Read Nyishi DOOTIN 3 Bible Online

DOOTIN 3 - Nyishi bible

DOOTIN 3

¹Ngoqg ko, no ngoqg biswrnam mam mwwpa maab nyimab, hvbmabde noqg hanglo ngoqg pvvb tulungam pvvl apto,

²hoggab dumpo-xiima dvb swwnam aoho swwyunam mam la swrsongam nam vbw jitayin.

³Tumab abynamv la dengkynamv nam apaq komabv; bulam noqg lwwpo ho hiqgab apto; bulam noqg hang ura lo xiqlwql apto.

⁴Hoolak no Pwnbo gvla nyiig agaho mwwswnam mam la alwb niqtuq nyilinam mam kaapa tayin.

⁵Noqg hvvjw mwlw lvgab At Swn mwwgw to, hoo noqg atwg cenglaq aoho hingw maabv.

⁶Noqg nyitaq-betaq mwlwho mwam bepa to, hoo mwv noqg pagoq goqxiam dinda dvb mwjtayin.

⁷Noqg atwg vnyiqkv kaanam hoqgv mwwlaq dvn mwwmabv; At Swn bos to, hoo almanbo hoqgv tobkurl wleqto.

⁸Hoqhv noqg gv aiyaqkam mwp tayin hoo noqg alongam jwwtw mvtayin.

⁹Noqg gumn lvgab hoo noqg hog mwlw otuqb lengco bo hoqgv At Swn xumn to;

¹⁰hoolak noqg noosungv suut yaiya tayin, hoo noqg pwcwngv cwwt yaiya tayin.

¹¹Ngoqg ko, At Swg gwrnam mam haqpaq maabv ho mwwg yolu nammam mwwr maabv,

¹²ab akv mwwg ko tuupam abynam hvb, At Sw hiyam mwv aby dvn ham mwv yolu ruqdwn.

¹³Hiyv mwwlaqkam meegaqbo akv xinam jaqkv, hoo hiyv cenglaqkam kaapa bo akv xinam jaqkv,

¹⁴hoggab hoqhv rup hoqgv paanam mam alyadwn hoo hoqham paajongv hunamkam alyadwn.

¹⁵Hoqhv viyinam xibin yaanamv, hoo noqg mwwbynamv hoqham akam juqc nyoram.

¹⁶Hoqg lvqbwq alaq uraho swwyu deenamv doodwn; hoqg laqc alaq uraho nyetv la xinamv doodwn.

¹⁷Hoqg lamta mwlwngv hinjup bo lamtangv, hoo hoqg pagoq goqxiv swrso dvn.

¹⁸Hiyv hoqham gvbwl doogdvn hoqhv swwgwg svvnv; hiyv hoqham rubrub gvbwl doogdvn ham xinamv hvl goqtayin.

¹⁹At Swg mwwlaq hoqgv swcw gwwlam yirtu kunum; mwwg cenglaq hoqgv nyodo nyookam mvko kunum;

²⁰mwwg cengnam hoqgv ura bo issiv gamc lengnum, hoo haapam mam gums dil mvdwn.

²¹Ngoqg ko, albo mwwlaqkam la henglaqnam mam pvvto soq tulu sam vnyiq hoqgv aado mvmabv,

²²hoo bulv noqg yvj gab swwgwb nyitayin hoo noqg lwwpog guj gob nyitayin.

²³Ho no haakam alwb noqg lamtab wtayin, hoo noqg lvpiangv dwqtup ram.

²⁴No karminl doojaqkam, no bos soram; ho no karyi kam, noqg yubnamv yubngam tayin.

²⁵Hwdlo lomduq dvb mvlamnamv la nyic boam mviyaq-mvcaqnamv haaikam bos somabv,

²⁶hoggab At Sw noqg hingwb nyitayin hoo noqg lvpiangam hoqtu tanam hoqgv mvtur jitayin.

²⁷Hwdlo no alboam nyinnan atorv doog yin, ho no nyidwb rintum maabv.

²⁸Hwdlo no jisam noqg lvgab doog sutwl, noqg door-doopwngam hvl bemabv, “Wnku hoo lokta hookur taa, aram mam ham ngo jitayin”

²⁹Hiyv mwwjw jwwtwl noqg lvgab doomin gvnbo door-doopw doon boam, alman bo ceebio baql nyitws mwwmabv.

³⁰Hwdlo nyiv nam hog nyixa jimab, nyiam yolu besam jimabv.

³¹Kwr-korbo nyi akam kaaby maabv hoo mwwg nyinam-wnam mam kaag maabv,

³²hoggab surbo nyiam At Sw bulum-kac dvn, hvbmabde jvqtwbongam Pwnbov hinjw dvn.

³³At Swg beenamv nyicbo namlo lo doodwn, hvbmabde mwv jvqtw bo tulug dookam lvqc cidwn.

³⁴Bej-beparbo tulungam mwv bej-bepar kalam dvn, hvbmabde yanboam mwwswnam mam mwv jidwn.

³⁵Mwwlaq bov xinam mam otub nvvsiq tayin, hvbmabde nyiidam bov hvnywngam naatayin.