Read Nyishi DOOTIN 8 Bible Online

DOOTIN 8 - Nyishi bible

DOOTIN 8

¹Mwwlaqkv goqma yv? Cenglaqkv yal dul maai yv?

²pamdag haaga viyap bviywrho toggoq ho, mwwlaqkv vcib sogoq dvn:

³pamdag otuqg toggoq tulu bviywrho, mwn vcib baag haagaho sogoq dvn:

⁴“Nyi tulunga, ngo nulam goqdwn, hoo ngoqg sogoqnamv nyia ko tulu gab.

⁵Damdambo ak no, mwwlaqkam cengto; nyiidam bo tulungv mwwlaq laqrabto.

⁶Tato, ngo albo bvrwqkam gootayin, hoo ngoqg agam soqgv hoggv jvqtw dvn ham goolin tayin,

⁷hoggab ngoqg agam soqgv jvqtwngam gootayin; nyic-nyiangv ngoqg agam gab bulum-kacnamv.

⁸Ngoqg agam gaml mwlwngv jvqtwngv; bikub-bexeqnam akkam dooma dvn ho gaml tuluho bigw-bego dooma dvn.

⁹Hiyv cenglaq dvn, hoqgab mwlwngv dinda dvn, hoo jvqtw dvn hiyv cenglaqkam kaapa dvn.

¹⁰Rupwg kwliam ngoqg tomswrnam mam; hoo daagabnam hunam naammam lingsam cenglaqkam naato,

¹¹hoggab mwwlaqnamv viyinam alyadwn, hoo noqg hog mwlw mwwbynamv cenglaqg simp ram.

¹²“Ngo, mwwlaqkv, mwwlaq lvgab doodwn, hoo ngo cenglaqkam la mwwbwqnanam kaapa do.

¹³At Swn bosnamv alman boam oyum dvn. Larnam mvla kwr-kornam mvla almanbo lamtangv la hoo bec-beya benam mam ngo oyum dvn.

¹⁴Ngo tomswr-hony nanam la albo mwwlaqkam doogdvn; ngo cenglaq nanam doogdvn; ngo atoram doogdvn.

¹⁵Ngoqg hoqgv lvpw at tulungv pvvb mvl dvn, hoggv jvqtw dvn ham pvvb mvnbo tulungv pvvb bwwdwn;

¹⁶lvpw atwg ko tuup tulungv, hoo albo nyiilungv, ho hiyv jvqtw pvvbam bwwnbo mwlwngv ngoqg hoqgv pvvb bvvl doogdvn.

¹⁷Hiyv ngam aby dvn ham ngo aby dvn, hoo hiyv ngam hengab jinjinl meekar bov ngam kaapa dvn.

¹⁸Nyetv la xinamv, nyet tuiyunamv la jvqtwnamv ngoqg lvgab doodwn.

¹⁹Ngoqg aaxy si hunam alyadwn, aljaqnbo hunamkam, hoo ngoqg xeelinamv xinam rupam alyadwn.

²⁰Ngo dvrwqbo lamta ho, ho jvqtw bo pagoq tuluho wdwn,

²¹hiyv ngam aby dvn otungam jisiq dvn, hoo bulug uddum tulungam bwwr mvdwn.

²²Otuqcob mwwg kolwg nyirab yukho, At Sw mwwg bonam nyirab yuk hoqgv ngam gumnwb pvvnum

²³Swcw nvg beggar maadab, otuq coocib, ngam kol pvvnum.

²⁴Sa-svlongv dooma daab, hvvi subuqkv vigo buqlin maadab ngam lengm kunum.

²⁵Puutu tulungv dooma daab, yorn tulungv yornwb nyima daab ngam lengm kunum,

²⁶Swcw nvg lvgab deelangam, ho gvda gvtwg otuqjaqg diimwram Pwnbov pwlin maadab yikho.

²⁷Hwdlo Pwnbov ao nyookam mvko yukho; hwdlo Pwnbov sa-svlo aongam vrr yukho; ngo dooknum,

²⁸hwdlo Pwnbov doa aongam hwngkw dvb mvdwqho, hwdlo Pwnbov sa-svlog subuqkam mvko yikho,

²⁹hwdlo Pwnbov sa-svlongam hingtwr dvb mwr yikho, hoqgab iss tulungam mwwg gamlam juqbo mvma dvb, hwdlo Pwnbov swcw nvg gwwlam mwr leng yikho,

³⁰bonam nyilaqbo ab ak hvb, ngo Pwnbog bviywrho doonum, hoo looxiam ngo mwwg hemp gob nyinum, lwxiam mwwg agaho hwnyir-hvmar dvn,

³¹mwwg gvda gvt dook ho hwnyir-hvmar dvn hoo nyia ko aoho hemp podu dvn.

³²Hoo sija, ko tulunga, ngam tagabto; hiyv ngoqg lamtab wnbov xinam jaqkv.

³³Tato tomswrnam sam hoo mwwlaqto, hoo sam anam maabv.

³⁴hiyv akv ngam tagab dvn hv xinam jaqkv, looxiam ngoqg toggoq tuluho rvkil doodwn, ngoqg yabg ho kaaya yaal doodwn.

³⁵Hoqgab hiyv xeq ngam meepa dvn hv swwgam meepa dvn, hoo At Swg hoqgv mwwsw nammam naadwn,

³⁶hvbmabde hiyv ngam meepa maadwn mwv atv atam un mvg sudwn; hiyv ngam oyum bo mwlwngv hv sigam aby dvn.”