Read Nyishi DOOTIN 6 Bible Online

DOOTIN 6 - Nyishi bible

DOOTIN 6

¹Ngoqg ko, no nyi kooxnam ak gab, noqg door-doopwngam noqg dingrwl ai tengp kunyiloqkam,

²noqg agam tulungv nam poto hoqtu paknyiloqkam, noqg agam goolinam tulungv nootu pak nyiloqkam,

³ho soq sam nyito, ngoqg ko, hoo no atv ywwlin suto, hoggab no noqg door-doopwg alaq uraho haapa ku; atv yan gvdwl nyebiab wgdvl, hoo noqg door-doopw lvgab nyebia jaqb xumg dvl kota:

⁴Noqg vnyiqkam yumy mvmabv hoo noqg nyiqbaram nyiqcwl yubngaq mvmabv;

⁵swcwrv dorv hoggub nyora gaqn bo alaq hoqgv, pvta mengbo alaq hoqgv pvta dorv atv keleqnam hvb, no atv ywwlin suto.

⁶Sepy boa, torup dookub wto; bulug nyinam-wnam tulungam kaag dvl, hoo mwwlaqto.

⁷Peelo bo, nyigbo, ho pvvb mvgbo doog ma;

⁸hvbsujaqkam bulv bulug dwr pool gab dvsam naol apdvn hoo bulug dvs vliam boqkum dvn.

⁹Sepy boa, hog hwdgo no yubl dootayin? Noqg yubnam hoqgv hwdlo no gorab taikun?

¹⁰Meceqgo yumy gvi, meceqgo yubngaq gvi, anyo go alaqkam cikwq-lvqlwqtvl doonu do,

¹¹hoo naalil naareqbo hvb, hoo mwx-mvaql nyob pvnw namhvb jwwgwnamv noqg aoho haatayin.

¹²Dooxa xaaram bo la nyicbo nyi akv, nobc-namxwl bel wdwn,

¹³mwwg vnyiqkv nyiqcw-nyiqbio dvn, mwwg lvpiangv dujo-duiyo dvn, mwwg lvqcwngv ciqk-ciqpaq dvn,

¹⁴nyicig hang lvgab alman boam nyidwn, guunyingam toxa maab pvqmw dvn;

¹⁵hoqgab dwr-kanongv mwwg aolo haqma-paqb haatayin; nyiqyab-nyiqbio maadab mwam mwp lama dvb mwmwq tayin.

¹⁶Pagoq goqx go At Sw oyum dvn, kvn deenam hv mwwg gab bulum-kacnamv:

¹⁷koornan vnyiqkam, xaalyo nan lyolam, hoo nyi nyinyiam ywlw twwnan alaqkam,

¹⁸nyic nyidwb mwwlinnan hangam, nyebia jaqb alman boam nyitab xarnan lvpiangam,

¹⁹xaalyo hvvky akwg vm mvvlinam mam, hoo vbw-bor pengko lo hiyv guunyi-yolungam pvqmw bo akam.

²⁰Ngoqg ko, noqg abwg pvvb tulungam tal swwto, hoo noqg annwg biswrnam mam apaq maabv.

²¹Hoq tulu ham noqg hanglo lwxiam mwwgabto; bulam noqg lwwpo lo riigab tvl gvto;

²²hwdlo no wikam, bulv nam wgtayin; hwdlo no yubl dooikam, bulv nam rvky tayin; hoo hwdlo no huurab yin, bulv noq lvgab gootayin.

²³Hoggab pvvb si murv, hoo biswrnamv hutongv, hoo yolu ruql gwrnamv swwg lamtangv,

²⁴almanbo dvn ak hoqgv, bwwxinbo nyem akwg tangam dvb agam goonam hoqgv nam mutur dvn.

²⁵Mwnwg anyanam mam noqg hangv mwwby maabv, hoo mwnwg vnyiq kangam hoqgv mwnwn no leel tuml komabv;

²⁶hoggab yocu-yabio nyijo jookarbo akwg nyijongv vcin hoqkin gob nyitwq dvn, hvbmabde bwwxinbo dvn akv xinam swwgam muiyu dvn.

²⁷Hiyv nyiv mwwg swqbw ho wm mam tvptvl, mwwg vj tulungam gum mvmab bvvl wgtayin?

²⁸Ho mopio hwrda kvla bo aoho dapwl wnyi tan hoo mwwg lvpiangam gubiaq ram yv?

²⁹Hoq hvbkalam hiyv akgon mwwg door-doopwg nywxw dookub wdwn, hiyv mwnwn idaqbo akjijaqkam laqm-baqmab dooram.

³⁰Hwdlo mwv kano yukam mwwg kanongam xumdwb dvdeq dvb dvco col dvbnyiloqkam nyiilungv muur maadwn,

³¹hvbmabde mwam nootu kublo, mwv tom-kvn go hiqdwb nyitayin; mwwg nammwg hog mwlw dupum-dvrab pam jitayin.

³²Hiyv bwwxin dvn hv mwwlaqnan dooma dvn; hiyv ham nyidwn mwv atv atam muiyu sudwn.

³³Mwv laqm baqtayin hoo mwam xikram, hoo mwwg hvnywngam hurpaqko dooram.

³⁴Hoggab kaaneqnamv nyiam hang lingtwr mvdwn, hoo hwdlo mwv ree daqyin mwv apaq maadwn.

³⁵Mwv sooram akkam naaram; akiam no jibin-jilin sujaqkam mwv loorwqram.