Read Nyishi DOOTIN 31 Bible Online

DOOTIN 31 - Nyishi bible

DOOTIN 31

¹Lvpw at Lemuyelg gomcwr tulungv. Mwwg annv gamt tol mwam tomswrnum:

²Ngoqg ko no hoggv nyidu dvn? Ngoqg dwrbuqnam ko no hoggv nyidu dvn? Ngoqg dingrnam ko, no hoggv nyidu dvn?

³Noqg atoram nyem tulungam jimabv, lvpw atam twrnbo tulungam noqg lamtangam jimabv.

⁴Hoqhv lvpw atgab ma, Lemuyela, hoqhv lvpw at gab opo twwdwb nyima dvn, ho pvvb bwwl doogbo tulungv twwxum-dviyaq boam dvn-twwdwb nyima dvn,

⁵hvb twwba loqkam bulv twwtvl hoggv pvvb mvknum ham mwwpa kumab nyidwn hoo hentwrbo tulug jvqtwngam muk-mviya dvn.

⁶Yuupaq tanbo akam poodwq boam twwdwb jito, hoo kacaq-bviyaqb mwwdwq boam ham twwmto;

⁷bulam twwmto hoo bulug jwwgwnam mam mwwpa kuram hoo bulug vc-loodab vs-axaqnam mam mwwpa kuram.

⁸Paca bo tulu gab, dvpa-twwpa maanbo tulu gab no albo pagoqkam gooj to.

⁹No agam goog dvl, jvqtw jaqb pw-hwwto, jwwgwbo gabla dwc-twwpw maanbo algab ceetor to.

¹⁰Dengky-dangxo bo nywxwngam hiyv kaapa dvn? Mwn xinam hun-rupam hilayab xibin yaanamv.

¹¹Mwnwg nyolwg hangv mwnwg aoho mwwjw dvn, hoo mwv hog akam cima-pwwmab nyiram.

¹²Mwnwg swwca lo mwn mwam alboam nyijdvn, hoo muurnam mam nyima dvn.

¹³nyis tulungam nyinwnam alaqkv, mwn svcaqkam la takinam meegaq dvn.

¹⁴Mwn kwm-kor mvnbo iss jaaj hvb nyidwn; mwn mwnwg dvsam aado hoqgv baqa dvn.

¹⁵Mwn poroq lug maadab gorab dvn hoo mwnwg imiq dvparam dvs-twwsam hoodwn hoo mwnwg paqn tulungam kam jidwn.

¹⁶Mwn rongo albo akam kaal ham rvdwn; mwnwg loqtuq hoqgv mwn roo ann ak liidwn.

¹⁷Mwn atwg vjam hvvtin dvb koodwn hoo mwnwg alaqkv kwrw jaqb bon nyidwn.

¹⁸Mwnwg kwm-kor mvnamv vigo niqtuq lengm dvb mwn mwwlaq dvn. Mwnwg lempv aiyam miqma dvn.

¹⁹Mwnwg alaqkv tacaq-caqxo ho igab tvl doodwn, hoo mwnwg alaqkv tan luml doodwn.

²⁰Mwnwg alaqkv jwwgw boam jiga alwb jidwn hoo mwnwg alaqkv dwc-twwpa maanboam pwwdwb jidwn.

²¹Mwnwg imiq dvpar gab mwn tapamv haas jaqkam bos maadwn, hoggab mwnwg imiq nyi mwlwngv ogbo vjam doogdvn.

²²Mwnwg kartaq nan vjam mwn atv mvs dvn; mwnwg topum mam la lwwsa-lwwma bo vjam koodwn.

²³Mwnwg nyolam toggoq tuluho hwdlo mwv nyookwg nyi nyiixa tulug pengko ho dooikam cengdwn.

²⁴Mwn topum vjam lvlwq mvlayil ham puqdwn; kwm-kor mvnboam mwn sulum mam puqdwn.

²⁵Mwnwg vj koonam hv ator rvla xinamv, hoo mwn haata bo mood gab nyirminl doodwn.

²⁶Mwnwg mwwlaq lvgab mwn agam kobeq dvn, hoo anyab tomswrnamv mwnwg lyolo doodwn.

²⁷Mwnwg imiq dvparg albo pagoq gab mwn kaal doodwn hoo sepig niqtuq hoqgv dvsam dvma dvn.

²⁸Mwnwg ko tulungv gorab layil hoo mwnwn paqdwn; mwnwg nyolv kam, mwnwn paqdwn:

²⁹“Nyem mwlwngv dengky-dangxob nyis paku, hvbmabde bul mwlwngam alyadwb nam nyibin yaapa kun.”

³⁰Nyuj-kaapnam si gwwdwn, hoo kangam twqnamsi asarv, hvbmabde hiyv nyem akv At Swn bosdvn ham paqdwb nyidwn.

³¹Mwnwg alaq nyijongam mwnwn jito, hoo mwnwg bon nyinam tulungv toggoq tuluho mwnwn paqmto.