Read Nyishi NYIJWQ 12 Bible Online

NYIJWQ 12 - Nyishi bible

NYIJWQ 12

¹Noqg tuudy-yaamy swwca aalam nam Twrw-tvnboam mwwgab to, almanbo aalv haama taab hoo haata bo vnyw tulungam no hvl betayin, “Hoq moodam ngo hwnyir-hvmar kuma”;

²‍doonyiv, hutongv, poolv, hoo takarv kan maatab hoo nyodo hoxo kokwngam doomwqkv hwrkur maatab,

³‍nammam rvkybo tulungv tvmdwr de aalam, hoo atorbo nyiilungam nyinyiaq mvdwn, hoo riqmwq bov riqn tanam hv anyo ko-gab riqk maadwn, hoo hiyv pupum hoqgv kaacoq bo tulungv nyiqm dvn,

⁴‍hoo lyobu hoq viyap tulungam ciqtumpa — hwdlo dux xunam yalv anyo-anyob duikam, hoo pvtangv duuyin huurab dvn, hoo nyem ko tulug beminam mam tama-tajal tapa tan —

⁵‍hoggv ao dvn hamkam bulv bosdvn, hoo vcjaqb bos dvb nyinamv lamta mwlwho dootayin; almon svvnv opu puuikam, komar takamv seel wgdvn, hoo mwwbinamv niqtuq lengkuma, hoggab mwwg nwrba cwtam nammwb mwv wdul doodwn, hoo lyobu buuxho nyix riinbo tulungv gaql yvdwn —

⁶‍rup tamaqkv duqriq maatab, ho hun pumkaqkv taqc maatab, ho subuq buqlinko ujuqkv taqc maatab, ho sokum lo seelin nan kookwrv durtu maatab,

⁷‍hoo kediv diimwrb nyilayil kedib hookurnam hvbkalam, hoo Pwnbog jinum yalv Pwnbo dookub wkur dukun.

⁸‍Niqtuq doomag aoho, niqtuq dookma, Tomswr bov bedo; hog mwlw si niqtuq dookma.

⁹‍Mwwlaq lvvgho, Tomswr bov nyiilungam cengnam mamkam, jaakanam mam hoo poory rinam mam tomswrnum hoo hengab jaqb naleqgo niitin tinam mam mwx-mvaqnum.

¹⁰‍Tomswr bov tangam bo gomcwr tulungam meegaqnum, hoo mwv jvqtw bo gomcwr tulungam jot kvl dvb xeqnum.

¹¹‍Mwwlaq bog gomcwr tulungv nwqduqnan swwxo hvb nyidwn, hoo niitin tinam tulungv hwngkw mwrw jaqb dvvcw puqnyw tvqlwqnam hvb nyidwn, soq mwlw sam Sviya kaanbo akinv jidwn.

¹²‍Ngoqg ko, soq lvvg soqgv hog mwlwngam hengab to. Naleqgo kitap mvnamv mutubko dooma dvn, hoo vigo poorynamv gv vdinam vpy-vi dvb mvdwn.

¹³‍Hog mwlwg pagoq vtwr so; mwlwngam tapa pakun. Pwnboam bosto hoo mwwg gaml tulungam pvvto, hoggab soq si nyia kog nyidy sanam nyis pootv.

¹⁴‍Hoggab Pwnbov hog mwlw bon nyinam mam, hog mwlw kvsnam pagoqkam, ho al-kor nyinam mwlwngam pw-hwwkho boolwq tayin.