Read Nyishi NYIJWQ 2 Bible Online

NYIJWQ 2 - Nyishi bible

NYIJWQ 2

¹Ngo ngoqg hvvjw lo benum, “Sija haato, nam ngo hemp-hengam lvgab pooka tayin; nulv atv soomin-nyirmin to.” Hvbmabde kaato, soq si kam niqtuq dookma.

²‍Ngo nyirn boam benum, “Soq si rugaqbo go,” hoo hemp-hengamnamv, “Hoggv niqtuq doodwn?”

³‍Roo ala twwl ngoqg gv apongam hoggub hemp dvb mviyin dvn ham ngoqg hvvjwngv meegaqnum — ngoqg hvvjwngv ngam mwwlaq lvgab hvraq mwwgnum — hvbsujaqkam pacangv nootul doogdvn, nyodo nvg niikum lo nyia ko akv bulug anyo go swwl dood moodho hoggv aldvn ham ngo hvraqb kaapa namgob?

⁴‍Ngo koijaqn bo nyis tulungam nyinum. Ngo nam tulungam mvknum hoo ngo atgab roo boolungam liinum.

⁵‍Ngo atv boolungam la soominl doonu ko nyookam mvnum, hoo hoq uraho hoolu luuxy aaxy xeenbo svvn tulungam liinum.

⁶‍Nyorog svvn tulungam iss jidwb ngo atv iss swnyiqkam hengnum.

⁷‍Ngo nyera-paqnv rvnum, hoo ngoqg namho ko bwwsiqnum nyera-paqnv doonum. Hoq lvgab Jerusalemho ngoqg otuqb swwnyia bo mwlwngam ngo koi yaab sibin-svv gumnv sobin yaanum.

⁸‍Ngoqgab la lvpw atgab la nyook tulug gumn uddum gab ngo atv hun-rupam pookumnum. Bemin belaqbo nyem-nyegangam ngo pvvnum hoo nyia ko tulungam hemp mvm dvb xwwbaq nywxwngv vigo pvvnum.

⁹‍Jerusalemho ngoqg otuqb dooco bo mwlwngam ngo koi alwb swwlv yaanum. Ngoqg mwwlaqkv kam ngam doobanum.

¹⁰‍Hoo ngoqg vnyiq kaaby nammam ngo apaq maab nyinum. Ngoqg hang hemp-hengam mam ngo pvvmab nyima, hoggab ngoqg hangv hwnyir-hvmar dvn ngoqg hentwrb bon nyik tuluho, hoo soq si ngoqg hentwrb bon nyijo akiv.

¹¹‍Ho ngoqg alaqg hog mwlwngam nyinam mam la hoqham nyidu yikho ngoqg hentwr henam mam ngo mwwkanum, hoo kaato, niqtuq dookma hoo dooiyam nootu tanam hvb nyidwn, hoo nyodo nvg niikum so hog akam niqtuq kaapa sv dook maanum.

¹²‍Mwwlaq hoo rugaq hoo pacangam ngo mwwdy kaanum. Hoggv lvpw atwg nyil ap kunam mam, kokwb haanbo nyiv hoggv nyinyi tayin?

¹³‍Ho ngo kaaknamv paca boam mwwlaqnamv vigo niqtuq lengbin yaadwn, kanho naanam mam huto lo naanamv naabin yaadwn.

¹⁴‍Mwwlaqbo nyiig vnyiqkv mwwg dumpo ho doodwn, hvbmabde paca bov kanho wl yvdwn. Hoo hvbsujaqkam ngo cengnum soq hog mwlw nyinam luukin si bul mwlwngam nyinum.

¹⁵‍Ho ngoqg hang ura lo ngo benum, “Paca boam hoggv nyinam hv ngam kam nyitayin. Hvnyiloq ngo hoggab mwwlaq lvqtwrbo hvb nyipa kun?” Hoo ngoqg hang ura lo ngo benum soq si kam niqtuq dookma.

¹⁶‍Paca boam mwwpa kumanam hvbkalam mwwlaq boam kam oyu go mwwpa kuram, haata bo aalam mwlwngam mwwpa keekram. Paca bov hoggub sidwn hvbkalam mwwlaq bov kam si tayin!

¹⁷‍Hoqgab ngo swwgam oyumnum, hoggab nyodo nvg niikum so hoggv nyinum hv ngam mwwdwq mvmdo, hoggab hog mwlwngv niqtuq dookma hoo dooiyam nootul tanam hvb nyidwn.

¹⁸‍Nyodo nvg niikum so ngoqg hentwr henl bon nyinam mwlwngam ngo oyumnum, hoggab ngoqg kokwb haady bo nyi gab kaatwl sam ngo apaq pel wdwb nyitayin,

¹⁹‍hoo hiyv cengdwn mwv mwwlaq bov suiyv ho paca bo suiyv? Hvbsujaqkam ngoqg mwwlaq lvgab hoggv ngo nyodo nvg niikum so hentwr henl bon nyip kunam mam mwv mwlwg at gob nyitayin. So si kam niqtuq dookma.

²⁰‍Hoqgab nyodo nvg niikum so ngoqg hog mwlw hentwr henl bon nyiknam mam ngo tobkur kaaknamv ngoqg hvvjwngv mwwgw dook maanum,

²¹‍hoqgab lok-lokob nyi akwg mwwlaq-cenglaql nyilaq lvgab hentwr henl bon nyip kunam hog mwlwngam, hentwr henl bon nyima bo akam hwnyir-hvmarl dvmin-twwmin mvdwb apaq pel wleq taikun. Soq si kam niqtuq dookma hoo hoq akv koijaqb almanbov.

²²‍Nyodo nvg niikum so hog mwlw hentwr henl bon nyinam tulu hoqgv nyi akv hoggv doogdvn hoo vcjaqb hang nyoma maasaml mwwg hentwr henl bon nyijongv hoggv?

²³‍Hoqgab mwwg swwca bumpw ho mwwdwq dwqdu dvn, hoo mwwg bonam nyinamv vc-apynam akv. Aiyam kam mwwg hangv yumy kuma dvn. Soq si kam niqtuq dookma.

²⁴‍Nyiingv mwwg hentwr henl bon nyil dvp-twwiyin dvnam-twwnam ao hoqgv alyanboam kaaparam. Soq sam kam ngoqg kaanamv Pwnbog alaq hoqgv,

²⁵‍hoggab mwam apaq pel hiyv dvl-twwl ho soomin-nyirmin nyotayin?

²⁶‍Hoggab hiyv nyiv mwam hemp mvmdvn ham Pwnbov mwwlaq-cenglaq hoo hempam jipa kun, hvbmabde nyic nyin boam mwv nyoma maal door tvl nookum mvmdvb jipa kun, hiyv Pwnboam hemp mvmdvn ham aro jipan. Soq si kam niqtuq dookma hoo dooiyam nootul tanam hvb nyidwn.