Read Nyishi DOOTIN 4 Bible Online

DOOTIN 4 - Nyishi bible

DOOTIN 4

¹Tato, ko tulu mwlwngv, ab akwg tomswrnam sam, hoo tagab jinjin to, ho no cenglaqkam kaapa yinpv,

²hoggab ngo nam albo tomswrnam mam jidwn; ngoqg biswrnam mam apaq maabv.

³Hwdlo ngo abwg lvgab ko akwb, vjw dvkho ngoqg annwg kaagaho ngo aro twq dooi yikho,

⁴mwv ngam tomswrnum hoo ngam benum, “Noqg hangv ngoqg gamlam rubrub mwwgab to; ngoqg pvvb tulungam bvvl, hoo swwto.

⁵Mwwlaqkam naato; cenglaqkam naato; ngoqg agam soqg gomcwr tulungam wleq maabv, hoo mwwpa maab nyimabv.

⁶Mwwlaqkam apaq maabv, hoo mwwlaqkv nam bvvl doog tayin; ham aby to, hoo hoqhv nam rvky tayin.

⁷Soq si mwwlaq laqrab kov: Mwwlaqkam naato, hoo no hog nvkv xeq naapwn, hoqgv cenglaq to.

⁸Mwwlaqkam koijaqb lvram ramto hoo mwwlaqkv nam paqrab mvtayin; no mwwlaqkam cegab baloqkam mwwlaqkv nam xitayin.

⁹Mwwlaqkv noqg dumpo aoho xinam ojam tulwq jitayin; mwwlaqkv nam kangam bo ywr dumtupam gvm tayin.”

¹⁰Tato, ngoqg ko, hoo loorwqto ngoqg gaml tulu sam, ho noqg swwnam vnywngv swwyu kamyi nvpv.

¹¹Ngo nam mwwlaq lamtangam tomswr pakun; ngo jvqtw bo pagoqkam bookin pakun.

¹²Hwdlo no wikam, noqg korl wklo hog kortupram, hoo no xarjaqkam, no dwqtup ram.

¹³Tomswrnam mam nootul apto; ham wleq mvmabv; mwwlaqkam rvky to, hoggab mwwlaqkv noqg swwgv.

¹⁴Nyic bog toggoqb haamabv, hoo alman bo lamtab wmabv.

¹⁵Ham apaqto; hoq aob wmabv; hoqgv wkur gvdwl hoo wleqto.

¹⁶Hoqgab hwdlo bulv alman boam nyima deedib yubnyi maado; hwdlo bulv nyi akgon dwqtup dvb mvma deedy dib bulv yumy dooma do.

¹⁷Hoggab bulv nyic-nyia hoqgv dvsam dvdo hoo yolug opongam twwl doodo.

¹⁸Hvbmabde jvqtw bog pagoqkv pa huulinam hvb nyidwn, hoqhv aal lvpa maad deedy dib huto-huto yaiyab huto huudwn.

¹⁹Nyicig lamtangv kan twdwq bo hvb nyidwn; bulv cengma dvn bulam hognvkv dwqtup dvn.

²⁰Ngoqg ko, ngoqg gaml tulu sam tagab jinjin to; ngoqg niitin tingnam tulu sam noqg nyurungv ruucw kwrgabto.

²¹Soq tulu sam noqg kaaga hoqgv keleq mvmabv; bulam noqg hang uraho pvvl apto.

²²Hiyv soq tulu sam meepa dvn hoggab soq tulu si swwgv, hoo bulug gv aiyaq mwlwngam mwp dvn.

²³Noqg hang lvgab hog mwlwngam hvvcwr baql hengab to, hoq hoqgv swwgwg subuqkv buqlin dvn.

²⁴Noqg galoqkv bec-beya agam mam apaqto, hoo noqg surub agam goonam mam vigo aado mvto.

²⁵Noqg vnyiqkam otuqb kvvs-kaadal kaato, hoo noqg rogabnamv haabob dinda mvla mvto.

²⁶Noqg lvpiag lamtangam mwwdy to; ho noqg lamta mwlwngv kvtaq tayin.

²⁷Laqc-lvqbwqb wkub-wxeq maabv; noqg alman lvpia dwqkap hoqgv dookur tuku.