Read Nyishi NYIJWQ 10 Bible Online

NYIJWQ 10 - Nyishi bible

NYIJWQ 10

¹Sikbo tviywngv sungam bo kutiam naaiya mvmdvn; anyo kog go damanamv pumb ywrnam mam la xinam mam jaaiya dvn.

²Mwwlaqbo nyi akwg hangv mwam lvqbwqb mwwm dvn, hvbmabde damabo akwg hangv mwam laqcib mwwm dvn.

³Damabov vly lamta ho ws jaqkam mwv mwwcin maadwn, hoo mwv nyi vxiam betam dvn ngo damabo akv hvl.

⁴Pvvb bwwl doogbov noqg aoho hangv lengyi nyiloqkam, noqg dookam apaq maabv, hoggab cooikab svtwl doonamv vcjaqb nyimur tanam mam svnyiam mvtayin.

⁵‍Nyodo nvg niikum so ngo alman ak kaatkun, hoqhv pvvb bwwl doogbo hoggv almanbov lengdwn:

⁶‍dama boam naleqgo xid-paqdwb mvca dvn, hoo nyet boam xima-paqma dvb mvl dvn.

⁷‍Nyera tulungv svpur aoho, hoo lvpw atwg tuup tulungam nyera tulu hvb haty ho lvpiab wnam mam ngo kaatkun.

⁸Hiyv ung roqdwn hoqho mwv yoqlwq sutayin, hoo hiyv gurum mam mvpia dvn ham tvbv cetayin.

⁹Hiyv wlw paadwn bulam wlwngv ngurjab dvn, hoo hiyv svvtaq pordwn bulv hvvmin dvb nyidwn.

¹⁰Vxv xwgw yukam ham nyi ak pwreq maabnyiloqkam, mwv laqham jaqb pad dvb nyidwn, hvbmabde nyi akam pumb ywrnamv niqtuq nyilin mvdwn.

¹¹Os naama taab tvbv cek bvnyiloqkam, naanbo akwg os naanamv niqtuq dooma dvn.

¹²Mwwlaqbo nyi akwg goonamv mwam mwwsw kodwn, hvbmabde damabo akv atam goolyu sudwn.

¹³Mwwg gomcwr tulu goorabnam agamv damabo hvb goodwn, hoo mwwg gootwr-goonyanam agamv alman jaqkam goodwn.

¹⁴Damabo akv naleqgo goodwn, mwv hoggv goota dvn ham nyiv cengma dvn, hoo mwwg kokwb hoggv haata dvn ham hiyv mwam betam nyotayin?

¹⁵Damabo akwg hentwrb bonamv mwam mwwdwq mvdwn, hoggab mwv bopamg wk lamtangam cengma dvn.

¹⁶Hwdlo noqg lvpw atv ko anyo xiqyin, hoo noqg lvpw atwg ko tuup tulungv ar komcam dvmin-twwminl doomin yin, gvda nga, no mwwdwqto!

¹⁷Gvda nga, noqg hempv la, hwdlo noqg lvpw atv xinam dvpar hoqgv dwrbuqlin yin, hoo noqg lvpw atwg tuup tulungv xikjaq moodam dvl-twwl dooiyin, hoggab soq si ator torn dvb, hvbmabde twwxum dvbma!

¹⁸Sepy ko-gab mwwlongv yaqko dvn, hoo sepy ko-gab namlo doody dilwq dvn.

¹⁹Dvnamv soomin-nyirmin dvb, roo alangv twwnamv swwgam hemp mvdwn, hoo twngkam hoolu luuxy-cerho nyin dvn.

²⁰Noqg mwwnam hookam, lvpw atam beemabv, noqg yubk cwwrwho nyet boam beema bv, hoggab doa nvg pvtangv noqg goonam yalam baql wgtayin, ho alap gvnbo vc-aminv hoq pagoqkam betam dvn.