Read Nyishi DOOTIN 7 Bible Online

DOOTIN 7 - Nyishi bible

DOOTIN 7

¹Ngoqg ko, ngoqg gaml sam pvvto hoo ngoqg pvvb tulungam noqg lvgab gumnwb pvvto;

²ngoqg pvvb tulungam pvvg dvl hoo swwto; ngoqg biswrnam mam tvsw vcwr gob pvvto;

³hoq tulu ham noqg laqc koroho bvvto; hoq tulu ham noqg hanglo xiqlwqto.

⁴Mwwlaqkam beto, “No ngoqg bwrmv,” hoo cenglaqkam noqg ajin jimbw gob goqto,

⁵noyumnam dvn hoqgv, bwwxinbo nyem akwg taby dvb goonam hoqgv nam mutur dvb.

⁶Hoggab ngoqg nam pupum yabtam hoqgv ngoqg kaacoql kaalinum,

⁷hoo ngo damdambo pengko lo, nyijwr-yaapa pengko lo, mwwlaq maanbo yaapa ak kaapa kunum,

⁸mwnwg ogumb wpeq bo lyobu cuukiqb, hoo mwnwg nammwb wnbo lamtab wdunum

⁹oyum jij-maab, ai kan twdwq yuk ho.

¹⁰Hoo kaato, dvn akv mwam kaapa dvn, sur hangam baqtwl yocu-yabio bo akwg vj koonam hvb koonum.

¹¹Mwn dul-xaal bidu-bel tama dvn; hoo mwn nywywngam namho koodaq kuma;

¹²sija daq lyobu ho, sija daq kor mvk haty ho, hoo mwn cuukiq kiqxy lo tooiya yaal daqkwr dvn.

¹³Mwn mwam humtul moopup do, hoo hvnyw-har maab mwn mwam bedwn,

¹⁴“Ngo pwr tulungam jiyinum, hoo sool ngoqg dingrnam mam nyig yukun;

¹⁵hoqgab sija ngo nam kvvrwqtab lvvgwb lengyi kun, nam ngo toxum-taxwl meegaqnum, hoo ngo nam meepa paku.

¹⁶Ngo ngoqg kartaqkam puux-puurw peekun, Ijipt nyi tulug kangam dvb toj mvnam topum vjam puupe kun;

¹⁷Ngo ngoqg kartam mam mirr, Agor hoo Asing-tari sungam bo hoqgv tooiyaq peekun.

¹⁸Kujo haato, ngunyig abynam sam ar nagub xumt dvb soomin tuj; ngunyig aby lvgab ngunyiv hemp tuj.

¹⁹Hoggab ngoqg nyolv namso dooma; mwv aado jaqb nyoyw wro nvba;

²⁰mwv twngk cuk kug mwwg lvgab baqg nukun; mwv pool hvrbw yukam nammwb mwv hvvxiqtayin.”

²¹Vcjaqb taby dvb mwnwg agam goonam lvgab mwam pwqdwn; mwnwg toiyuq dvb goonam lvgab mwn mwam bigum dvn.

²²Tada tvl mwv mwnwn wmin gvdwn, svv hvvbv hoggub patab tanbo lvgab wmin gvnam hvb wdwn, ho dumbam hoggub potongv rubrub hoqtu kunum hvb

²³uppuqkv mwwg vsinam vblwq maad deedib; pvtangv gotaqb jvrlwqnam hvb; hoqhv mwwg swwgam rvg yukbo hvl cengma dvn.

²⁴Hoo sija, ko tulunga, ngam tagabto, hoo ngoqg agam gaml tulu sam ruucw kwrgabto.

²⁵Noqg hangam hoq dvnwg lamtab mwwar mvmabv; hoq dvnwg lamtab booxar komabv,

²⁶hoggab hoq dvn hv nyiam vigo domyu log nukun, hoo hoq dvnwg mengknamv nyiv vi nukun.

²⁷Hoq dvnwg nam lamtangv Sux-ywlwb wdwn, hv nilbo batam pwqlwb ig gvdwn.