv beenam mam tapa dvn, hvbmabde hog gokam beelin maadwn.

²⁵Nyiingam bosnamv pwd-poto gob nyidwn, hvbmabde hiyv xeq At Swn mwwgw dvn hv swrsongv.

²⁶Nyiv vigo pvvb bvvnbo akwg nyuqm mam meegaq dvn, hvbmabde At Swg hoqgv nyiingv jvqtwngam kaapa dvn.

²⁷Jvqtw bo gab jvqtw maanbo nyi akv bulum-kacnamv, hvbmabde hiyvg lamtangv dinda dvn ham nyicbo gab bulum-kacnamv.