Read Nyishi DOOTIN 5 Bible Online

DOOTIN 5 - Nyishi bible

DOOTIN 5

¹Ngoqg ko, ngoqg mwwlaqnam sam tagab jinjin to; ngoqg cenglaqsam noqg nyurungv ruucw kwrgabto,

²ho no atv hingkib henl swwdwb, hoo noqg nvbcwrv cenglaqkam rvkil doom dvb.

³Hoggab noyumnam dvnwg nvbcwrv tong ngola hvb bedwn, hoo mwnwg agam goonamv kutiam hvlap yaadwn,

⁴hvbmabde mwnwg niqtuqkv rwk hvb kacaq dvn, ho lyoqgw-lyoqr areqbo orioq saala hvb nyidwn.

⁵Mwnwg lvpiangv sigwb ipoqdvn; mwnwg korl wnamv Sux-ywlw lamtab wmin gvdwn;

⁶mwn swwg pagoqkam mwwmadvn; mwnwg lamtangv nyogaq gaqxar dvn, hoo mwn ham cengma dvn.

⁷Hoo sija, ko tulu nul, ngam tagabto, hoo ngoqg agam goonam soqgv wleq maabv.

⁸Noqg lamtangam mwnwg galoqkv aado to, hoo mwnwg nam ogumho bviyeq jijaq maabv,

⁹hvb nyima baloqkam noqg xinam mam no asaqkam jid kun hoo noqg vnyw mwlwngam aya mwwpa maanboam jid kun.

¹⁰hvb nyima baloqkam noqg atoram nyuum tulungv naareq tayin, hoo noqg nyijo tulungam nyoodo nyi akwg nammwb nyipaq jitayin,

¹¹hwdlo noqg lwmwngv kumgum laqlongv coojo yukun hoo noqg swwtar aal lo no sigin dvn,

¹²hoo no bedwn, “Hoggub jaq ngo gwrnam mam looma sutkun yu, hoo ngoqg hangv tomswrl yolu ruqnam mam haqpaq sutkun yu!

¹³Ngam biswrbo tulug goonam mam ngo tagab maanum ho ngam tomswrbo tulungam ngo ruucw kwrgab dvb mwwmanum.

¹⁴Mwlwg hookuml dookumko si ngo vc-loodab yuupaq tanam gamb si doodwn.”

¹⁵Noqg atwg sokum hoqgv iss todul doonbo, noqg atwg iss uppum hoqgv twwto.

¹⁶Noqg xulinbo issam cwrsaq-bvraq aadob, tol doonbo issam lyobu buuxib tokar mvb yv?

¹⁷Bulam noqg aro gab doomto, hoo noqg lvgab asaq nyiam twwm mvmabv.

¹⁸Noqg tol subuq buqlinam mam xikum namgob nyimto, hoo noqg nyijwr-yaapa moodam noqg nywxw lvgab hemp poto,

¹⁹kangam bo dumb ak hvb, anya bo dumn hvbkalam. Mwnwg gwwi hoqgv looxiam nam hemp dvb twwdeq mvto; mwnwg aby ho lwxiam liitu koto.

²⁰Ngoqg ko noyumnam dvn akwg lvgab, no hoggub liitu kodwn, hoo bwwxin bo nyem akwg haabongam cegab dvn?

²¹Hoggab nyi akwg lamta mwlwngv At Swg vnyiq kaagaho doodwn, hoo mwwg lamta mwlwngam mwv meekar dvn.

²²Nyicbog nyixaqnamv mwam hoqtu dvn, hoo mwwg nyicig osongv mwam rubrub jaqb liitu dvn.

²³Gwrma gab mwv sidkun, hoo mwwg vc-loodab nyiidam ko-gab mwv gaqxar dvn.