Read Nyishi DOOTIN 30 Bible Online

DOOTIN 30 - Nyishi bible

DOOTIN 30

¹Jakeg ko tuup Agurg gomcwr tulungv. Gamt tonamv. Nyia kov bibwqdvn, ngo nyelin do, Pwnboa; ngo nyelin do, Pwnboa, hoo ngadku.

²Jvqtw jaqb nyi ak gob swwdwb ngo paca caangar tukba. Ngo nyi akwg cengdy sanam mam cengk ma.

³Ngo mwwlaqkam cengk maanyi, ho Dvrwqbo Akam cengk maanyi.

⁴Hiyv ao lvpwb caapekul hoo ipoq kunam? Hiyv dooiyam mwwg alaqkv noocuml yumtuml doog pakun? Hiyv issam vj lo pusuml ap pakun? Hiyv swcw nvg ywwtwram ywrl ap pakun? Mwwg eminv, hoo mwwg ko tuup hog eminv hoggv? Jvqtw jaqb no cengdwn!

⁵Pwnbog gomcwr vxiv jvqtwngam kaakin dvn; hiyv mwam cwwgw dvn hoq tulu gab mwv svtamv.

⁶Mwwg gomcwr ho vbw maabv, hvbnyiba loqkam mwv nam yolu ruqdwn hoo nam xaalyo bo ak gob kaapa pakun.

⁷Noq galoqkv ngo luunyi go kodwn; hoq luunyi ham ngoqg sima taab maak hvma bv:

⁸Ngoqg hoqgv xaalyo ngamla vm mvvnam mam aadob mvpaqto; ngam jwwgw lakam jwwgw mvmabv ho nyet lakam nyet mvmabv; ngoqg dvs-twwsam ngam jot dvb dvdwb jitbv,

⁹hvbmaba loqkam ngoqgv naleqbalo nam mwwpa maab nyil hoo betayin, “Hiyv At Sw?” ho hvbmaba loqkam ngo jwwgw tvl dvco tai hoo ngoqg Pwnbog eminam benyi-beya tai.

¹⁰Nyera akam mwwg at-akwg tagaho tob-tai maabv, hvb nyibaloqkam mwv nam beedwn, hoo bimurv laqm baqdwb nyidwn.

¹¹At Swg abam beenbov hoo atwg annam paqma bov nyiingv vigo doodwn.

¹²Nyiingv vigo doodwn bulug at vnyiqkam dvrwq dvb kaas dvn hvbmabde bulug kacam hwrxaq maadwn.

¹³Nyiingv vigo doodwn—atam aljaq gob mwws dvn, atam koijaqb pvqs-pvqrw dvn!

¹⁴Nyiingv vigo doodwn bulug exiv lyoqr orioqb nyidwn, hiyvg caar xiijungv lyoqcib nyidwn, jwwgw boam la, nyia ko pengko hoqg dwc-twwpa maanboam swcw soqgv naapaq dvb.

¹⁵Tapeqkv nyem ko vnyig doodwn; Jitbv-Jitbv hvl bulv xabdwn. Hoolu luum go nywywngam xumt maadwn; vpy deenv nywywngam bema dvn, “Jot pa hvl”:

¹⁶Sux-ywlw nyookv, twrngum bov, kediv issam nywywngam xumt maadwn, hoo wmv nywywngam bema dvn, “Jot pa hvl.”

¹⁷Ab akam kul-kvmar kaan boam hoo ann benam mam tvjw maanboam nyook lywpag poaqkv vnyiqkam heqlin tayin hoo dookpulv dvpaq tayin.

¹⁸Hoolu luum go ngoqgab swrdorxeqnam jaqgo; vpy deen sam ngo cengnyi ma:

¹⁹doa ao lo xookam jaal yinam mam, wlw lwwtaq ho tvb doonam mam, sa-svlo aob iss jaaj wnam mam, hoo mvvngam lvgab nyega doonam mam.

²⁰Soq si bwwxin bo nyemwg nyicwngv: mwn dvtwl mwnwg agam mam tixaq tvl bedwn, “Ngo hog nyimur nyima pan.”

²¹Hoolu luum uralo swcwngv tvmdwr dvn; luupy deen ham cwqnyi kuma dvn:

²²hwdlo nyera akv lvpw atwb swwikam, hoo nyiidam bo akv hwdlo mwwg dvs dvdeq yukam;

²³aby maanam dvnv hwdlo mwn nyol ak naaikam, hoo paqn akv hwdlo mwnwg aiyam ruqpaq yukam.

²⁴Swcw nvg ao si dvpar vpy go anyo sudo, hvbmabde bulv vc-loodab mwwlaq dvn:

²⁵Torupv atorbo nyiilu ma, hvbsujaqkam dwr poolam bulv bulug dvsam dvl doodwn;

²⁶siky-bukiv atorbo nyiilu ma, hvbsujaqkam bulv bulug nammam wlw lwwtaqho mvdwn;

²⁷Takamv lvpw at doogma, hvbsujaqkam bul mwlwngv lvkin gob jardwn;

²⁸Sobiapam no noqg alaqkv nootul bwwla dvn, hvbsujaqkam hoqhv lvpw atwg nam uralo doodwn.

²⁹Dvpar oum go bulug wnamv wiyin kaapa alwb wdwn; dvpar vpy deenv bulug dwql wnamv wiyin jaqb wdwn:

³⁰svdin mwlwg pengko lo sony nyotv atorjaq dvn hoo hog mwlwg aga hoqgv tobkurl kema dvn;

³¹Roqpv dod-rorwl wdwn, bimpv kwdwr-kvdarl wdwn, hoo lvpw atwg lvgab mwwg nyemaqkv doodwn.

³²No atam paqsul, no paca peek baloqkam, ho almanam ho mvlin peek baloqkam, noqg alaqkam noqg agam lo vlwqto.

³³Gwwi hiqlinam hoqgv doxib nyidwn, nyupum mam nyumjab yukam uiyv lengdwn, hoo haaxaq xaqyikam yolungv lengdwn.